10 வகை ஆன்மாக்கள்

ஆன்மாக்கள் 10 வகையாக பிரித்து தரப்படுள்ளது. 

உயிர்கள் முத்திறப்படும்  அவை விஞ்ஞானகலர், பிரளயாகலர், சகலர் என மூன்று  வகைப்படும்.  இதில்,  ஆன்மாக்கள் 10 வகைப்படுவர் என திருமந்திரம் 493 கூறுகிறது .

அவையாவன:

விஞ்ஞானகலர் நான்கு வகைப்படும்

1. ஆணவமலத்தில் அழுந்தாமல் நிற்பர் 
2. அட்ட வித்தியேசுர பதவி, சப்த கோடி மகா மந்திர தலைவர் போன்ற பதவிகளை பெற்றவர் 
3. ஞானம் முதிரப் பெற்றவர் 
4. ஞான முதிர்ச்சி காரணமாக ஆணவமல மறைப்பு பெரிதும் நீங்கப் பெற்ற முத்தர் 

பிரளாயகளர் மூன்று வகைப்படும் 

1. சுத்த வித்தையில் நின்று அசுத்த மாயா புவனங்களைக் காவல் செய்பவர்
2. குணா தத்துவத்தில் நின்று பிரகிருதி மாயா புவனங்களைக் காவல் செய்பவர் 
3. அபக்குவராய் இருக்கும் பெத்தர்.

சகலர் வகை மூன்று வகைப்படும்

1. சீவன் முத்தர்: இவர்கள் சிவத்தை பெற்று முத்தர் ஆயினும், சிவனாணையால் சீவனாக இருப்பவர்கள் 
2. சாதகர்: இவர்கள் சிவம் ஆவதற்கு முயல்பவர் ஆயினும் மல மயக்கத்தை முற்றுமாய்க் கழிக்க முடியாமல் அதனைக் கழித்தல் பொருட்டு முயல்வர்கள்
3. அபக்குவர்: மூன்று மலங்களையும் வலி ஒடுங்கமாட்டாதவராய்ச் சூக்கும உடலில் நின்று உலக ஆரவாரத்தின் நடுவே உள்ளவர் 

ஆக பத்து வகை ஆன்மாக்கள் என்பதை அறிக. 

விஞ்ஞானகலர் ஆன்மாவாவகவே இருந்தாலும், ஆணவ மல மறைப்பு நீங்கப் பெற்றால் மட்டும் தான் மெய்ஞானம் கிட்டும், அதன்வழி,  வீடு பேறு பெறமுடியும் .

ஞானம் பெற்ற நிலையிலும், அது முதிராத போது, பரமுத்தி கிட்டாது.  அதனால் விஞ்ஞானகலர் ஆன்மாக்கள் அனைவரும் பரமுத்தி பெற்றவர் அல்லர் என்பதை புரிந்து கொள்ள வேண்டும். 

பக்குவ ஆன்மாக்கள் முத்தி எய்துதற்கு உரிய வழியை அறிவர். சிவாலயத்தையும், சிவனடியார்களையும் வழிபடுவர். குருநாதரை சிவன் எனக் கொள்வர்  உலகியல் பொருளில் நாட்டம் கொள்ளாமல், ஞானத்தில் இச்சை மிகுதியால் அமைதியாக இருப்பர். சித்தாந்த செந்நெறியில் நாட்டம் மிகும். சத்துவ குணமே ஓங்கி நிற்கும்.  சிவ நாமத்தையே எப்போதும் சிந்தித்துக் கொண்டு, இந்த வகையான நிலைகள் படிப்படியாக வளர்வது, ஆன்மா பக்குவ நிலையை அடைவதைக் குறிக்கும்.  இந்த நிலையில், இந்த உணர்வுகள் இல்லாதவர்களும் பக்குவம் இல்லாதவர்கள். அவர்கள் அபக்குவ ஆன்மாக்கள்.