அடியார் பெருமை - கணம் புல்லர்

அடியார் பெருமை

கணம்புல்லர் நாயனார்

 

தகவல் பலகை	விவரம்
குலம்	செங்குந்தர்
நாடு	சோழ நாடு
ஊர்	இருக்கு வேலூர்
மாதம்	கார்த்திகை
குருபூஜை நட்சத்திரம்	கார்த்திகை
பிற அடியாருடன்	விவரங்கள்  இல்லை
திருத்தொண்டு	தலைமுடியைக் கொண்டு விளக்கு  ஏற்றியவர்.
இடம்பெற்ற திருமுறை	12.54

              வடவெள்ளாற்றின் தென்கரையிலே அமைந்துள்ள, இருக்குவேளூர் என்னும் தலத்திலே, வாழ்ந்துவந்த பெருங்குடிமக்களுக்கெல்லாம் ஒப்பற்ற தலைவராய் வாழ்ந்தவர் "கணம்புல்லர்" என்னும் சிவனருட்செல்வர். இத்தவசீலர் திருசடைநாதர் எழுந்தருளியிருக்கும் கோயில்களுக்கு நெய்விளக்குஏற்றும் நற்பணியை நாள்தோறும் தவறாமல் செய்து வந்தார். கோயில்களுக்கு ஒளிஏற்றுவதால் இருளடைந்த மானிடப்பிறவி என்னும் அஞ்ஞானஇருள்நீங்கி, அருளுடைய ஞான இன்பவீட்டை அடைய, வழி பிறக்கும் என்பதனை உணர்ந்தார்.

        

        இவ்வாறு நற்பணி செய்துவந்த நாயனாருக்குச் செல்வம் குறைந்து வறுமை வளரத்தொடங்கியது. அந்த நிலையிலும் திருவிளக்கு ஏற்றும் பணியைத் தவறாமல் செய்து வந்தார்.இந்த நிலையில் நாயனார் தாம் வாழ்ந்த இருக்குவேளூரில் வறியராய்இருக்க விரும்பவில்லை. தம்மிடம் உள்ள நிலபுலன்களை விற்று ஓரளவு பணத்தோடு சிவயாத்திரையை மேற்கொள்ளவேண்டி ஊரைவிட்டே புறப்பட்டார். ஊர்ஊராகச் சென்று கோயில்தோறும் நெய் விளக்கு ஏற்றியவாறு தில்லையை வந்து அடைந்து,  எம் பெருமானைப் பணிந்து பேரின்பம் பூண்டார். தில்லைப்பதியை விட்டுச்செல்ல மனமில்லாத அடிகளார், அவ்வூரில் தனியாக வீடுஎடுத்து வசிக்கல் ஆனார்.

        

        அடியார் அவ்வூரில் தங்கியிருந்து பெருமானை உளம்குழைந்து உருகிப்போற்றி விளக்கேற்றும் திருப்பணியை மேற்கொள்ளலானர். திருப்புலீச்சரம் என்னும் சிவன்கோயிலுக்கு விளக்கேற்றும் பணியை மேற்கொண்ட சமயம் அடியார் வறுமையால் வாடினார். ஊராரிடம்இரப்பதற்கு அஞ்சிய நிலையில் உடல்உழைப்பினால் செல்வம் சேர்க்கக் கருதினார். அதற்கான கணம்புல்லை அரிந்து, அவற்றை விற்று பணமாக்கி நெய்வாங்கி விளக்கேற்றி வந்தார்.

    

                 எம்பெருமான் சோதனையால் கணம்புல்லும் விற்பனையாகவில்லை. இதனால் இடர்பட்ட நாயனார், கணம்புல்லையே திரித்து அழகிய விளக்காக எரித்தார். அவை எரியாமல் சீக்கிரமே அணைந்துவிட்டது. கணம்புல்லநாயனார், அன்புருகும் சிந்தனையுடன், என்புருக, அத்திருவிளக்கில் தமது திருமுடியினைவைத்து இன்பம் பெருக "நமச்சிவாய" என்று சொல்லி விளக்காக எரிக்கத் தொடங்கினார். திருப்புலீச்சரத்து மணிகண்டப்பெருமான் ரிஷபவாகனத்தில் பேரின்பகாட்சி கொடுத்து, சிவலோகப்பதவியை அளித்து அருளினார்.