ஞானக் குறள் - 29. மெய் நெறி

௨௯ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	தன்பால்
அதிகாரம்	29. மெய்நெறி
தொடர்புடைய சிந்தனை	திரு மந்திரம் அட்டமா சித்தி முக்கால அறிவு

யோக சித்தியின் ஆற்றலை விளக்கும்

மெய்ஞ்ஞானப் பாதை.

💡 ஞானக்குறள் - இருபத்தி ஒன்பதாவது பத்து (மெய்நெறி)

செல்லல் நிகழல் வருங்காலம் மூன்றினையும்

சொல்லும் மவுனத் தொழில். 281

மௌன நிலையில் நின்று புரியும் ஞானவினையானது, கடந்த காலம், நிகழ்காலம், வருங்காலம் ஆகிய மூன்றையும் அறியும் ஆற்றலைத் தரும்.

---

திருமந்திரச் சிந்தனை:

"விளங்கிடும் வாயுவை மேல் எழ உன்னி...
வணங்கிடு மண்டலம் வாய்த்திடக் கும்பிச்
சுணங்கிட நின்று அவை சொல்லலும் ஆமே."

பஞ்சில் படுபொறி போலப் பரந்து இருந்து

துஞ்சாது ஞானச் சுடர். 282

பஞ்சில் பட்ட நெருப்புப் பொறி மிகவேகமாகப் பரவுவது போல, மெய்யறிவான ஞானச் சுடர் எங்கும் வியாபித்துத் தடையின்றி ஒளிவீசும்.

இமைப்பில் பரந்தங் கொடுங்கு மின்போல்

நமக்குள் சிவன்செயல் நாடு. 283

கண் இமைக்கும் நேரத்தில் தோன்றி மறையும் மின்னலைப் போல, இறைவனின் செயலும் நம்முள்ளே சூக்குமமாகத் தோன்றி மறைவதை உணர்ந்து நாடு.

குவித்து மனத்தைக் குவித்துஉள்ளே ஓங்கில்

செவித்துப் பெறுவது எவன். 284

சிதறிப் போகும் மனத்தை ஒருமுகப்படுத்தி, கலைகளை மேலேற்றி நிற்பதே ஒருவன் பெற வேண்டிய மிக உயரிய பேறாகும்.

காலுந் தலையும் ஒன்றாகக் கலந்து இடம்

நாலா நிலை என நாடு. 285

மூச்சுக் காற்றும் (கால்) பிரணவ உச்சியும் (தலை) ஒன்றாகக் கலக்கும் அந்த இடமே துரிய நிலை எனப்படும் நான்காம் நிலையாகும்.

---

திருமந்திரச் சிந்தனை:

"துரிய மிருப்பதுஞ் சாக்கிரத் துள்ளே...
பரிய புரவியும் பாறிப் பறந்தது
துரிய மிறந்திடஞ் சொல்லவொண் ணாதே."

மூல நிலமிசை மூன்றா நிலத்தினில்

ஆல மருந்தும் சிவம். 286

மூலாதாரத்தில் இருந்து எழும் உயிர்ப்பினை நடுநாடி வழியாக உச்சிக்குச் செலுத்தினால், அங்கு மரணமில்லாப் பெருவாழ்வு தரும் சிவத்தைக் காணலாம்.

எழுஞ் சுடர் உச்சியின் மேன்மனம் வைக்கத்

தொழில் ஒன்று இலாத சுடர். 287

எழும் ஞானச் சுடரைச் சிரத்தின் உச்சியில் நிலைநிறுத்தி மனம் அசைவற்று இருந்தால், அது புறத்தொழில்கள் அற்ற பேரொளியாய் விளங்கும்.

அடைத்திட்ட வாசலின் மேன்மனம் வைத்துப்

படைத்தவன் தன்னையே பார். 288

புலன் வாசல்களை ஒடுக்கி, மனத்தை ஒரு புள்ளியில் நிறுத்தி, உன்னைப் படைத்த அந்தப் பரம்பொருளை உனக்குள்ளேயே தரிசிப்பாயாக.

அறுபதொடு ஆறு வருடம் இதனை

உறுதி அதாக உணர். 289

கலைகளையும் தந்திரங்களையும் முறையாகக் கற்று ஒரு வருட காலம் திடமான மனத்துடன் பயிற்சி செய்வதை உறுதி என உணர்.

அட்டமா சித்தி அடையும் ஓர் ஆண்டினில்

இட்டம் இதனைத் தெளி. 290

இத்தந்திரங்களை உணர்ந்து முறையாகச் செயல்பட்டால், ஓராண்டு காலத்திலேயே அட்டமா சித்திகளும் ஒருவனுக்குக் கைகூடும் என்பது தெளிவு.