திரு உந்தியார் கேள்வி தாள்

💡 கேள்வி பதில்கள் - திரு உந்தியார்`

🙋 கடவுளை அறிய முடியுமா?

• உருவம், 
• அருவம், 
• அருவுருவம் 

என்ற மூவகை நிலைகளுக்கு அப்பாற்பட்டு, 

• எண் குண வடிவினன் ஆக, 
• முழு நிறைவுடைய பொருளாக இருப்பவன் இறைவன். 

உயிர்கள் மீது கொண்ட கருணையினால், பக்குவமுடைய ஆன்மாக்களுக்கு அவனே தன்னை காட்டினால் அன்றி, அவனை அறிய முடியாது .

🙋‍♀️ சிவம் வெளிப்பட்டு தோன்றும் முறைமை யாது?

• வேறு எதையும் எண்ணாமல், 
• எதன் மீதும் பற்றுக் கொண்டு இருக்காமல், 
• திருவருளின் வழியிலேயே 

நாம் நிற்கப் பழகிவிட்டால், நமக்கு என்று ஒரு கருத்து இருக்காது. எல்லாம் சிவன் அருள் என்னும் உணர்வு தலைப்பட, தம்முள் இருக்கும் தன் முனைப்பு தானே நம்மை விட்டு விலகும். 

        அந்நிலையில், ஆன்மாவின் அறிவு, இச்சை(விருப்பம்), செயல்,  அழிந்து இறைவன் கண் தொழிற்படும். அது சமயம் இறை உணர்வு நமக்குள் பாய்வது புலனாகும். 

            அப்போதும், சிவபெருமானை நினைப்பதற்கு முன்பே அவன் வெளிப்பட்டு நிற்பன்.  "இமைப்பொழுதும் என் நெஞ்சில் நீங்காதான் தாள் வாழ்க" என்ற மாணிக்கவாசகர் வரிகளை நினைவு கூர்தல் நல்லது  

🙋‍♂️ இந்த மெய்ப்பொருளை கூடுதற்கு ஒரு உபாயம் சொல்ல முடியுமா?

பல முறைகள் உண்டு என்றாலும் இந்த உபாயத்தை குறித்துக் கொள்ளுங்கள். அது தான் மூச்சுப் பயிற்சி. 

அட்டாங்க யோகத்தில் வரும் மூச்சுப் பயிற்சி என்னும் பிராணாயாமம். மூச்சை இழுப்பதும் விடுவதும் இயல்பாக நடக்கிறது என விட்டு விடாமல் அதனை பயிற்சி செய்து முறைப்படுத்தி ஒழுகினால், சிந்தனை தெளிவு படும். 

முதலில் அந்த பயிற்சி செய்து சிந்தனையை ஒருமுகப் படுத்தி தெளிவு படுத்திக் கொள்ள வேண்டும். இந்த பயிற்சியின் போது, சிந்தனையை அலைய விடாமல், இறைவனுடைய திருவடியிலேயே அழுந்தி நிற்க பழக வேண்டும். 

வெளியே விடும் மூச்சும் உள்ளே இழுக்கும் மூச்சும் சம நிலையில் இருக்க வேண்டும் என்பதை இயல்பான நிலையில் புரிந்து கொள்வது நல்லது. 

பொதுவாக, மன உளைச்சலில் இருப்பவர்கள் பதற்றத்தில் இருப்பவர்கள் எதையாவது ஒன்றைப் பற்றி கவலைப்பட்டு கொண்டு இருப்பவர்கள் இவர்கள் எல்லாம் உள்ளே இழுக்கும் மூச்சை விட வெளியே விடும் மூச்சு அதிகமாக இருக்கும். 

இதில் பலவகையான பயிற்சி முறைகள் இருக்கிறது. அதனால் அவரவர் மன நிலை, உடல் நிலை இவைகளை கொண்டு, இதனை முறையாக அனுபவம் வாய்ந்த யோக பயிற்சியாளர்களிடம் இருந்து கற்றுக் கொள்வது நல்லது.

நமது வகுப்பில் திருமந்திரம் வகுப்பில் விரிவாக சொல்லப் பட்டு இருக்கிறது. 

🧏 சிவானுபவம் ஏற்படும் விதத்தை எப்படி அறிந்து கொள்வது?

நமது சைவ வழிபாட்டு நெறிகளில் நான்கு வகை இருக்கிறது. ஒவ்வொரு செயல் முறைக்கும் ஒரு குறிப்புகளுடன் செய்யக் கூடிய இந்த முறை, 

• சரியை, 
• கிரியை 
• யோகம் 
• ஞானம் 

என்பன ஆகும். 

• சரியை : சிவனடியார்களை உபசரித்தல், அடியார் பெரு மக்களுக்கு வேண்டியன செய்தல், கோயில்களில் உழவாரப் பணி செய்தல், போன்றவை சரியை நெறிக்கு உதாரணங்கள். 

•  கிரியை : முறையாக ஞான குருவின் மூலம் உபதேச மந்திரங் களைக் கற்றுக் கொண்டு, ஆன்மார்த்த மற்றும் பரார்த்த பூசை கள் செய்தல். இதில் சடங்குகள், மந்திரங்கள், தந்திரங்கள் அடங்கும். 

•  யோகம்: தியானம், பிராணாயாமம் போன்ற அட்டாங்க பயிற்சிகளின் மூலம் மனதை ஒருமுகப்படுத்தி, இறை சக்தியுடன் இணைவது 

•  ஞானம்: ஆழ்ந்த பக்தி மற்றும் தியானத்தால் கிடைக்கும் தூய மெய் ஞானத்தின் மூலம் இறைவனின் உண்மை நிலையை உணர்தல். 

 சரியை, கிரியை இந்த இருவகை வழிபாடும் நாம் செய்கிறோம் என்ற இந்த உணர்வோடு செய்வது. இது ஏகதேச உணர்வு எனப்படும்.

உள்ளும் புறமும் சிவமே நிறைந்தள்ளது என்ற வியாபக உணர்வுடன் செய்து வந்தால், சிவானுபவம் ஏற்படும். 

நந்தி நாமம்  "நமச்சிவாய" எனும் 
சந்தையால் தமிழ் ஞானசம் பந்தன் சொல் 
சிந்தையால் மகிழ்ந்து ஏத்த வல்லார் எலாம் 
பந்த பாசம்  அறுக்க வல் லார்களே.  (3:049:11)

என்பது திருஞானசம்பந்தர் வாக்கு. .

🙋‍♂️ ஆன்மா சிவம் ஆதல் கூடுமோ?

ஆன்மாவை சிவம் ஆக்கி சிவானந்தத்தை அனுபவிக்கச் செய்வது திருவருளே. அந்த திருவருள் மட்டுமே, ஐந்தொழில் ஆற்றுகின்றது. ஆனால் சிவானந்தம் பெறும் ஆன்மா ஐந்தொழில் ஆற்றுவதில்லை. அது என்றும் சிவ பெருமானுக்கு அடிமையே ஆகும். 

கேவலத்தில் (பிறப்புக்கு முந்தைய நிலை) இருக்கும் போதும் சரி, சகலத்தில் (மலத்தோடு கூடி தனுகரண புவன போகங்களை அனுபவிக்கும் நிலை) இருக்கும் போதும் சரி, முத்தி நிலையிலும் உயிர்களுக்கு அருளிப்பாடுகளை செய்பவன் சிவபெருமான் ஒருவனே. உயிர்கள் என்றும் சிவத்திற்கு அடிமையே. உயிர்கள் என்றும்  சிவம் ஆகாது.