ஞானக் குறள் - 28. ஞானம் பிரியாமை

௨௮ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	தன்பால்
அதிகாரம்	28. ஞானம் பிரியாமை
தொடர்புடைய சிந்தனை	திரு மந்திரம் மௌன நிலை வாசி யோகம்

யோக ரகசியங்களை விளக்கும்

ஔவையின் ஞானப் பொக்கிஷம்.

💡 ஞானக்குறள் - இருபத்தி எட்டாவது பத்து (ஞானம் பிரியாமை)

பிறந்திட மாலிடம் பேராது இருப்பின்

இறந்திடம் வன்னி யிடம். 271

உந்திக் கமலமாகிய மணிபூரகத்தில் யோகப் பயிற்சியால் அகத்தீயைத் (வன்னி) திறக்காவிடில், மீண்டும் பிறப்பு நேரிடும்.

சாகாது இருந்த தலமே மவுனம் அது

ஏகாந்தமாக இரு. 272

மரணத்தைத் தடுக்கும் ஆற்றல் மௌனமாகிய நாபிக் கமலத்தில் உள்ளது; அங்கே சிந்தை ஒருமித்து ஏகாந்தமாக நிலைபெறு.

வெளியில் விளைந்த விளைவின் கனிதான்

ஒளியில் ஒளியாய் உறும். 273

அண்ட வெளியில் உருவான அந்தப் பரம்பொருள், மூலாக்கினியில் கலந்து ஆன்ம ஒளியோடு ஒளியாய் ஒன்றி நிற்கும்.

மறவா நினையா மவுனத்தில் இருக்கில்

பிறவார் இறவார் பினை. 274

நினைப்பு மறப்பற்ற சுத்த மௌன நிலையில் ஞானவினை ஆற்றுபவர்களுக்கு மீண்டும் பிறப்போ இறப்போ கிடையாது.

குருவாம் பரநந்தி கூடல் குறித்து ஆங்கு

இருபோது நீங்காது இரு. 275

குருவாகிய பரநந்தியை அகத்தே கூடும் பொருட்டு, மௌன நிலையில் ஒருபோதும் நீங்காது நிலைத்திரு.

சுந்தரச் சோதி துலங்கும் இடம் அது

மந்திரச் சக்கரமும் ஆம். 276

மௌனத்தில் இருந்து தியானிப்பவர்களுக்கு அழகிய ஞானச் சோதி வெளிப்படும்; அதுவே மந்திரங்களின் வடிவமான சிவம்.

தூராதி தூரம் சொல்லத் தொலையாது

பாராப் பராபரம் பார். 277

உணராதவருக்கு எட்டாத தூரத்தில் இருக்கும் பராபரம், ஞானக் கண்ணால் காண்பவருக்கு மிக அருகிலேயே விளங்கும்.

ஈர் ஒளி ஈது என்று இறைவன் உரைத்தனன்

நீர் ஒளி மீது நிலை. 278

உயிர்ப்புக் காற்றின் இயக்கத்தில் தோன்றும் மௌன ஒளியே உண்மையானது என இறைவன் உணர்த்தியுள்ளான்.

---

திருமந்திரச் சிந்தனை:

"மேலொளி கீழதன் மேவிய மாருதம்
பாரொளி யங்கி பரந்தொளி யாகாசம்
நீரொளி செய்து நெடுவிசும் பொன்றிலும்
மேலொளி யைந்து மொருங்கொளி யாமே."

அந்தமும் ஆதியும் இல்லா வரும்பொருள்

சுந்தர ஞானச் சுடர். 279

ஆதி அந்தம் இல்லாத அந்த அரும்பொருளை ஞானச் சுடராகக் கருத்தில் கொண்டால் பேரானந்தம் நிலைக்கும்.

இதுமுத்தி சாதனம் என்று ஏட்டில் வரைந்து

பதிவைத்தனன் குரு பார். 280

இதுவே முத்திக்கு வழி என்பதை நம் சிரசாகிய கபாலக் குகையில் இறைவன் பதித்து வைத்துள்ளான்; அதை உணர்ந்து பார்.