3. திருஉந்தியார்

௨ திருவியலூர் உய்ய வந்த தேவ நாயனார் அருளிச்செய்த

திரு உந்தியார்

தகவல் பலகை	விவரம்
நூல் பெயர்	திருஉந்தியார்
நூல் ஆசிரியர்	திருவியலூர் உய்ய வந்த தேவநாயனார்
காலம்	12ம் நூற்றாண்டு

திருவாசகத்தில் வரும் தாழிசைப் பாடல்கள் போல 45 பாடல்களால் அமைந்தன.

உந்தீபற = உம்+தீ+பற என உம்முடைய தீவினைகள் பறந்து விடுவதாக அமைந்துள்ளது.

💡 உபதேசம் - பாடல்கள் 12-18

மூலை இருந்தாரை முற்றத்தே விட்டவர்

சாலப் பெரியார் என்று உந்தீபற

தவத்தில் தலைவர் என்று உந்தீபற 12

தொடர்பு கொண்டு இருந்தாலும் தொடர்பு இல்லாமல் இருந்தாலும் கடவுள் எனும் நுண் பொருள் இருக்கும். அதை உணர்ந்து கொள்வதே கடவுள் தன்மையது ஆகும்.

ஓட்டு அற்று நின்ற உணர்வு பதிமட்டித்

தேட்டு அற்ற டாம் சிவம் உந்தீபற

தேடும் இடம் அது அன்று உந்தீபற 13

தேடினால் இறைவன் கிடைக்க மாட்டான். பற்று நீங்கி நிற்கும் உணர்வில் பதியாகிய இறைவனை சிந்தித்து இருப்பதே அவனிருக்கும் இடம். "நினைப்பவர் மானத்துள்ளான்" என்பது அப்பர் வாக்கு.

கிடந்த கிழவியைக் கிள்ளி எழுப்பி

உடந்தை உடனே நின்று உந்தீபற

உன்னையே கண்டது என்று உந்தீபற 14

ஆணவ மலப்பற்று கொண்டு இருப்பதால் திருவருள் வெளிப்படாமல் இருக்கிறது. ஞான ஆசிரியர் உயிரின் அறியாமையை போக்கியதும், திருவருளை காணும் ஆர்வம் ஏற்படுகிறது. தற்போதம் அடங்கிய நிலையில் சிவம் வெளிப்பட்டு தம் பால் ஈர்த்துக் கொள்கிறது.

பற்றை அறுப்பது ஓர் பற்றினைப் பற்றில், அப்

பற்றை அறுப்பர் என்று உந்தீபற

பாவிக்க வாரார் என்று உந்தீபற 15

எதையாவது பற்றி நிற்கும் உயிர், எனது என்ற புறப்பற்றினை அறுக்க திருவருள் பற்றினை பற்றிக் கொள்வது ஒன்றே வழியாகும்.

உழவாது உணர்கின்ற யோகிகள் ஒன்றோடும்

தழுவாமல் நிற்பர் என்று உந்தீபற

தாழ்மணி நாவேபோல் உந்தீபற 16

உலக பொருள்களில் பற்று வைக்காமல் எதனையும் திருவருள் கண் கொண்டே உணரப் பெற்று இருப்பார்கள் சீவன் முத்தர்கள். திருவருள் துணையின்றி, கருவி கரணங்களால் இறைவனை அடைய முடியாது.

திருச்சிலம்பு ஓசை ஒலி வழியே சென்று

நிறுத்தனைக் கும்பிடு என்று உந்தீபற

நேர்பட அங்கே நின்று உந்தீபற 17

அல்லும் பகலும் அயராது புரியும் திருநடனத்தின் சிலம்பு ஓசை திருவடியை பற்றி நிற்பவர்களுக்கு அகச்செவியில் கேட்கும். புலன் வழியே சிந்தனையை செலுத்தாமல் சிவத்தோடு ஒன்றி இருந்து வழிபடுமின்.

மருளும் தெருளும் மறக்கும் அவன்கண்

அருளை மறவாதே உந்தீபற

அதுவே இங்கு உள்ளது என்று உந்தீபற 18

மயக்கம், நினைவு பெற்று தெளிவது என கருதுவதே திருவருளை மறந்து செயல்படுவனவே ஆகும். திருவருளை எப்போதும் மறவாது பற்றி இருக்க வேண்டும் அதுவே நமக்கு துணை.