ஆத்திச்சூடி - 7

௨

ஒளவையார் அருளிச்செய்த

ஆத்திச்சூடி

தகவல் பலகை	விவரம்
நூல் பெயர்	ஆத்திச்சூடி
நூல் ஆசிரியர்	ஒளவையார்
காலம்	12ம் நூற்றாண்டுக்கு முன்

---

71. நூல் பல கல்

அச்சுப் புத்தகமோ மின் புத்தகமோ படிக்க வேண்டும். அறிவு வளர்ச்சிக்கு மட்டுமல்ல ஆரோக்கியத்திற்காகவும் நூல் பல கற்க வேண்டும்.

72. நெற்பயிர் விளை

மக்களுக்குப் பொதுவான நெற்பயிரை விளையச் செய்ய வேண்டும். "நான் தான் செய்ய வேண்டும்" என்பதை விட உழவுத் தொழில் செய்பவர்களைப் போற்ற வேண்டும்.

73. நேர்பட ஒழுகு

ஒழுக்கம் தவறாமல் நேர்வழியில் செயல்பட வேண்டும். சமரசம் செய்து கொள்ள வேண்டும் என்பதற்காக ஒழுக்கத்தையும் நேர்மையையும் ஒரு போதும் விட்டுவிடக் கூடாது.

74. நைவினை நுகரேல்

பிறர் வருந்தும்படியான எந்தச் செயல்களையும் செய்யக் கூடாது. அது தீய செயலாக இருந்தால் நிச்சயம் செய்யவே கூடாது.

75. நொய்ய உரையேல்

பயனுடைய சொற்களை மட்டுமே பேச வேண்டும். பயன் இல்லாதவற்றைப் பற்றி எப்போதுமே பேசக் கூடாது.

76. நோய்க்கு இடம் கொடேல்

உடல் நலம் காக்கத் தூய்மையான உணவையும் கட்டுப்பாடான பழக்கவழக்கங்களையும் மேற்கொள்ள வேண்டும்; நோய்கள் வராமல் உடலைப் பேண வேண்டும்.

77. பழிப்பன பகரேல்

இன்றைய சூழலில் சமூக வலையில் ஒரு தகவல் வந்தால், பழிக்கும் செய்தியாக இருந்தாலும் பயமில்லாமல் பகிர்கிறார்கள். சான்றோர்களால் பழிக்கப்படுபவற்றை நாம் பகிரக் கூடாது.

78. பாம்போடு பழகேல்

கொடிய குணம் கொண்டவர்களுடன் நட்பு பாராட்டிப் பழகக் கூடாது.

79. பிழைபடச் சொல்லேல்

பேசிய பிறகு "நான் அந்த அர்த்தத்தில் சொல்லவில்லை" எனச் சொல்வது சிலருக்கு வழக்கம். ஆனால் பேசுவதற்கு முன்பே சிந்தித்துக் குற்றம் உண்டாகாதவாறு பேச வேண்டும்.

80. பீடு பெற நில்

ஒவ்வொரு நிலையிலும் வாழ்க்கைத்தரத்தை உயர்த்திக் கொள்ள வேண்டும். அது பெருமைப்படும் படியாக இருக்க வேண்டும்.

-----