நஞ்சு உண்டவர் உயிருடன் இருக்க முடியுமா?!

 

        நஞ்சு உண்ட ஒருவர் நலமுடன் மீள்வது சாத்தியமா என்றால் இல்லை என்பதே பதிலாக இருக்கும். அப்படி இருக்க அப்பர் சுவாமிகளுக்கு நஞ்சு தருகின்றனர். அதை அருந்தி உயிருடன் மாறுபாடு இல்லாமல் இருந்தார் என்பது இறைவனின் திருக்கருணை என்பதில் எள்ளளவும் ஐயம் இல்லை எனினும்.. இதை அறிவியல் கண் கொண்டு கண்டு சொல்ல முடியுமா?

புத்தகத்தை பெற click செய்யுங்கள்.

        பன்னெடுங்காலமாக சைவத்தை விட்டு விலகி சமணத்தை சார்ந்து இருந்த மருள்நீக்கியாரை இறைவன் சூலை நோய் கொடுத்து ஆட்கொண்டான்.. இறைவனின் அருட் பெரும் கருணையை மனதில் எண்ணி, சமணத்தை நீங்கி மீண்டும் சைவத்தை சார்ந்தார் திருநாவுக்கரசர்.

        சைவத்தை சார்ந்த அப்பர் பெருமானை சமணர்கள் விடுவதாக இல்லை, அவரை எப்படியாவது ஒழித்துக் கட்டி விட வேண்டும் என்ற கருத்தில், சமண சமய பயிற்சியினால் தருமசேனர் உயிர் பெற்று வந்ததாகவே சொல்லி நாவுக்கரசரை விட்டபாடு இல்லாது அப் பெருமகனாருக்கு விஷம் கொடுக்க சதி செய்தனர் சமணர் கள். விஷம் உண்டவரால் மீண்டும் உயிர் பெற்று வர இயலுமா என்றால் முடியாது என்பது தான் பொதுவான பதிலாக இருக்கும்.

        ஆனால் இங்கே அப்பர் பெருமான் விஷம் உண்ட பிறகும் நலமுடன் உயிர் பெற்று எழுந்து வந்தார் என்பது சேக்கிழார் பெருமான் பெரியபுராணத்தில் பதிவு செய்து உள்ளார் என்பதை கண்ணுறும் போது இது எப்படி சாத்தியமாக இருக்க முடியும் என்ற ஐயம் நம் மனதில் எழாமல் இருக்க முடியாது.

        அதை அறிவியல் கண் கொண்டு சிந்தித்து அதை நியாயப் படுத்துவது தான் இந்த தலைப்பில் நாம் சொல்ல வரும் கருத்து. 

        கண்ணோட்டம் நிறைந்த அப்பர் பெருமானின், திருப்போளிவுத் திறனை சேக்கிழார் பெருமான் குறிப்பிடுகையில், 

நைந்து உருகிப் பாடுவது போல அன்பு நீர் பொலிகன் 

(பெரியபுராணம் 1405)

என்றும்

 “வந்து இழி கண்ணீர் மழையும்”

(பெரியபுராணம் : 2168)

என்றும் குறிப்பிட்டு உள்ளார். கண்ணோட்டம் மிகுந்து இருந்தமையால் சமணர்கள் கொடுத்த விஷத்தை உண்டு அமைந்தார். இதனை வள்ளுவம், 

பெயக்கண்டும் நஞ்சு உண்டு அமைவர் 

நயத்தக்கநாகரிகம் வேண்டுபவர்.

(திருக்குறள்:580)

        என குறிப்பிடுகிறது. கருணை உள்ளமும் பண்பாடும் உள்ளவர்கள்  தம்முடன் பழகியவர்கள் நஞ்சு கொடுத்தாலும் அதை அருந்தி களிப்பு அடைவார்கள் என்று வள்ளுவம் சொல்கிறது என்றால் அப்பர் பெருமான் அவர்கள் தந்த விஷத்தை அருந்தி இருப்பதில் வியப்பு தான் இருக்குமா? அதனால் சமணர்கள் தந்த நஞ்சினை உண்டார். 

        இங்கே சிந்தனைக்கு வரும் சிந்தனை இது தான் - விஷம் உண்டு ஒருவரால் உயிருடன் மீண்டும் வருவது சாத்தியமா? அப்படி உயிருடன் வருவது இறையருள் தான் என்றாலும் அதை அறிவியல் சிந்தனையுடன் ஒப்பிட்டு சொல்வது தான் இன்றைய அறிவியல் உலகில் அது ஏற்புடையதாக இருக்கலாம் என இப்படி சொல்கிறோம்.

             சைவத்தில் தோன்றிய அப்பர் பெருமான் அமன் சமயம் புகுந்து, பின் இறைவன் திருவருளால் சூலை நோய் தந்து ஆட்கொள்ளப்பட்டு மீண்டும் சைவம் தழைக்க சமணத்தில் இருந்து மீண்டு வந்தவர். 

     அப் பெருமகனார், விஷம் உண்டு உயிருடன் மீண்டு வருவது இயற்க்கைக்கு மாறான செயல் அல்ல என்பது போன்ற அறிவியல் சிந்தனையை பக்தி இலக்கியம் படம் பிடித்து காட்டுவதற்கு தான் இந்த சிந்தனை.உடலில் உள்ள மற்ற இயக்கங்கள் எவ்வித மாற்றத்தினையும் ஏற்படுத்தவில்லை என்றால் அது சம நிலை, என்று அறிவியலார் குறிப்பிடுவர். 

    இங்கே இந்த அடிப்படையில் சிந்தித்தால், சைவத்தில் உரப்பு கொண்டு நிற்கும் அப்பர் பெருமான், மும்மலம் மலம் நீங்கி, இருவினை ஒப்பு நிரம்ப பெற்றவர். இந்த சம நிலையினை அப்பர் பெருமான் அடைந்தமையால், சமணர்கள் தந்த விஷம் கலந்த பால் சோறு அவரை ஒன்றும் செய்யவில்லை.

    எந்த ஒரு வேதியல் மாற்றத்திற்கும் தன்னை மாறுபடுத்திக் கொள்ளாமல், தான் இருந்த நிலையில் இருந்து மாறாமல் இருப்பதுவே கிரியா உக்கி என்ற அறிவியல் கூற்றுப்படி நாவுக்கரசு சுவாமிகள் முன் இருந்தபடியே எவ்வித மாற்றமும் இல்லாது இருந்தார் என சேக்கிழார் பெருமானும், 

அவ்விடத்தை ஆண்ட அரசு அமுது செய்து முன்னிருப்ப எவ்விடமும் அமுதாயிற்று என" 

(பெரியபுராணம்”1415)

என குறிப்பிடுவதில் இருந்து இவ்வறிவியல் உண்மையினை எடுத்துச் சொல்லவும் வேண்டுமோ?