அப்பர் விருந்து

 

அப்பர் விருந்து:

அப்பூதி அடிகளார் அப்பர் மீது கொண்ட அன்பின் மிகுதியால்,  தான் செய்யும் தர்ம காரியங்களுக்கு அப்பரின் பெயரிலேயே  செய்து வந்தார். வீட்டில் உள்ள பிள்ளைகளுக்கு கூட திருநாவுக்கரசர் பெயரை வைத்து தன் அன்பை காட்டி வந்தார். 

ஒரு நாள் அப்பர் அப்பூதியார் வீட்டுக்கு வந்து அவர் தம் திருமனையில் உணவ அருந்த வந்து அது சமயம் வாழை இலை பறிக்க சென்ற தன் மகன் பாம்பு கடித்து இறந்து விடவே  திருநாவுக்கரசர் இறைவனை வேண்டி பதிகம் பாடி இறந்த மகனை மீட்டு உயிர் பெற்று எழச் செய்தார். இது அப்பர் சுவாமிகளின் அற்புதங்களில் வைத்து எண்ணப்படுவது என நாம் படித்து வியந்து இருப்போம்.  அதை விரிவாக வரலாற்று கட்டுரையில் படித்துக் கொள்ளலாம்.  அது தொடர்பான இணைய வழி வானொலியில் கேட்டு இன்புற்று இருக்கலாம். 

ஆனால் இந்த பகுதியில் அது தொடர்பான எதையும் சிந்திக்கப் போவது இல்லை. அட அப்புறம் என்ன என ஆச்சரியமாக பார்க்கும் உங்கள் ஆர்வம் புரிகிறது. 

இந்த ஆய்வு பகுதியில் அப்பர் ஒரு விருந்தாளி. திடீர் விருந்தாளி  ஆஹா ஆமாம். அவருக்கு அமுது படைக்க முடிவு செய்கிறார்கள். சரி. 

இப்போ இந்த விருந்தில் படைத்த உணவு வகைகள் என்ன என்பது தான் ஆய்வு.  என்ன சார் இது என்ன சாப்பாடு என்று ஆய்வா என கேட்கும் உங்கள் கேள்வி புரிகிறது. ஆனால் இது யாரையும் குறை சொல்வதற்கு இல்லை.  நடந்த சூழ்நிலை இருக்கும் இட அமைப்பு பெரியபுராணம் சொல்லும் குறிப்பு என இவைகளை அடையாளமாக வைத்துக் கொண்டு  இந்த ஆய்வை தொடர்வோம். 

இதனால் நம்மக்கு கிடைக்கும் பயன் என்ன ? ஒரு பகுப்பாய்வு அவ்வளவு தானே என நினைக்காமல் junk food சாப்பிட்டு பழக்கப்பட்ட பலர் என்ன உணவு அப்போது சமைத்து சாப்பிட்டு இருப்பார்கள் என சிந்தித்தால் அவர் வாழ்க்கையில் மாற்றம் வரட்டும் ஆரோக்கியம் பெருகட்டும் என நல்ல எண்ணத்தில் இப்படி இந்த ஆய்வு பதிவினை பதிவு செய்கிறோம். 

முதலில் சில அடிப்படை விஷயங்களை புரிந்து கொள்வோம். அப்பூதி அடிகளார், பிறப்பால் அந்தணர் குலத்தை சேர்ந்தவர். பொதுவாக அந்தணர்கள் காலையில் 11 மணிக்கு சாப்பிட்டு விடுவார்கள். brunch என சொல்லும் breakfast மற்றும் lunch இவற்றிக்கு இடைப்பட்ட காலத்தில் சாப்பிட்டு விட்டால் மாலையில் ஒரு snacks இரவில் அமைதியாக கொஞ்சம் supper அவ்வளவு தான். இன்னும் இது பல குடும்பங்களில் , நகர் புற குடும்பங்களில் கூட வழக்கத்தில் இருக்கிறது என்பதை புரிந்து கொள்ளலாம். 

அப்பர் அப்பூதி அடிகளார் வீட்டிற்கு வந்தது கோடை காலம் தான். ஏன் என்றால் அப்போது தான் தண்ணீர் நீர் மோர் பந்தல் திருநாவுக்கரசர் பெயரில் வைத்து இருப்பதை பார்த்து வியந்து கேட்கிறார். இந்த அப்பூதி அடிகளார் எங்கு இருக்கிறார் என.  எனவே அப்பர் சுவாமிகள் திங்களூருக்கு வந்தது கோடை காலம் தான் என நிகழ்ச்சியை கொண்டு புரிந்து கொள்ள முடிகிறது .

நீர் மோர் பந்தல் வைக்க வேண்டும் என்றால் நிறைய மோர் வேண்டும். அதற்கு நிறைய பால் வேண்டும். தினமும் இதை தர வேண்டும் என்றால் வீட்டில் பசு மாடு இருக்க வேண்டும். அதிக அளவில் பொருள் செலவு செய்து வாங்குவது இயலானது மட்டும் அல்ல. பொதுவாக அந்தணர்கள் உணவை விலை கொடுத்து வாங்க மாட்டார்கள்.  என்ற ஒழுக்க நிலை குறிப்பையும் எடுத்துக் கொள்ள வேண்டும். 

தன் மகன், அப்பர் சுவாமிகளுக்கு, விருந்து படைக்க  வீட்டில் வாழை இலை பறிக்கும் போது  மரணம் அடைகிறான் என்பதால் வீட்டில் பசு மாடு மட்டும் அல்ல பெரிய தோட்டமும் இருந்து இருக்க வேண்டும். அங்கே வாழை மரம் இருந்து இருக்க வேண்டும். அத்துடன் காய்கறி பயிர்களும் இருந்து இருக்க வேண்டும். 

பொதுவாக அன்றைய நாளில் அந்தணர் குடும்பங்களில் விலை கொடுத்து உணவு பொருட்களை வாங்க மாட்டார்கள் என்ற ஒழுக்க நிலையை மீண்டும் நினைவில் பதிய வைத்துக் கொள்ள வேண்டும். 

சரி. இந்த அடிப்படை குறிப்புகளை வைத்துக் கொண்டு, இப்போ பெரிய புராணத்தில் உள்ள, திரு நின்ற சருக்கம் பகுதியில் உள்ள (12-31) அப்பூதி அடிகளார் புராணத்திற்குள் வரலாம்.  

சைவ ஒழுக்கத்தில் மாகேஸ்வர பூஜை எனும் அடியார்களுக்கு அமுது செய்வித்தல்  என்பது ஒரு அறமாக கொள்ளப் படுகிறது. 

இங்கே அப்பூதி அடிகளார் அப்பர் பெருமானை 

ஆசனத்தில் பூசனைகள்  
  அமர்வித்து விருப்பினுடன்
வாசம் நிறை திருநீற்றுக் காப்பு 
  ஏந்தி மனம் தழைப்பத்
தேசம் உய்ய வந்த வரைத் 
  திரு அமுது செய்விக்கும்
நேசம் உற விண்ணப்பம் செய 
  அவரும் அது நேர்ந்தார்.  12-31-21

ஆசனத்தில் அமர வைத்து பாத பூசை செய்து, திருநீற்று காப்பு ஏந்தி, அமுது செய்ய வேண்டும் என விண்ணப்பம் செய்கிறார். அப்பரும் அதற்கு சம்மதம் தெரிவிக்கிறார்.  இங்கே கவனிக்க வேண்டியது அப்பர் சுவாமிகள் வந்தது காலை முற்பகல் நேரம். முற்பகலில் உணவு அருந்தும் பழக்கம் உடைய அந்தணர் மரபில் தோன்றிய அப்பூதி அடிகளார் வேண்டுதல் வைக்கிறார். சரி விருந்தில் சமைக்கப்பட்ட உணவு என்ன  என்பது தானே ஆய்வு ..  தொடர்ந்து படியுங்கள். 

தூய நற் கறிகள் ஆன 
  அறுவகைச் சுவையால் ஆக்கி
ஆய இன் அமுதும் ஆக்கி 
  அமுது செய்து அருளத் தங்கள்
சேயவர் தம்மில் மூத்த 
  திருநாவுக்கு அரசை வாழை
மேய பொற் குருத்துக் கொண்டுவா 
  என விரைந்து விட்டார்.  23

இன்ன சமையல் என மெனு தரவில்லை. ஆனால் எல்லா குறிப்புகளையும் சேக்கிழார் பெருமான் நமக்கு சொல்லி இருப்பது தான் ஆய்வுக்கு அடித்தளம் இடுகிறது. 

இதில் வரும் தூய நற் கறிகள் அறு சுவையால் ஆக்கி  என சொல்வதால், இங்கு சேக்கிழார் "நாற்சுவை உண்டி" (நான்கு வகை உணவு முறைகள்) என்று குறிப்பிடுகிறார். தமிழ் மரபில் உணவு உட்கொள்ளும் முறைகள் நான்கு வகைப்படும்: 

1. உண்பன (சாதம் போன்ற மென்று உண்பவை)
2. தின்பன (வடை, பலகாரம் போன்ற கடித்துத் தின்பவை)
3. கொறிப்பன / நக்குவன (ஊறுகாய், பச்சடி போல நாவால் சுவைப்பவை)
4. பருகுவன (பாயசம், ரசம், மோர் போலப் பருகுபவை)

இந்த நான்கு வகையான உணவு தயாரிப்புகளுக்குள் தான் அறுசுவைகளும் (இனிப்பு, புளிப்பு, உவர்ப்பு, கார்ப்பு, கசப்பு, துவர்ப்பு) அடங்கியுள்ளன. எனவே, அப்பூதி அடிகள் இல்லத்தில் சமைக்கப்பட்டது அனைத்துச் சுவைகளும் நிறைந்த ஒரு முழுமையான விருந்து என்பது உறுதியாகிறது. மேலோட்டமாக பார்த்தால் ஓ.. தடபுடல் தான் என புரிந்து கொள்ளலாம்.  நாம் அதை அப்படியே விட்டு விடாமல், அது சரி.! அது என்ன உணவு என ஆய்வு செய்வோம். 

பெற்றோரின் ஆணைக்கு இணங்க அப்பூதி அடிகளார் மகன் தோட்டத்திற்கு சென்று வாழை இலை பறிக்க செல்கிறார். ஆக வாழை மரம் தோட்டத்தில் இருக்கிறது. அதனால் வாழை தரும் வாழைக்காய் கறி  அமுது அந்த மெனுவில் இருந்து இருக்க வேண்டும். இது துவர்ப்பு சுவை கொண்டது.  என்பதை மனதில் பதியுங்கள். 

திடீர் விருந்தாளி என்பதால் வீட்டில் உள்ள பொருட்களை வைத்து சமையல் செய்வதும், அன்றைய நாளில் அந்தணர் மரபில் பொதுவாக உணவு  பொருட்களை பணம் கொடுத்து வாங்க மாட்டார்கள். (பர அன்னம் என ஒதுக்கி விடுவார்கள்.)

நீர் மோர் பந்தல் அமைத்தவர் என்பதால், வீட்டில் மோர் அதிகமாக இருக்கும். அதனால், அந்த மெனுவில் மோர்க்குழம்பு இடம் பெற்று இருக்கும். 

சூடான சாதத்திற்கு காய்ச்சி உருக்கிய பசு நெய் கம கம வாசனையுடன் வந்து இருக்க வேண்டும்.  கூடவே கெட்டித் தயிரையும் மெனுவில் சேர்த்துக் கொள்ளுங்கள். 

இனிப்பு இல்லாத சாப்பாடா? வீட்டில் நிறைய பால் தரும் பசு மாடுகள் இருக்கிறது. பால் நிறைய இருக்கு. அப்போ பாலைக் கொண்டு செய்த இனிப்பு என்ன வாக இருக்கும். ஆம் அது திரட்டிப் பால் தான். அதை தான் செய்து இருக்க வேண்டும். அதையும் மெனுவில் சேர்த்துக் கொள்ளுங்கள். 

அப்பர் சுவாமிகள் திங்களூர் வந்த போது அது அது கோடை காலம் என்பதை புரிந்து கொள்ள முடிகிறது. எனவே தோட்டத்தில் இருந்து வேப்ப மரம்  பூ விடும் காலம் இந்த கோடை காலம் தான். அதனால் நெய்யில் வதக்கி சுவையாக இனிப்பு பச்சடி. வேப்பம்பூ பச்சடி செய்து இருக்க வேண்டும் (இது கசப்பு சுவைக்கு) என்பதை புரிந்து கொள்ள முடிகிறது. 

அப்பூதி அடிகளாரின் மகன் இறந்தது பகல் வேலையில், அதனால் கோடை காலத்தில் பாம்புகள் நிழலை தேடி குளிந்த இடத்தை நோக்கி இடம் பெயர்வது இயல்பானது தான். அதனால் வீட்டில் பாம்புகள் நடமாட்டம் இருக்கும் என இயற்கையாகவே பாம்புகளை விரட்டும் புடலங்காய் போன்ற காய்கறி வகைகளை பயிரிட்டு வைத்து இருப்பார்கள்.  இங்கே மெனுவில் சேர்க்க வேண்டியது புடலங்காய் தான். 

ஒரு குட்டி recap செய்து பார்க்கலாம். வரிசையாக வரும் வாழைக்காய், புடலங்காய், வேப்பம்பூ  திரட்டுப் பால், கெட்டி தயிர்  பசு நெய். சரி அடுத்து என்ன? என்ற உங்கள் ஆவல் புரிகிறது. 

இப்போ பாம்பு கடித்து அப்பூதி அடிகளாரின் மகன் இறந்து விடுகிறார். அந்த பாம்பு எங்கே கடித்தது. என்பதை சேக்கிழார் பதிவு செய்கிறார். 

கையினில் கவர்ந்து சுற்றிக் 
  கண் எரி காந்துகின்ற
பை அரா உதறி வீழ்த்துப் 
  பதைப்பு உடன் பாந்தள் பற்றும்
வெய்ய வேகத்தால் வீழா 
  முன்னம் வேகத்தால் எய்திக்
கொய்த இக் குருத்தைச் சென்று 
  கொடுப்பன் என்று ஓடி வந்தான்.  12-31-25

பாம்பு கடித்த வுடன் கையை உதறிவிட்டு என பதிவு செய்து இருப்பதால், அந்த பாம்பு கடித்தது உள்ளங்கையில் என்பதை புரிந்து கொள்ள முடிகிறது. 

நண்ணியதோர் அரவம் அதன் நச்சுவாய்ப் பல் அழுந்தக்
கண்ணிடைப்பட்டு எழுவேகம் கரம்கொண்டு துடைத்து எறிவான்..."12-31-29

என பதிவு செய்து இருப்பது இதை உறுதி செய்ய முடிகிறது.  

கடிது வந்து அமுது செய்யக் 
  காலம் தாழ்கின்றது என்றே
அடிசிலும் கறியும் எல்லாம் 
  அழகுற அணைய வைத்து 12-31-30

என பதிவு இருப்பதால் விரைவாக வந்து சாப்பிடுங்கள் என சொல்வதும், அடிசில், கறியும் அழகுற வைத்து என சொல்வதால், சாப்பாடு ஆறிவிடும் என்ற தாய்மார்களுக்கே உள்ள மனப்பாங்கை காண முடிகிறது.  

அப்பூதி அடிகளாரின் திரு மகனார் பாம்பு கடித்து இறந்து, அப்பர் சுவாமிகள் பதிகம் பாடி அவரை மீட்டு தந்தது என தோராயாமாக சிந்தித்தால் சுமார் 2 மணி நேரம் ஆகி இருக்கலாம். அதுவரை உணவு சூடாக இருக்குமா? மறுபடியும் சமைக்க தொடங்கினால், கால தாமதம் ஆகும் சமைத்த உணவுகளும் வீணாகும். அதனால் இந்த குறிப்பில் இருந்து நாம் தெரிந்து கொள்ள வேண்டியது இது தான். 

பண்டைய நாட்களில் அந்தணர் குடும்பங்களில் , வெண்கல பாத்திரத்தில் தான் சமைப்பார்கள், கல் சட்டியில் தான் சமைப்பார்கள். ஈய சொம்பில் தான் ரசம் போல வைப்பார்கள் இது ஆரோக்கியத்திற்கு மட்டும் அல்ல நீண்ட நேரம் சூட்டை தாங்கி நிற்கும்.  

மீண்டும் சூடு செய்யும் பழக்கமோ, இப்போதுள்ள caseroll போன்ற நவீன மயமோ அப்போது இருந்திருக்க வாய்ப்பில்லை என்பதால் இந்த ஆய்வு சிந்தனை.  இந்த குறிப்பை பெரியபுராணம் பதிவு செய்ய வில்லை என்றால் அவர்கள் வாழ்க்கை முறையைக்கொண்டு நம்மால் அறிந்து கொள்ள முடிகிறது. 

ஊறுகாய் இல்லாத சாப்பாடா? இங்கே வருவது மாங்காய் ஊறுகாய் தான். மாங்காய் பற்றிய குறிப்புகள் எதுவும் பெரியபுராணத்தில் இல்லை எனினும் கோடை காலத்தில் தான் மாம்பிஞ்சு மாங்காய் என வரும். எனவே, இந்த மெனுவில் விவதாதம் இல்லாமல் நாம் சேர்க்க வேண்டியது மாங்காய் ஊறுகாய். 

ஆக இந்த மெனுவில் வர வேண்டியவைகள் 

• பருப்பு பாயசம் 
• திரட்டிப் பால் 
• வாழைக்காய் பொரியல் 
• புடலங்காய் கூட்டு 
• கத்திரிக்காய் கூட்டு 
• கத்திரிக்காய் மோர்குழம்பு 
• சுண்டைக்காய் வற்றல் குழம்பு 
• வேப்பம்பூ இனிப்பு பச்சடி 
• வாழைத்தண்டு தயிர் பச்சடி 
• குழைத்து வடித்த சாதம் 
• பசு நெய் 
• கெட்டித் தயிர் 
• கதலி வாழைப்பழம் (இலைக்கு)
• சாப்பிட்ட பிறகு அருந்த நீர் மோர் 

என இந்த உணவு மெனுவை சிந்தித்துப் பாருங்கள். பொருந்த வருவதை பார்க்கலாம். 

அட போங்க சார். மாகேஸ்வர பூஜையில் சாப்பிட்டார் என சொல்லி விட்டு போகங்களேன். எதற்கு இவ்வளவு பெரிய பட்டியல் என சிந்திக்காமல் இது தான் நால்வகை உணவு அறுசுவை உணவு என்ற பதிவினை ஆதாராமாக கொண்டு அன்றைய சூழலை மனதில் வைத்துக் கொண்டு இப்படி ஒரு உணவு மெனுவை தயார் செய்வதன் நோக்கம். அவசர விருந்துக்கு எப்படி எல்லாம் சமைக்க முடியும் என இன்றைய இளைய சமூதாயம் தெரிந்து கொள்ள வேண்டும். swiggy zomotto வில் ஆர்டர் செய்து சாப்பிடும் பழக்கத்தை மாற்றி ஆரோக்கியமான வாழ்வுக்கு வளம் சேர்ப்போம்.