அடியார் பெருமை - அமர்நீதி நாயனார்

 

அடியார் பெருமை

அமர்நீதி நாயனார்

தகவல் பலகை	விவரம்
குலம்	வணிகர்
நாடு	சோழ நாடு
ஊர்	பழயாறை
மாதம்	ஆனி
குரு பூஜை நட்சத்திரம்	பூரம்
பிற அடியாருடன்	விவரங்கள்  இல்லை
திருத்தொண்டு	சிவணடியார்களுக்கு கோவணம் தந்து பணி செய்தார்
இடம்பெற்ற திருமுறை	12:13
சோதிட குறிப்புகள்	விவரங்கள்  இல்லை

               

அமர்நீதி நாயனர் சோழநாட்டிலே பழையாறை என்னும் பழமையான பகுதியிலே வாழ்ந்தவர். வணிகத்தால் பெரும் பொருள் தேடிச் செல்வந்தராய் விளங்கிய இவர் சிவனடியார்க்குப் பணிசெய்வதையே தனது தொண்டாகக் கொண்டிருந்தார். சிவனடியார்க்கு திருவமுது அளித்தல், கீழ்கோவணம் அளித்தல் ஆகிய திருத்தொண்டுகளைச் செய்துவந்தார். சிவனடியார்களுக்குத் திருவமுது கொடுப்பதற்காகத் திருநல்லூரில் மடம் நிறுவினார். திருவிழாக்காலங்களில் தம் சுற்றத்தவரோடு தங்கியிருந்து அடியார்களுக்கு திருவமுது, உடை, கோவணம் என்பன அளித்து மகிழ்ந்தார்.

  அன்பர் பணி செய்யும் அமர்நீதியாருக்குச் ஆலவாய் அண்ணல் அருள் புரியத் திருவுளங்கொண்டார். அவர் ஒரு நாள் அந்தணர் குலத்து பிரம்மச்சாரியாக கோலங்கொண்டு, கையில் இருகோவணம் முடிந்த ஒரு தண்டுடன் கோவண ஆடையுடன் திருநல்லூரில் உள்ள அமர்நீதியார் மடத்தை அடைந்தார்.

  அவரைக் மன மகிழ்ச்சியுடன் உபசரித்து மகிழ்ந்தார்  பிரம்மச்சாரியார் அமர்நீதியாரின் வேண்டுகோளுக்கு இசைந்து காவிரியில் நீராடச் சென்றார். செல்லும் பொழுது மழை வரினும் வரும் எனக்கூறித் தமது தண்டில் கட்டி இருந்த கோவணம் ஒன்றை அவிழ்த்து அமர்நீதியாரிடம் கொடுத்து அதனைப் பக்குவமாக வைத்திருக்கும்படி கூறினார். அமர்நீதியாரும் அதனைத் தனியாக ஓர் இடத்தில் சேமித்து வைத்தார். மறையவராக வந்தவர் தந்த கோவணத்தை வாங்கி தாம் அடியவர்களுக்குக் கொடுப்பதற்கென வைத்திருக்கும் கீழ்உடை, கோவணம் எனும் இவற்றை வைத்திருக்கும் இடத்திலன்றிப் பாதுகாப்பான இடத்தை எண்ணி, அவ்விடத்தில் அதனைக்காவல் பொருந்திய தொரு தனியிடத்தில் வைத்தார்.

  சிவனடியார் கோவணத்தை மறையும்படி செய்து மழையில் நனைந்தவராய் மடத்திற்கு வந்தார். தாம் கொடுத்து வைத்த கோவணத்தை கொண்டு வருமாறு கூறினார். தொண்டர்தம் அன்பு எனும் தூய நீரினில் ஆட விரும்பி, அவரை நோக்கிச் செறிவும் குளிர்ச்சியும் மிக்க நீரில் ஆடி வந்ததால், ஈரமுடைய கோவணத்தை மாற்றுதற்குத் தண்டின் மேல் உள்ளதும் ஈரமாகிய கோவணம் ஆதலின், நான் தந்த கோவணத்தைக் கொண்டு வருவீராக என்றுரைத்தார் கோவணக் கள்வர்.

  கோவணம் கொண்டுவரச் சென்ற தொண்டர் வைத்த இடத்தில் காணாது திகைத்தார். பிற இடங்களில் தேடிப்பார்த்தும் கிடைக்கவில்லை. பின்னர் பிறிதொரு கோவணத்தை எடுத்துக்கொண்டு பிரமச்சாரியிடம் வந்தார். அடிகளே!, தாங்கள் தந்த கோவணத்தை வைத்த இடத்தில் காணவில்லை. அது மறைந்ததோ பெரும் மாயமாக உள்ளது. இது வேறு ஒரு புதிய  கோவணம்.  நனைந்த கோவணத்தை களைந்து இதனை அணிந்து அடியேனது குற்றத்தைப் பொறுத்து அருளுங்கள் என வேண்டினார்.

  இதனைக் கேட்ட சிவனடியார் சீறிச் சினந்தார். தாம் செய்த பிழைக்கு பொன், பொருள் தருவதாக அமர்நீதியார் விண்ணப்பம் செய்தார். சினம் தனிந்தவராய், தண்டில் கட்டியிருந்த கோவணத்தினை அவிழ்த்து எடுத்து, `இக் கோவணத்திற்கு ஒத்த எடையுடைய கோவணத்தை இடுவீராக` என்று தனது கோவணத்தை தராசில் இட்டார்.

  அதனை ஏற்றுக்கொண்ட அமர்நீதியார்,அதற்கு ஈடாகத் தம்மிடமிருந்த புதிய கோவணத்தை மற்றொரு தட்டில் வைத்தபொழுது அது நிறை போதாமையால் மேலெழுந்தது. தாம் அடியார்களுக்குக் கொடுத்தற் பொருட்டு வைத்திருந்த கோவணங்கள் அனைத்தையும் ஒவ்வொன்றாக இட்டார். அப்பொழுதும் அன்பரது தட்டு சம நிலை அடையவில்லை. அந்நிலையில் அமர்நீதியார், தம்மிடம் உள்ள பொன், வெள்ளி, நவமணித் திரள் முதலிய அரும்பொருள்களையும் இட்டார்.

  இந்நிலைமையை நோக்கிய ஒப்பற்றவராகிய நாயனார், மறையவர் முன் நேர்நின்று, கெடுதல் இல்லாத பல்வகைச் செல்வங்களையும் ஒன்று கூட விடாமல் தட்டில் வைத்துள்ளேன்; என்னுயிர்த் தலைவ! யானும் என், மனைவி, மகனோடு தட்டில் அமர்கிறோம். அடிமையாக வைத்துக் கொள்ளுங்கள். என்றார்.

  அடியாராக வந்த இறைவர், திருநல்லூரிற் பொருந்திய அம்மையப்பராகிய திருக்கோலத்தை அமர்நீதியாருக்குக் காட்டிய ஆட்கொண்டு அருளினார். 

      

மின் புத்தகத்தை பெற click செய்யவும்