அடியார் பெருமை - குங்கிலிய கலயனார்

  

குங்குலிய கலய நாயனார் 

தகவல் பலகை	விவரம்
நாயனார்	குங்கலிய கலையர்
குலம்	அந்தணர்
அவதார தலம்	திருக்கடவூர்
முத்தி தலம்	திருக்கடவூர்
குரு பூஜை மாதம்-நட்சத்திரம்	ஆவணி   - மூலம்
திருத்தொண்டு	எம்பெருமானுக்கு குங்கிலியம் இட்டு பேறு பெற்றவர்
இடம்பெற்ற திருமுறை	12.10
திருத்தொண்டர் தொகை	கடவூரில் கலயன் தன் அடியார்க்கும் அடியேன்

சீவமலி திருக்கடவூர்க் கலய னாராந்
திகழ்மறையோர் பணிவறுமை சிதையா முன்னே
தாலியைநெற் கொளவென்று வாங்கிக்கொண்டு
சங்கையில்குங் குலியத்தாற் சார்ந்த செல்வர்
ஞாலநிகழ் திருப்பனந்தா ணாதர் நேரே
நரபதியுந் தொழக்கச்சா னயந்து போதப்
பாலமுத முண்டாரு மரசு மெய்திப்
பரிந்தமுது செயவருள்சேர் பான்மை யாரே.

சோழ மண்டலத்தில் உள்ள திருக்கடவூரில், பிராமண குலத்தில் பிறந்தவர் கலயனார். இவர் சிறந்த சிவபக்தர்.

திருக்கடவூர் வீரட்டேஸ்வரர் திருக்கோயிலில் வீற்றிருக்கும் பரமசிவனுக்கு, இவர் தினந்தோறும் குங்குலியத் தூபம் இட்டு சேவை செய்து வந்தார்.

அப்போது, எம்பெருமானின் திருவருளால் அவருக்குக் கடும் வறுமை வந்தது. வறுமை வந்தபோதிலும், எம்பிரானுக்குத் தினமும் குங்குலிய தூபம் இடும் திருத்தொண்டை அவர் சிறிதும் தவறாமல் செய்து வந்தார்.

வறுமை அதிகமானதால், தன்னுடைய நிலங்களையும் செல்வங்களையும் விற்றுச் செலவழித்தார். இதனால் அவருடைய குடும்பத்தினரும் சுற்றத்தார்களும் மிகவும் வருந்தினார்கள்.

ஒருநாள், வீட்டில் அரிசி வாங்கக்கூட வழி இல்லாமல், இரண்டு நாட்களாகப் பட்டினியால் வாடிய தன் குழந்தைகளையும் சுற்றத்தாரையும் பார்த்தார் மனைவியார். மனம் இரங்கிய அவர், தன் தாலியைக் கழற்றி நாயனாரின் கையில் கொடுத்து, "இதைக் கொடுத்து நெல் வாங்கி வாருங்கள்" என்று கூறினார்.

குங்குலியக் கலய நாயனார் அந்தத் தாலியை வாங்கிக்கொண்டு நெல் வாங்குவதற்காகப் புறப்பட்டார்.

வழியில் ஒரு வணிகன் குங்குலியப் பொதியோடு அவருக்கு எதிரே வருவதைக் கண்டார். அதைப் பார்த்ததும் மனமகிழ்ந்து, "இறைவனுக்குத் தூபம் இட குங்குலியம் கிடைத்துவிட்டது! இதைவிட மேலான பேறு வேறு என்ன இருக்கிறது?" என்று எண்ணினார்.

உடனே, தன் கையில் இருந்த தாலியைக் கொடுத்து அந்தக் குங்குலியப் பொதியை வாங்கிக்கொண்டார். நேராகக் கோயிலுக்கு விரைந்து சென்று, அங்கிருந்த பண்டாரத்தில் குங்குலியத்தை வைத்துவிட்டு, இறைவனைத் துதித்தபடியே அங்கேயே தங்கிவிட்டார்.

அவர் கோயிலில் இருக்க, வீட்டில் அவருடைய மனைவியும் குழந்தைகளும் பசியால் வாடி, அன்றைய இரவில் தளர்ந்து உறங்கினார்கள்.

அப்போது, கருணைக் கடலாகிய இறைவன், அந்த வீடு முழுவதும் பொற்குவியலும், நெற்குவியலும், பிற செல்வங்களும் நிறையும்படி அருள் செய்தார். மேலும், மனைவியாரின் கனவில் தோன்றி அநுக்கிரகமும் செய்தார்.

உடனே அவர் விழித்தெழுந்து, வீட்டில் நிறைந்திருந்த செல்வத்தைக் கண்டு வியந்து, எம்பெருமானை வணங்கினார். பின்னர், தன் கணவராகிய குங்குலியக் கலய நாயனாருக்கு உணவளிக்க ஆயத்தமானார்.

அதேநேரத்தில், கிருபாநிதியாகிய பரமசிவன் கலய நாயனாருக்குத் தோன்றி, "நீ மிகவும் பசியோடு இருக்கிறாய். உன் வீட்டிற்குச் சென்று பாலும் அன்னமும் உண்டு உன் துன்பத்தைப் போக்கிக் கொள்" என்று அருளினார்.

நாயனார் இறைவனை வழைகூப்பி வணங்கி, அவரது கட்டளையைத் தலைய doற்றுக்கொண்டு வீட்டிற்குப் புறப்பட்டார்.

வீட்டுக்குள் நுழைந்த நாயனார், வீடு முழுவதும் நிறைந்திருந்த நிதிக்குவைகளைக் கண்டு வியந்தார். மனைவியைப் பார்த்து, "இந்தச் செல்வங்கள் எல்லாம் எப்படி வந்தன?" என்று கேட்டார்.

அதற்கு அவர், "எம்பெருமானுடைய திருவருளால் வந்தன" என்றார்.

அதைக் கேட்ட நாயனார், "ஒன்றுக்கும் பற்றாத எளியேனை ஆட்கொள்ள, எம்பிரானின் கருணை இப்படிப்பட்டதா!" என்று இறைவனை மீண்டும் வணங்கினார்.

மனைவியார் விரைவாகத் தன் கணவரையும், சிவனடியாிகளையும் உபசரித்து, அமுதளித்தார்.

நாயனார் இறைவனின் திருவருளால் பெரும் செல்வந்தரானார். தொடர்ந்து சிவனடியார்களுக்குத் தயிர், நெய், பாலுடன் அமுதளித்துத் தொண்டு செய்து வந்தார்.

இப்படி இருக்கும் காலத்தில், திருப்பனந்தாள் என்னும் தலத்தில் உள்ள சிவலிங்கம் சாய்ந்திருந்தது. அதை நிமிர்த்தி வழிபாடு செய்ய விரும்பிய மன்னன், தன் படைகளையும் யானைகளையும் கொண்டு கயிறு கட்டி இழுக்கச் செய்தான்.

எவ்வளவு முயன்றும் சிவலிங்கம் நிமிரவில்லை. இதனால் மன்னன் மிகுந்த கவலையடைந்தான்.

இந்தச் செய்தியைக் கேள்விப்பட்ட குங்குலியக் கலய நாயனார், சுவாமி தரிசனம் செய்வதற்காகத் திருப்பனந்தாளை அடைந்தார்.

அங்கே மன்னனும், சேனைகளும், யானைகளும் சிவலிங்கத்தை நிமிர்த்த முடியாமல் இளைத்துப் போய் விழுந்து கிடப்பதைக் கண்டார். மனம் வருந்திய நாயனார், "அடியேனும் இந்தத் திருப்பணியைச் செய்ய வேண்டும்" என்று விரும்பினார்.

சிவலிங்கத்தில் கட்டப்பட்டிருந்த கயிற்றின் மறுமுனையைத் தன் கழுத்தில் கட்டிக்கொண்டு, முழு பலத்தோடு இழுத்தார்.

உடனே சிவலிங்கம் நேராக நிமிர்ந்தது!

அது அவர் புறத்தே கயிற்றால் கட்டி இழுத்ததால் அல்ல; அகத்தில் கட்டிய அன்புக் கயிற்றினால் ஆகும்!

இதைக் கண்ட அரசனும் சேனைகளும் அளவற்ற மகிழ்ச்சி அடைந்தனர். மன்னன் நாயனாரை வணங்கி, பல திருப்பணிகளைச் செய்துவிட்டுத் தன் நகருக்குச் சென்றான்.

பின்னர், அந்தத் தலத்திற்கு எழுந்தருளிய திருஞானசம்பந்தமூர்த்தி நாயனாரையும், திருநாவுக்கரசு நாயனாரையும் எதிர்கொண்டு அழைத்தார் கலயனார். அவர்களைத் தன் வீட்டிற்கு அழைத்துச் சென்று உபசரித்து, அமுதளித்து, அவர்களின் திருவருளையும் எம்பெருமானின் திருவருளையும் பெற்றார்.

மேலும் சிலகாலம் அன்பு மேலோங்கப் பல சிவத்தொாண்டுகளைச் செய்து, இறுதியில் சிவபதம் அடைந்தார்.

 

"நண்ணிய ஒருமை அன்பின் நார் உறு பாசத்தாலே 
திண்ணிய தொண்டர் கூடி இளைத்த பின் திறம்பி நிற்க 
ஒண்ணுமோ கலயனார்தம் ஒருப்பாடு கண்டபோதே 
அண்ணலார் நேரே நின்றார் அமரரும் விசும்பில் ஆர்த்தார்"

"அளவிடமுடியாத அடியார் பெருமை "

புத்தகம் பற்றிய உங்கள் எண்ணக் கருத்துக்களை இங்கே பகிர்ந்து கொள்ளலாம்

GIVE FEEDBACK