வழிபாட்டின் பயன் -2

💚 பதில்களை பெற கேள்வியை click செய்யவும்; 💚

🤔. முத்தி என்பது யாது?

முத்தி என்பது உயிர் பிறவிக்கு வராத நிலையைப் பெறுவது ஆகும். இதனை வீடுபேறு என்று கூறுவார். பாசத்தை விடுத்து சிவத்தைப் பெறுவதே வீடு பேறு. ஆணவ மலப்பற்றை அறவே நீங்கப் பெற்று, சிவமாம் தன்மை பெறுவது தான் முத்திப் பேறு. இதனை சிவஞான சித்தியார்,

காயம் ஒழிந்தால் சுத்தனாகி, ஆன்மாக்
காட்டக் கண்டிடும் தன்மை உடையான் கண்ணுக் கேயும் உயிர் காட்டிக் கண்டுடிமா போல
ஈசன் உயிர்க்கு கண்டு காட்டிடுவான் = சித்தி 310

🤔. முத்தி நிலையில் உயிர் எப்படி இருக்கும்.?

பிறப்புக்கு வருவதற்கு முன் உயிர் ஆணவமலத்தை மட்டுமே சார்ந்து அதன் தன்மை காரணமாக ஆனவத்தைப் போல இருளில் மூழ்கி இருந்தது என்பதை நாம் அறிவோம்.
அது போல பிறப்பு நீங்கிய நிலையில், உயிர் சிவபெருமானை மட்டுமே பற்றி, சார்ந்த அதன் சிறப்பு காரணமாக, சிவ பெருமானின் எண் குணத் தன்மை பெற்று சிவமே ஆக பேரானந்தத்தில் இருக்கும். இவ் உண்மையை சிவப் பிரகாசத்தில், உமாபதி சிவாச்சாரியார்,

ஒன்றி நின்று உணரும் உண்மைக்கு
உவமை ஆணவத்தோடு ஒன்றே - சிவபிரகா.87

என்று அருளிச் செய்துள்ளார்

🤔. முத்தி எத்தனை வகைப்படும்?

முத்தி நான்கு வகைப்படும். அவை:

• பத முத்தி,
• பர முத்தி,
• பத முத்தி
• சீவன் முத்தி

🤔. பத முத்தி என்பது யாது?

பத முத்தி என்பது

• சாலோக
• சாமீப
• சாரூப

என்ற இந்த நிலையில் எதையாவது ஒன்றை அடைவதைப் போல இருக்கும். மல வாசன காரணமாக மீண்டும் பிறவி வர வாய்ப்பு உண்டு.

🤔. அபர முத்தி என்பது யாது?

சூக்கும உடல் நீங்க பெற்ற நிலையில் உள்ள உயிர்கள் பத முத்தியில் இருந்தே அபர முத்தி நிலைக்கு செல்லும் நிலையை பெறுவது ஆகும். இந்நிலையில் உள்ள உயிர்கள் மீண்டும் பிரவிக்கு வராது.

🤔. பர முத்தி என்பது யாது?

பர முத்தி என்பது மீண்டும் பிறவாத நிலையை பெறுவது. இதனை சாயுச்சியம் என்பர். இந்த நிலையை அடைந்த உயிர்கள் மீண்டும் பிறவிக்கு வராது. மும்மலம் அறவே நீங்கிய நிலையில், உயிருக்கு உடல் இருக்காது.

🤔. சீவன் முத்தி என்பது யாது?

பத முத்தியில் இருந்த உயிர்கள் இவ்வுலகில் தோன்றி, உடம்பை பற்றிய உணர்வு இல்லாமல் இருப்பதால், சீவனோடு உலகில் இருக்கும் போதே பெற்றிருக்கும் முத்தி ஆகும்.

🤔. பத முத்திக்கும் பர முத்திக்கும் உள்ள வேறுபாடு யாது?

பர முத்தியில் ஆன்மாவுக்கு சூக்கும சரீரம் இருக்கும். இது தொடர்பான ஆணவ கன்மங்களும் இருக்கும்.
பதமுத்தி என்பது ஒரு பதவி போல என நினைத்துக் கொண்டால் சுலபமாக விளங்கும். அதனால் தான் மீண்டும் பிறவிக்கு வரும் நிலையம் வரலாம் என சொல்லப்படுகிறது.

🤔. முத்தி நிலையில் உயிர் சிவமாம் தன்மை பெறும் என்றால் உயிர்களும் ஐந்தொழில் ஆற்றுமா?

எதையாவது பற்றி நிற்பது தான் உயிரின் இயல்பு. கேவலத்தில் ஆணவத்தையும், சகலத்தில் மும்மலத்தையும், சுத்தத்தில், இறைவனை மட்டுமே பற்றி நிற்கும். ஏதேனும் ஒன்றை சார்ந்து இருக்கும் உயிர்க்கு சுதந்திரம் இல்லை. ஐந்தொழில் ஆற்ற சுதந்திரம் வேண்டும் அதனால் உயிர்கள் முத்தி நிலையிலும் ஐந்தொழில் ஆற்ற முடியாது. இதனை சிவஞான சித்தியாரில்,

உம்பர் பிரான் உற்பத்தியாதிகளுக்கு உரியன்
உயிர் தானும் சிவானுபவம் ஒன்றினுக்கு உரித்தே -சித்தி 319

என அருளிச் செய்துள்ளார்.

🤔. முத்தி நிலையில் ஆணவ மலம் என்ன ஆகும்.?

முத்தி நிலையில் உள்ள உயிருக்கு, சூக்கும சரீரம் மாயையில் ஒடுங்கி விடுகிறது. கன்ம மலம் இருவினை ஒப்பில் நீங்கி விடுகிறது. இந்நிலையில் முத்தி பெற்ற உயிர்கள், பேரானந்தத்தை அனுபவித்துக் கொண்டு இருக்கும். இந்த பேரானந்தத்தை அனுபவிப்பதால், வேறு எதையும் நோக்க முடியாத பெரு நிலையினை ஆணவ மல இருப்பே விளைவிக்கிறது.
இந்த உணர்வு நிலை சகல நிலையிலும் வருமானால், மலப்பற்று விலகி இறைப்பற்றில் ஆர்வம் மிகும் இதுவே முத்திப் பேறுக்கு துணை செய்யும். இவ்வுண்மையை, உண்மை விளக்கம் எனும் நூலில்,

இன்பம் கொடுத்தல் இறை;
இத்தை விளைவித்தல் மலம் - உண்மை விளக்கம்-50

என மனவாசம் கடந்தார் அருளிச் செய்துள்ளார்

🤔. எடுத்த இந்த பிறப்பிலேயே முத்தியைப் பெற்று விட முடியுமா?

நால் வகை நெறிகள் (சரியை, கிரியை, யோகம், ஞானம்) நின்று, இந்த பிறவியிலேயே முத்தி பெற முடியும், என சித்தாந்த சாத்திரத்தில் தெளிவு பட்டுள்ளது. இவ் உண்மையை சிவஞான சித்தியாரில்,

சித்தாந்தத் தேசிவன்தன் திருக்கடைக்கண் சேர்த்திச்    செனனம் ஒன்றிலே சீவன் முத்த ராக வைத்து ஆண்டு மலம் கழுவி ஞான வாரி மடுத்து ஆனந்தம் பொழிந்து வரும் பிறப்பை அறுத்து    முத்தாந்தப் பாதமலர்க் கீழ்வைப்பன் என்று    மொழிந்திடவும் உலகர் எல்லாம் மூர்க்க ராகிப்    பித்தாந்தப் பெரும்பிதற்றுப் பிதற்றிப் பாவப்    பெருங்குழியில் வீழ்ந்திடுவர் இது என்ன பிராந்தி. - சித்தி-268

என அருள் நந்தி சிவம் அருளிச் செய்துள்ளார்.

வழிபாட்டின் பயன்.

💚 பதில்களை பெற கேள்வியை click செய்யவும்; 💚

🤔. இறைவனை நால்வகை நெறிகள் கொண்டு வழிபாடு செய்கிறோம். இதனால் ஏதும் பயன் உண்டா?

ஒவ்வொரு வினைக்கும் ஒரு பயன் உண்டு என்ற அடிப்படையில் வழிபாடு செய்தால் அதற்கும் பயன் உண்டு. சரியை, கிரியை, யோகம், ஞானம் என்ற நால்வகை நெறிகளில் நின்று வழிபாடு செய்தால் அதற்குரிய பலன்கள் நிச்சயம் உண்டு.

🤔. சரியை நெறியில் நின்று வழிபாடு செய்தால் என்ன பயன் கிட்டும்.?

சரியை நெறி என சொல்லப்படும் தாச மார்க்கத்தில் நின்று வழிபாடு செய்தவர்கள், சாலோக பதவி கிடைக்கப் பெறுவார்கள்.

🤔. கிரியை நெறியில் நின்று வழிபாடு செய்தால் என்ன பயன் கிட்டும்.?

கிரியை நெறி என சொல்லப்படும் சற்புத்திர மார்க்கத்தில் நின்று வழிபாடு செய்தவர்கள், சாமீப பதவி கிடைக்கப் பெறுவார்கள்.

🤔. யோக நெறியில் நின்று வழிபாடு செய்தால் என்ன பயன் கிட்டும்.?

யோக நெறி என சொல்லப்படும் சக மார்க்கத்தில் நின்று வழிபாடு செய்தவர்கள், சாரூப பதவி கிடைக்கப் பெறுவார்கள்.

🤔. ஞான நெறியில் நின்று வழிபாடு செய்தால் என்ன பயன் கிட்டும்.?

ஞான நெறி என சொல்லப்படும் சன்மார்க்கத்தில் நின்று வழிபாடு செய்தவர்கள், சாயுச்சிய பதவி கிடைக்கப் பெறுவார்கள்.

🤔. இந்த நால்வகை பதவிகள் என்பது என்ன அது பற்றி சொல்லுங்கள் ஐயா?!

ஒரு செயல் செய்தால் அதற்குரிய வெகுமானம் கிடைக்கும். அது போல வழிபாடு செய்தால், அதற்குரிய வெகுமானம் தான் இந்த பதவி. இது சாலோக, சாமீப, சாரூப, சாயுச்சிய பதம்(பதவி) என்று சொல்லப்படும். இதனை முத்தி என்று என்றும் சொல்லுவார்கள். இவ்வுண்மையை சிவஞான சித்தியாரில்

சன்மார்க்க முத்திகள் சாலோக்கிய

சாம்மேப்பிய சாருப்பிய சாயுச்சியம்

என்று சதுர் விதமாம் - சித்தி 270

என்று அருள் நந்தி சிவாச்சாரியார் அருளிச் செய்து உள்ளார்.

🤔. சாலோக பதவி என்றால் என்ன? எளிமையாக புரிந்து கொள்ளும் படி சொல்லுங்கள் ஐயா?!

சரியை நெறியில் நின்று வழிபாடுகள் செய்தவர்கள் சிவலோகத்திற்கு சென்று அவ்வுலகத்தில் உள்ள போகங்களை அனுபவிப்பர்.

🤔. சாமீப பதவி என்றால் என்ன?

கிரியை நெறியில் நின்று வழிபாடுகள் செய்தவர்கள் சிவலோக போகத்தை அனுபவிப்பதோடு சிவ பெருமானுக்கு அருகில் இருக்கும் பேற்றை பெறுவார்கள்.

🤔. சாரூப சாமீப பதவி என்றால் என்ன?

யோக நெறியில் நின்று வழிபாடுகள் செய்தவர்கள் சிவ பெருமான் கொண்டுள்ள திருமேனிகளில் ஒன்றைப் பெற்று சிவலோகத்தில் நின்று ஆனந்தத்தை அனுபவிப்பார்கள். .

🤔. சாயுச்சியம் பதவி என்றால் என்ன?

ஞான நெறியில் நின்று வழிபாடுகள் செய்தவர்கள்சிவபெருமான் திருவடியில் இரண்டற நின்று நித்தியானந்தத்தை அனுபவித்து வாழ்வர்.

வழிபடும் முறை

💚 பதில்களை பெற கேள்வியை click செய்யவும்; 💚

🤔. இறைவனை வழிபடும் முறைகள் உள்ளதா? அவை யாவை? ?

இறைவனை வழிபட முறைகள் உள்ளது அதற்கு பெயர் நெறி என்பதாகும். இது நான்கு வகைப்படும். அவையாவன

• சரியை
• கிரியை
• யோகம்
• ஞானம்

🤔. சரியை என்றால் என்ன?

சரியை என்பது தாச மார்க்கம். (இறைவனை எஜமானராகவும், தன்னைத் தாசனாகவும்/அடிமையாகவும் கருதி வழிபடும் முறை). இது உடலால் வழிபடுவது. அதாவது, திருக்கோயில்களைத் தூய்மை செய்தல், மெழுகுதல், நந்தவனம் அமைத்தல், பூப்பறித்தல், மாலை தொடுத்தல் மற்றும் விளக்கு ஏற்றுதல் போன்ற உடல் சார்ந்த தொண்டுகள்.

🤔. கிரியை என்றால் என்ன?

கிரியை என்பது சற்புத்திர மார்க்கம். (இறைவனைத் தந்தையாகவும், தன்னை மகனாகவும் கருதி வழிபடும் முறை). திருமுறைகள்படனம் செய்வது, அஞ்செழுத்து ஓதுவது, சாத்திர தோத்திர கருத்துக்களை படிப்பது பிறருக்கு எடுத்துச் சொல்வது முதலியன.

🤔. யோகம் என்றால் என்ன?

யோகம் என்பது புறச் செயல்களைக் குறைத்து, அகத்திலே (மனதிற்குள்) இறைவனை நோக்கிச் செய்யும் தியான நெறியாகும். இது சக மார்க்கம் (இறைவனைத் தோழனாகவும், தன்னைத் தோழனாகவும் கருதி வழிபடும் முறை / தோழமை நெறி). வழிபடு தெய்வத்தை மனதில் வைத்து தியானிப்பது அக பூசை செய்வது. அஞ்செழுத்து மந்திரத்தை உள்ளத்தால், அக்குமாலை கொண்டு எண்ணுவது முறையான பயிற்சியினால் மூச்சைக் கட்டுபடுத்தி, புலன்களை அடக்கி மனதை ஒருமுகப்படுத்தி இறைவனைத் தியானித்தல். இது இயமம், நியமம் முதலான அட்டாங்க யோக வழிகளை உள்ளடக்கியது.

🤔. ஞானம் என்றால் என்ன?

ஞான நெறி - சன்மார்க்கம் (நன்னெறி அல்லது உண்மை நெறி). இறைவனுக்கும் ஆன்மாவுக்குமான உறவு தலைவன்-தலைவி உறவாகவோ அல்லது அறிவுப் பூர்வமான கலப்பாகவோ வெளிப்படும். மேலே சொன்ன சரியை, கிரியை, யோக நெறிகளில் முறைப்படி தவறாமல் நின்றால், இறைவன் ஞானத்தை உணர்த்துவான். அவ்வாறு உணர்த்தும் போது, குருனாதகனாக வந்து அல்லது மானுட சட்டை போர்த்தி வந்து உணர்த்துவான். எனவே குரு பீடத்தில் செங்கோல் ஓச்சி வரும் ஞானிகளை வழிபடுவது ஞான நெறியில் செய்யும் வழிபாடாகும்.

🤔. இத்தனை வழிபாடு நெறிமுறைகள் அவசியம் தானா ?

எல்லோருடைய மனமும் ஒரே மாதிரி இருப்பதில்லை. அவரவர் மன நிலை, கர்ம வினைகளுக்கு ஏற்ப விரும்பிய நெறிகளை மேற்கொள்ளலாம்.
இந்த படி நிலையில் பயிற்சி பெற்றால், இறையருள் தானே சித்திக்கும். மணம் வாக்கு காயங்களால் இறைவனை வழிபட வேண்டும் எனப்தற்காகவே இந்த மனித பிறவி நமக்கு கிடைத்துள்ளது. இவ்வுண்மையை சிவஞானசித்தியாரில்

மானுடப் பிறவி தானும்

வகுத்தது மனம், வாக்கு, காயம்

ஆன இடத்து ஐந்தும் ஆகும்

அறன் பணிக்காக அன்றோ -சித்தி 182

என்று அருள் நந்தி சிவாச்சாரியார் அருளி செய்து உள்ளார்.

மாயா மல இயல்பு

💚 பதில்களை பெற கேள்வியை click செய்யவும்; 💚

🤔. மாயா மலம் என்றால் என்ன? அதன் இயல்புகள் யாவை ?

பிரபஞ்சப் பொருட்கள் மற்றும் உடல், கரணங்கள் (மனம், புத்தி, சித்தம், அகங்காரம்) தோன்றுவதற்குக் காரணமான நுட்பமான மூலப்பொருள். உயிருக்கு உடலாக, உலகத்திற்கு போக பொருளாக விரியும் இறைவனுக்கு பரிக்கிரக (வைப்பு சத்தி) சத்தியாக உள்ளது. ஆணவ மலத்தின் இருளில் மூழ்கிக்கிடக்கும் ஆன்மாவுக்கு, சிறிதளவு அறிவையும் உலக அனுபவத்தையும் தந்து அதை உய்விக்கும் விளக்காகச் செயல்படுகிறது. அதனால், உலகம் உண்டாக அதுவே வித்தாக உள்ளது

🤔. மாயா மலத்தின் குணங்கள் யாவை?

மாயா மலத்தின் குணங்களாவன:

• நிலையான பொருள் எது . நிலையற்ற பொருள் எது என அறியயாது இருத்தல்.
• உண்மை அல்லாதவனவற்றை சொல்லுதல்.
• அறிந்த ஒன்றை மறந்து மயங்கி வருந்துதல்.
• இழிவான பொருள்களில் விருப்பம் கொள்ளுதல்.
• வளமாய் இருந்தும் கருமியாய் இருத்தல்.
• பிறரிடத்தில் பொறாமை கொள்ளுதல்.
• அஞ்ச வேண்டாதவற்றுக்கு அஞ்சுதல்.

🤔. என்னிடம் மாயா மலம் இருக்கிறதா என்பதை எப்படி தெரிந்து கொள்வது?

மேலே சொன்ன மாயா மலத்தின் குணகங்கள் ஒன்றோ, ஒன்றுக்கு மேலாகவோ உங்களிடம் இருந்தால் ஆணவ மலம் இருக்கிறது என்பது பொருள். இது எல்லோரிடமும் இருக்கும் அவரவர் நிலைக்கு ஏற்ப கூடவோ குறையவோ இருக்கும்.

🤔. இந்த மும்மலமும் என்னிடம் எவ்வளவு இருக்கிறது என graph போட்டு தெரிந்து கொள்ள முடியுமா? அதற்கு எளிய உத்தி எதுவும் இருக்கிறதா?

செய்யலாம். ஆனால் அது உறுதியானது அல்ல. சர்க்கரை நோயாளிக்கு உடலில் உள்ள சர்க்கரை அளவு மாறிக் கொண்டே இருக்கும். அது போல, இந்த பரிசோதனை முடிவு உறுதியானது அல்ல. நிலையானதும் இல்லை. மாறிக் கொண்டே இருக்கும். அதனால், தினமும் செய்ய முடியாதவர்கள். வாரம் அல்லது மாதம் ஒரு முறை சுய பரிசோதனை செய்து கொண்டே இருக்க வேண்டும். அந்த graph எப்படி செல்கிறது என்பதை வைத்து நம் நிலையை நாம் அறிந்து கொள்ள முடியும்.

இந்த பழக்கத்தை கை கொண்டு வருவதற்கு தான் தினமும் dairy எழுத சொல்லுவார்கள். அதை journalising என சொல்லுவார்கள்.. ஆனால் பலருக்கும் எழுதும் பழக்கம் குறைந்து விட்டது. digital dairy யில் ஆவது எழுதி வைக்க பழக வேண்டும். ஆடியோ journal ஆக வாவது பதிவு செய்து பாருங்கள்.. அளவீட்டுகளை நீங்களே தெரிந்து கொள்ள முடியும்.

கன்ம மல இயல்பு

💚 பதில்களை பெற கேள்வியை click செய்யவும்; 💚

🤔. கன்ம மலம் என்றால் என்ன? அதன் இயல்புகள் யாவை ?

"கன்ம மலம்" - ஆன்மா செய்யும் நல்வினை (புண்ணியம்) மற்றும் தீவினை (பாவம்) ஆகியவற்றின் தொகுப்பு. ஆணவ மலத்தின் மறைப்பால், மனிதன் "நான் செய்கிறேன்" என்ற எண்ணத்துடன் செயல்களைச் செய்வதால் இது வளர்கிறது. இந்த வினைகளே ஆன்மா அடுத்தடுத்த பிறவிகளை எடுப்பதற்கும், இன்ப துன்பங்களை அனுபவிப்பதற்கும் காரணமாக அமைகின்றன. இதுவே தொடர் நிகழ்வாக அமைந்து விடுகிறது. கன்மமலமும் அநாதியே

🤔. கன்ம மலத்தின் குணங்கள் யாவை?

கன்ம மலத்தின் குணங்களாவன:

• எந்த இடத்திலாவது சோம்பி இருத்தல் .
• நோய்வாய் பட்டு கிடத்தல்
• இருவினை இயற்றல்
• உலக பற்றை விடுத்தல்.
• பிறரை இகழ்ந்து பேசுதல்.
• இழிவானவற்றை விரும்பிச் செய்தல்.

🤔. என்னிடம் கன்ம மலம் இருக்கிறதா என்பதை எப்படி தெரிந்து கொள்வது?

மேலே சொன்ன ஆணவ மலத்தின் குணகங்கள் ஒன்றோ, ஒன்றுக்கு மேலாகவோ உங்களிடம் இருந்தால் ஆணவ மலம் இருக்கிறது என்பது பொருள். இது எல்லோரிடமும் இருக்கும் அவரவர் நிலைக்கு ஏற்ப கூடவோ குறையவோ இருக்கும்.

ஆணவ மல இயல்பு

💚 பதில்களை பெற கேள்வியை click செய்யவும்; 💚

🤔. ஆணவமலம் என்றால் என்ன? அதன் இயல்புகள் யாவை ?

உயிர்க்கு அறியாமையச் செய்வது எதுவோ, அதுவே ஆணவமலம். ஆணவ மலம் என்றும் உள்ள பொருள். உயிர் பிறப்புக்கு வருதற்கு முன்பும், வந்த பின்பும், அறிவை மறைக்கும். உயிர்கள்படும் துன்பத்திற்கு காரணம் ஆணவமலமே.

🤔. ஆணவமலத்தின் குணங்கள் யாவை?

ஆணவ மலத்தின் குணங்களாவன:

• பிறரிடமிருந்து தன்னை வேறுபடுத்தி நிற்றல்..
• தானே தன்னிடத்தில் இல்லாத தன்மைகளை கற்பனை செய்தல்
• உட்பகை கொள்ளுதல்
• எதிலும் ஆசை கொள்ளுதல் .
• பிற உயிர்களை வதைத்தல் .
• எப்போதும் கவலைபட்டுக் கொண்டு இருத்தல்.
• மனம் வாக்கு செயலால் செருக்குடன் இருத்தல்.
• பிறரையும் அவர்களது உடைமைகளையும் இகழ்ந்து தன்னை மெச்சுதல் .

🤔. என்னிடம் ஆணவ மலம் இருக்கிறதா என்பதை எப்படி தெரிந்து கொள்வது?

மேலே சொன்ன ஆணவ மலத்தின் குணகங்கள் ஒன்றோ, ஒன்றுக்கு மேலாகவோ உங்களிடம் இருந்தால் ஆணவ மலம் இருக்கிறது என்பது பொருள். இது எல்லோரிடமும் இருக்கும் அவரவர் நிலைக்கு ஏற்ப கூடவோ குறையவோ இருக்கும்.

அடிப்படை புரிதல் - இறை இயல்பு -3

💚 பதில்களை பெற கேள்வியை click செய்யவும்; 💚

🤔. இறைவன் எதற்காக வடிவம் கொள்கிறான்?

உயிர்களுக்கு அருளும் பொருட்டு.

🤔. இறைவன் எத்தனை வடிவங்கள் கொள்கிறான்.?

உயிர்களுக்கு அருளும் பொருட்டு இறைவன் மூன்று வகை வடிவங்கள் கொள்கிறான். அவை திருமேனிகள் எனப்படும்

🔸அருவத் திருமேனி

🔸அருவுருவத்திருமேனி

🔸உருவத்திருமேனி

🤔. அருவத் திருமேனியின் சிறப்பு யாது?

உருவம் இல்லாதது - அருவம்

தத்துவங்களை கடந்து நிற்பது

இவை நிட்கள திருமேனி (அவ்வியத்தலிங்கம்) எனப்படும்.

🤔. அருவுருவத் திருமேனியின் சிறப்பு யாது?

அருவுருவத்திருமேனி - சதாசிவம் எனப்படுகிறான். இதுவே அனைத்து சிவாலயங்களிலும் மூலவராக இருக்கும் லிங்கத் திருமேனியாகும்.

இதில், ஞான சத்தியும் கிரியா சத்தியும் ஒரே நிலையில் சீராக அமைந்துள்ளது இவை சகள நிட்கள திருமேனி (வியத்தாவியத்த லிங்கம்) எனப்படும்.

🤔. உருவத் திருமேனியின் சிறப்பு யாது?

உருவுருவத்திருமேனி - மகேஸ்வரன் எனப்படுகிறான் இது மறைத்தல் தொழிலை செய்யும் வடிவம் எனப்படுகிறது

இந்த உருவத் திருமேனிகள் 3 வகைப்படும். அவை

🔸யோக வடிவம்,
🔸போக வடிவம்,
🔸வேக வடிவம் எனப்படும்
இந்த மகேஸ்வர திருமேனிகள் 25 என ஆகமங்களில் சொல்லப்பட்டுள்ளது. இவை சகள திருமேனி (வியத்தலிங்கம்) எனப்படும்

🤔. மூவகை உருவத் திருமேனிகள் யாவை?

உருவத்திருமேனி, 3 வகைப்படும் அவை

🔹போக வடிவம்-உலக இன்பத்தை தரும் பொருட்டு மணக்கோலத்தில்
🔹யோக வடிவம்- ஞானத்தை வழங்கும் பொருட்டு ஆசிரியர் கோலத்தில்
🔹வேக வடிவம்-துன்பத்தை போக்கும் பொருட்டு போர்க்கோலத்தில்

🤔. இறைவன் கொள்ளும் திருமேனிகளை எவ்வாறு நினைவில் வைத்துக் கொள்வது?

.

இந்த படம் கழுகு பார்வையாக மனக்கண் முன் கொண்டு வந்து நிறுத்தும்.

அடிப்படை புரிதல் - பொது-4

💚 பதில்களை பெற கேள்வியை click செய்யவும்; 💚

🤔. சைவ சித்தாந்தம் என்னும் சொற்றொடருக்கு பொருள் யாது?

சிவ பெருமானைப் பற்றிய நிலையையும் சிவனடி சேர்தற்கு உரிய நெறியையும் குறிப்பது சைவ சித்தாந்தமாகும்.

🤔. சைவ சித்தாந்தக் சாத்திரம் என்பது யாது ?

சைவ சமயத்தின் கொள்கைகள் அனைத்தையும் கூறும் நூல்கள் சைவ சித்தாந்த சாத்திரம் எனப்படும். இவை "மெய்கண்ட சாத்திரங்கள்" எனவும் போற்றப்படுகிறது

🤔. சைவ சித்தாந்த சாத்திர நூல்கள் யாவை?

மெய்கண்ட சாத்திர நூல்கள் பதினான்கு. அவை 

• திருஉந்தியார், 
• திருக்களிற்றுப்படியார், 
• சிவஞான போதம், 
• சிவஞான சித்தியார், 
• இருபா இருபஃது, 
• உண்மை விளக்கம், 
• சிவப்பிரகாசம், 
• திருவருட்பயன், 
• வினா வெண்பா, 
• போற்றி பஃ(ற்)றொடை, 
• கொடிக்கவி, 
• நெஞ்சுவிடுதூது, 
• உண்மை நெறி விளக்கம், 
• சங்கற்ப நிராகரணம் என்பன ஆகும்.

🤔. சைவ சித்தாந்த சாத்திர நூல்களின் ஆசிரியர்கள் யார்?

மெய்கண்ட சாத்திர நூல்கள் பதினான்கு. அவற்றின் ஆசிரியர் வருமாறு: 

• திருஉந்தியார் - திருவியலூர் உய்ய வந்த தேவ நாயனார், 
• திருக்களிற்றுப்படியார்- திருக்கடவூர் உய்ய வந்த தேவ நாயனார், 
• சிவஞான போதம் - மெய்கண்ட தேவர், 
• அருள் நந்தி சிவாச்சாரியார அருளிய நூல்கள் இரண்டு அவையாவன
• சிவஞான சித்தியார்
• இருபா இருபஃது 
• உண்மை விளக்கம் - மணவாசங்கடந்தார், 
• உமாபதி சிவாச்சாரியார் அருளிய நூல்கள் எட்டு அவையாவன 
• சிவப்பிரகாசம், 
• திருவருட்பயன், 
• வினா வெண்பா, 
• போற்றி பஃறொடை, 
• கொடிக்கவி, 
• நெஞ்சுவிடுதூது, 
• உண்மை வெறி விளக்கம், 
• சங்கற்ப நிராகரணம் என்பன ஆகும்.

🤔. சைவ சித்தாந்தத்தின் சிறப்பு யாது?

சித்தாந்தம் என்னும் சொல் 'முடிந்த முடிவு' என்னும் பொருளை தரும். பல கோணங்களில் இருந்து ஆய்வு செய்யபட்டுத் தருக்க நூல் அடிப்படையில் நிறுவப்பட்ட முடிவு என்பது இதற்கு பொருளாகும்.

🤔. சித்தாந்தம் என்னும் சொல்லுக்குப் பொருள் யாது?

இறைவனை எளிதில் எய்துவதற்கு உரிய அரிய நெறி சைவ சித்தாந்த செந்நெறி ஒன்றே ஆகும். இவ்வுன்மையை திருமந்திரத்தில் காணலாம்.

🤔. சிவாகமங்களும் சைவ சித்தாந்தமும் ஒன்றா இதற்கு சான்று உள்ளதா?

சிவாகமங்களும் - சைவசித்தாந்தமும் ஒன்றே. இதற்கு சான்றாக அருள் நந்தி சிவாச்சாரியார் அருளிச் செய்த சிவஞான சித்தியார் - சுபக்கம் பாடல் என் 267 ல் 

"சிவாகமங்கள் சித்ததாந்தம் ஆகும்"  என அருளிச் செய்து உள்ளதை சிந்திக்க வேண்டும்.

🤔. திருமுறைகளும், சைவசித்தந்தமும்ஒன்றா?

சைவ சித்தாந்தம் - சாத்திர நூல்கள். திருமுறைகள் - தோத்திர நூல்கள். சாத்திரமும் தோத்திரமும் இரண்டு கண்கள் போல. அதனால் உயிர்கள் உய்ய, இரண்டையும் படித்து பயில வேண்டியது அவசியம்.

🤔. திருமுறைகள் எத்தனை நூல்களாக அமைக்கப்பட்டுள்ளது?

திருமுறைகள் மொத்தம் 12 (பன்னிரண்டு).

🤔. பன்னிரு திருமுறைகள் ஆசிரியர்கள் யாவர்? திருமுறைகளை அருளியவர் யார்?

பன்னிரு திருமுறைகள் ஆசிரியர்கள் வருமாறு: 

•  ஆளுடைப் பிள்ளையார் என அழைக்கப் படும் திருஞான சம்பந்தர் அருளியது 
• முதல் திருமுறை (1469 பாடல்கள்) 
• இரண்டாம் திருமுறை (1331 பாடல்கள் )
• மூன்றாம் திருமுறை(1358 பாடல்கள்). இம்மூன்றும் "திருக்கடைக்காப்பு" என போற்றப்படுகிறது 

• ஆளுடை அரசு என அழைக்கப் படும் திருநாவுக்கரசர்(அப்பர்) அருளியது
• 4ம் திருமுறை (1070 பாடல்கள்),
• 5ம் திருமுறை (1015 பாடல்கள்) மற்றும் 
• 6ம் திருமுறை (981 பாடல்கள்)  இம் மூன்றும் "தேவாரம்" என போற்றப்படுகிறது. 

• ஆளுடை நம்பி என அழைக்கப்படும் சுந்தரர் அருளியது 
• 7ம் திருமுறை. (1026 பாடல்கள்) இவை "திருப்பாட்டு" என போற்றப்படுகிறது. 

• மாணிக்கவாசகர் அருளியது 
• 8ம் திருமுறை. இவை திருவாசகம், திருக்கோவையார் ஆகும்.  (1058 பாடல்கள்) 

• திருவிசைப்பா, திருப்பல்லாண்டு 9ம் திருமுறை. இதனை அருளிச் செய்தவர்கள்.
• திருமாளிகைத் தேவர்
• கண்டராதித்தர் 
• வேணாட்டி அடிகள் 
• சேதிராசர்,
• பூந்துருத்தி நம்பி 
• திருவாலியமுதலானார் 
• சேந்தனார்
• கருவூர் தேவர் (மொத்தம் 301 பாடல்கள்)

• 10ம் திருமுறை 
• திருமூலர் அருளிய திருமந்திரம். (3000 பாடல்கள்)

• 11ம் திருமுறை அருளியவர்கள் வருமாறு:
• திருவாலிவாயுடையார் 
• கல்லாட தேவ நாயனார் 
• அதிராவடிகள் 
• ஐயடிகள் காடவர் கோமான் நாயனார் 
• இளம் பெருமாள் அடிகள் 
• பரண தேவ நாயனார் 
• சேரமான் பெருமாள் நாயனார் 
• பட்டினத்துப் பிள்ளையார், 
• நக்கீரன் தேவ நாயனார் 
• கபிலன் தேவ நாயனார் 
• காரைக்கால் அம்மையார் 
• நம்பியாண்டார் நம்பி  (மொத்தம் 1385 பாடல்கள்)

• 12ம்திருமுறை 
• அருண் மொழித்தேவர் என அழைக்கப்படும் சேக்கிழார்  பெருமான் அருளிய பெரியபுராணம், இது "திருத்தொண்டர்த்தொகை"  என போற்றப்படுகிறது. (4286 பாடல்கள்)

🤔. சமயமும் மதமும் ஒன்றா அல்லது வேறா?

மதம் கொள்கையை குறிக்கும் பொதுச் சொல். சமயம் என்பது ஒழுக்க நெறி செயல்பாட்டை குறிக்கும் சிறப்பு உடையது எனவே இரண்டும் ஒன்று அல்ல. 

"சமயவாதிகள் தத்தம் மதங்களில் அமைவதாக" என திருவாசகத்தில் போற்றி திருஅகவலில் உள்ள வரிகளை சிந்திக்க வேண்டியது அவசியம் .

🤔. திருமுறைகள் சிவாகமங்களின் அடிப்படையில் தோன்றி உள்ளன என்பதற்கு ஆதாரம் யாது?

சைவ சித்தாந்தம் எத்தனை பொருள்களை உள் பொருளாக கொள்கிறது கொள்கை விளக்கத்தை திருமுறைகளில் இருந்தே பெற பட்டு உள்ளது என்பதால் திருமுறைகள் சிவாகமங்களின் அடிப்படையில் தோன்றி உள்ளன என்பதை நம்மால் உணர்ந்து கொள்ள முடிகிறது.

🤔. சைவ சித்தாந்தம் எத்தனை பொருள்களை உள் பொருளாக கொள்கிறது?

அடிப்படையில் அறிவுடைய பொருள் அறிவற்ற பொருள் என்று இரண்டில் அடக்கி விடலாம். ஆனால், பொதுவாக, பதி, பசு, பாசம் என்னும் முப்பொருள்களை சைவ சித்தாந்தம் உள் பொருளாக கொள்கிறது.

🤔. சைவ சித்தாந்தம் முப் பொருள் உண்மையை எந்த அடிப்படையில் நிலை நாட்டுகிறது?

சற்காரிய வாதம் என்ற அடிப்படையில் பொருள் உண்மையைசைவசித்தாந்தம் நிலைநாட்டுகிறது.

🤔. சற்காரிய வாதம் என்றால் என்ன?

சற்காரிய வாதம் என்பது, இல்லது தோன்றாது. உள்ளதே சிறக்கும் என்ற அறிவியல் கொள்கையை அடிப்படையாகக் கொண்டு விளக்கும் ஒரு முறை ஆகும்.

🤔. பதி, பசு, பாசம் என்றால் என்ன?

பதி என்பது இறைவன், பசு என்பது உயிர்கள், பாசம் என்பது உயிர்களை கட்டி பிணைந்து இருக்கும் மலம் அல்லது தளை இவைகளை விரிவாக சித்தாந்த நூல்களில் காணலாம். நமது வகுப்பு அறையில் விளக்கி சொல்லப்பட்டு இருக்கும்

🤔. எல்லோரும் சைவ சித்தாந்தம் படிக்காமல் ஒரு சிலர் மட்டுமே படிக்க காரணம் என்ன?

இந்த கேள்வி நம்மில் பலருக்கு வந்து இருக்கலாம். அதற்குரிய விடை சிவஞான சித்தியார் சொல்வதை கேட்கலாம்.

வாழ்வெனும் மையல் விட்டு

வறுமையாம் சிறுமை தப்பித்

தாழ்வெனும் தன்மை யோடும்

சைவமாம் சமயம் சாரும்

ஊழ்பெறல் அரிது சால

உயர்சிவ ஞானத் தாலே

போழ் இள மதியி னானைப்

போற்றுவார் அருள்பெற் றாரே (சித்தி:181)

ஊழ்வினைப் பயன் தான். அரிதினும் அரிதான நற் சிந்தனைகளை கேட்பதற்கும் படிப்பதற்கும் கிடைத்த இந்த நல்வாய்ப்புகளை எண்ணி இறைவனுக்கு நன்றி சொல்லி பழக வேண்டும் 🤓.

மற்றவர்களை சேர்க்க முயற்சி செய்தும் அவர்கள் சேரவில்லையா.. வருத்தம் வேண்டாம்..

அவர்கள் வினைப் பயன் அவ்வளவு தான் என கடந்து செல்ல வேண்டும் 🤓. பாச நீக்கம் இந்த மனநிலையில் தானே அமையும்

சிவஞான சித்தியார் பாடம் படிக்கும் போது விரிவாக இந்த பாடல் குறித்து சிந்திக்கலாம்.

இது மனதில் நிறுத்த மனப்பாடம் செய்ய வேண்டிய பாடல்

பதம் பிரித்து தரப்பட்டுள்ளது ஓரிரு முறை படித்தாலே சுலபமாக புரிந்து கொள்ள முடியும்.

மெய் கண்ட சிவாச்சாரியார்

 

மெய்கண்ட சிவாச்சாரியார் 

                                                                                    

தகவல் பலகை	விவரம்
ஆக்கிய நூல்	சிவஞான சித்தியார் சுபக்கம்  சிவஞான சித்தியார் சுபக்கம்  இருபா இருபது
காலம்	11ம் நூற்றாண்டு (கிபி 1232)

அருள்நந்தி சிவம் :

        ஆதி சைவ குளத்தில், திருத்துறையூரில் தோன்றிய அருள்நந்தி சிவம், மெய்கண்ட சிவத்தின் முதல் மாணவர். வேதங்கள், ஆகமங்கள், திருமுறைகள் முழுமையாக கற்றுத் துறை போனதால் இவர் சகலாகம பண்டிதர் என்று போற்றப்படுகிறார். இவருக்கு பெற்றோர் இட்ட பெயர் சதாசிவம் என்பதாகும்.

        மெய் கண்டாரின் தந்தையாகிய அச்சுத களப்பாளருக்கு, குல குருவாக இருந்தவர். மெய்கண்டார் அருளிச் செய்த சிவஞான போத நூலை முதல் நூலாக கொண்டு வழி நூலாக சிவஞான சித்தியார் என்ற நூலை அருளிச் செய்தார். சைவ உலகத்திற்கு இவர் செய்து இருக்கும் ஞானப் பேருதவி சித்தாந்த சாத்திரம் படிப்பவர்கள் ஒவ்வொருவரும் நெஞ்சில் வைத்து போற்றுதற்கு உரியதாகும்.

இவருடைய தலையாய மாணவர் மறைஞான சம்பந்தர், இவருடைய மாணவர் உம்பாதி சிவம் சித்தாந்த அட்டகம் என போற்றும் எட்டு நூல்களை செய்தார்.

மெய்கண்ட சிவம் ஆக்கிய நூல்கள் வருமாறு

• சிவஞானசித்தியார் சுபக்கம்
• சிவஞான சித்தியார் பரபக்கம்
• இருபா இருபது.

இவர் ஆக்கி செய்துள்ள சிவஞான சித்தியார் நூலை ஒட்டி சிவத்துக்கு மேல் தெய்வமும் இல்லை. சித்தியாருக்கு மிஞ்சிய நூலும் இல்லை என்பது பழமொழி

அருள்நந்தி சிவம் புரட்டாசி மாதம் பூர நட்சத்திரத்தில் சுத்த அத்துவிட முத்தி ஆகிய சிவ சாயுச்சிய பதவி பெற்றுள்ளார்.

                

படைத்த நூல்

• சிவஞான சித்தியார் சுபக்கம் 
• சிவஞான சித்தியார் பரபக்கம் 
• இருபா இருபது 

A2 மாணவர்கள்

• ⬇️ மறைஞான சம்பந்தர் 

நூலின் அந்தெந்த பகுதிகளுக்கு செய்ய 🔽..

ஆசிரியர் குறிப்பு - மனவாசகம் கடந்தார்

உண்மை விளக்கம் என்ற நூலினை அருளிச்செய்த

மனவாசகம் கடந்தார். 

                                                                                    

தகவல் பலகை	விவரம்
ஆக்கிய நூல்	உண்மை விளக்கம்
காலம்	13ம் நூற்றாண்டு( கிபி 1232)

மனவாசகம் கடந்தார் :

மெய்கண்ட சாத்திரங்கள் என சொல்லப்படும் சைவ சித்தாந்த சாத்திரத்தில், உள்ள 14 நூல்களில் 6 வதாக வைத்து எண்ணப்படுவது "உண்மை விளக்கம்" என்ற இந்த அரிய நூல்.

சிவஞானபோதம் அருளிச் செய்த மெய்கண்டாரின் மாணவரான திருவதிகை மனவாசகம் கடந்தார்  அருளிச் செய்த உண்மை விளக்கம் என்ற நூல் கடவுள் வாழ்த்து, நூலாசிரியர் முறை கூறும் வெண்பா தவிர  53 வெண்பாக்களால் ஆனது. 

இதனுள், முப்பத்தாறு தத்துவம், ஆணவ மலம், திரு நடனம், ஐந்தெழுத்து நிலை என்பவை சுருங்கச் சொல்லி விளங்க வைக்கும் விதமாக அமைந்துள்ளது. 

இந்நூல் அமைப்பில் வினா-விடை போல, மாணாக்கன் ஆசிரியரிடம் கேட்டு தெரிந்து கொள்வது போல அமைந்துள்ளதால், சைவ சித்தாந்த சாத்திரங்கள் படிப்பவர்கள் முதலில் இந்த நூலை கற்க வேண்டும் என சொல்லுவார்கள்.  

படைத்த நூல்

• உண்மை விளக்கம் 

A2 நூலாசிரியரின் குருநாதர் 

• மெய்கண்ட சிவம் 

நூலின் அந்தெந்த பகுதிகளுக்கு செய்ய 🔽..

• பாடல் எண்.1-10
• பாடல் எண்.11-20
• பாடல் எண்.21-30
• பாடல் எண்.31-40
• பாடல் எண்.41-50
• பாடல் எண்.51-55
• 📖 மறு வாசிப்பு 
• 📺வீடியோ பாடம் 
• 🔶quiz
• 🔶கேள்வி தாள்

உண்மை விளக்கம் - 6 (51-55)

௨

மனவாசகம் கடந்தார் அருளிச்செய்த

உண்மை விளக்கம்

தகவல் பலகை	விவரம்
நூல் பெயர்	உண்மை விளக்கம்
நூல் ஆசிரியர்	மனவாசகம் கடந்தார்
காலம்	13ம் நூற்றாண்டு

---

முத்தி தனில் மூன்று முதலும் மொழியக் கேள் சுத்த அனுபோகத்தை தித்தல் அணு – மெத்தவே இன்பம் கொடுத்தல் இறை இத்தை விளைவித்தல் மலம் அன்புடனே கண்டு கொள் அப்பா (51)

முத்தி நிலையில் பதி, பசு, பாசம் ஆகிய மூன்று முதல்களும் அழியாமல் இருக்கும் தன்மை: ஆன்மா (அணு) இறைவன் வழங்கும் சுத்தப் பேரின்பத்தை அனுபவித்தபடி இருக்கும்; இறை அத் தகைய இன்பத்தைக் கொடுக்கும்; அந்த அனுபவ வேறுபாட்டை விளைவித்த ஆணவமலம் அடங்கி நின்று அழியாமல் இருக்கும்.

அப்பா இம் முத்திக்கு அழியாத காரணம் தான் செப்பாய் அருளாலே செப்பக் கேள் - ஒப்பில் குருலிங்க வேடம் எனக் கூறில் இவை கொண்டார் கரு ஒன்றி நில்லார்கள் காண் (52)

அந்த முத்தியை அடைவதற்கு அழியாத காரணம் யாதெனின், ஒப்பு உவமையற்ற குரு, லிங்கம், சங்கம வேடம் ஆகிய வழிபாட்டை இடைவிடாது தமக்குரிய பற்றாகக் கொண்டவர்கள், மீண்டும் ஒரு கருவில் பிறந்து வந்து நில்லார்கள்.

கற்றா மனம் போல் கசிந்து கசிந்தே உருகி உற்று ஆசான் லிங்கம் உயர் வேடம் - பற்றாக முத்தித் தலைவர் முழுமலத்தை மோசிக்கும் பத்தி தனில் நின்றிடுவார் பார் (53)

கன்றை நினைந்த பசுவின் மனம் போலக் கசிந்து உருகி, ஞானத்தை போதிக்கும் தேசிகனையும், லிங்க திருமேனியையும், திருவேடம் அணிந்த மெய்யடியார்களின் உயர்ந்த வேடத்தையும் பற்றாகக் கொண்டு, மும்மலங்களையும் நீக்கிய முத்தித் தலைவர்கள் எப்போதும் பத்தி நெறியிலேயே நிலைத்து நிற்பர்.

வாழ்ந்தேன் அருட் கடலே வற்றாப் பவக் கடலில் வீழந்தே அலையாமல் மேதினியில் - சூழந்து விடா வெண்ணைய்ச் சுவேதவன மெய் கண்ட நாதனே உண்மைத் தவப் பயனே உற்று (54)

வற்றாத பிறவிக்கடலில் வீழ்ந்து அலையாமல், இப்பூமியில் திருவெண்ணெய்நல்லூர் மெய்கண்ட நாதனே உன்னைச் சார்ந்து உண்மைத் தவப்பயனை உற்றதனால், இப்பிறவியில் உய்வடையும் நல்வாய்ப்பைப் பெற்று வாழ்ந்தேன்.

மண் அதிகை வாழும் மனவாசகம் கடந்தான் மின் அனைய வாழ்வில் உறு மெய்கண்டான் - பன்மறைகள் வண்மை தரும் ஆகம நூல் வைத்த பொருள் வழுவா “உண்மை விளக்கம்” செய்தான் உற்று (55)

மின்னல் போன்ற நிலையற்ற உலக வாழ்வில் உண்மைப் பொருளை உணர்த்திய மெய்கண்டாரின் வழிநின்று, பல வேதங்களும் வண்மை தரும் ஆகம நூல்களும் வைத்த பொருள்கள் சற்றும் வழுவாமல், உயிர்கள் உய்யும் பொருட்டு திருவதிகையில் வாழும் மனவாசகங்கடந்தார் இந்த “உண்மை விளக்கம்” என்னும் நூலினைச் செய்தருளினார்.

-----

உண்மை விளக்கம் - 5 (41-50)

௨

மனவாசகம் கடந்தார் அருளிச்செய்த

உண்மை விளக்கம்

தகவல் பலகை	விவரம்
நூல் பெயர்	உண்மை விளக்கம்
நூல் ஆசிரியர்	மனவாசகம் கடந்தார்
காலம்	13ம் நூற்றாண்டு

---

உற்ற குறி அழியும் ஒதுங்கால் பாடைகளில் சற்றும் பொருள் தான் சலியாது - மற்று அது கேள்; ஈசன், அருள், ஆவி, எழிலார் திரோத மலம், ஆசில் எழுத்து அஞ்சில் அடைவாம் (41)

திருவைந்தெழுத்து மொழிகளால் அழியாது; அதன் பொருள் என்றும் நிலைத்து நிற்கும். ஒவ்வொரு எழுத்தும் குறிப்பனவற்றை நினைவில் கொள்ள வேண்டும்:

ஐந்தெழுத்து	பொருள் உண்மை
சி	ஈசன் (சிவன்)
வா	அருள்
ய	ஆவி (உயிர்)
ந	திரோதம் (மறைப்பாற்றல்)
ம	மலம் (ஆணவம்)

சிவன், அருள், ஆவி, திரோதம், மலம், ஐந்தும் அவன் எழுத்து அஞ்சின் அடைவாம் - இவன் நின்று “ந”ம் முதலா ஓதில் அருள் நாடாது நாடும் அருள் “சி”ம் முதலா ஒது நீ, சென்று (42)

உலகியல் இன்பங்களை விரும்புபவர்கள் “நமசிவாய” என்னும் முறையில் வைத்து ஓதலாம். இறையருள்வழி இன்பமும் கிட்ட வேண்டும், உலகியல் வழி இன்பமும் கிட்ட வேண்டும் என விரும்புபவர்கள் “சிவாயநம” என்று ஐந்தெழுத்தை ஓதப் பழக வேண்டும்.

அண்ணல் முதலா அழகார் எழுத்து ஐந்தும் எண்ணில் இராப் பகல் அற்ற இன்பத்தே - நண்ணி அருள்,ஆனது சிவத்தே ஆக்கும் அணுவை இருள் ஆனது, தீர இன்று (43)

பகல் இரவு போல வரும் பிறப்பு இறப்புச் சுழலில் சிக்காமல், ஆணவ இருள் தீரப் பேரின்பத்தை அடையச் செய்து உயிரைச் சிவமாக்குவது “சிவாயநம” என ஓதும் ஐந்தெழுத்து ஆகும்.

பாடல் வரிகள்	பொருள் உண்மை
அண்ணல்	சிவபெருமான்
அணு	உயிர் (ஆன்மா)
இராப்பகல் அற்ற இன்பம்	மாறாத பேரின்பம்
சிவத்தே ஆக்கும்	சிவமாம்தன்மை பெறுதல்
இருள்	ஆணவம்

ஆதி மலம் இரண்டும் ஆதியாய் ஓதினால் சேதியா மும்மலமும் தீர்வு ஆகா - போதம் மதிப்பு அரிதாம் இன்பத்தே வாழலாம் மாறி விதிப்படி ஓது அஞ்செழுத்துமே (44)

பாச எழுத்துக்களை முதன்மையாகக் கொண்டு ஓதின் பிறப்பு இறப்பு வரும்; மும்மலங்களும் நீங்காது. மதிப்பிடற்கரிய பேரின்பம் வேண்டுபவர்கள் விதிப்படி “சிவாயநம” என்று ஓதுதல் வேண்டும்.

அஞ்செழுத்தே ஆகமும் அண்ணல் அருமறையும் அஞ்செழுத்தே ஆதிபுராணம் அனைத்தும் - அஞ்செழுத்தே ஆனந்த தாண்டவமும் யாவைக்கும் அப்பாலாம் மோனந்த மாமுத்தியும் (45)

அஞ்செழுத்து ஓதின் என்ன பயன் கிட்டும் எனச் சிந்திக்க வேண்டா. இறைவனின் ஆனந்த தாண்டவமும், ஆகம வேதங்களும், புராணங்களும், எல்லாவற்றிற்கும் அப்பாலான மௌனமும், மௌனத்தின் எல்லையான முத்தியும் விதிப்படி அஞ்செழுத்து ஓதின் கிட்டும்.

முத்தி தனை அடைந்தோர் முந்து பழம் போது, அங்கி வித்தகமாம் வீணை இவை இயற்றின் - ஒத்த இரதமணம் வெம்மை எழில் நாதம் போல விரவுவார் என்று ஓதும் விதி (46)

பழத்தில் சுவையும் மணமும், நெருப்பில் வெம்மையும், வீணையில் நாதமும் கலந்து நிற்பது போல, பரமுத்தி நிலை அடைந்தவர்கள் தற்போதம் அடங்கி, இறைவனோடு பிரிப்பின்றி விரவி நிற்பர்.

தத்துவங்கள் எல்லாம் சகசமாய் ஆன்மாவில் பெத்தத்தில் நிற்கின்ற பெற்றி போல் - முத்தி தனில் சித்தமலம் அற்றார் செறிந்திடுவார் என்று மறை சத்தியமாக ஓதியிடும் தான் (47)

கட்டு நிலையில் (பெத்தத்தில்) தத்துவங்கள் ஆன்மாவோடு பிரிவின்றி நிற்பது போல, மலப்பற்று நீங்கிய முத்தி நிலையில் ஆன்மா வேறுபாடின்றிச் சிவத்தோடு செறிந்து நிற்கும் என்று மறை கூறும்.

ஆதவன் சந்நிதியில் அம்புலியின் ஆர் சோதி பேதமற நிற்கின்ற பெற்றி போல் - நாதாந்தத்து அண்ணல் திருவடியில் ஆன்மா அணைந்து இன்பக் கண்ணில் அழுந்தியிடும் காண் (48)

சூரியன் ஒளியில் சந்திரனின் ஒளி பேதமற அடங்கி நிற்பது போல, நாதாந்தத்து அண்ணல் திருவடியில் ஆன்மா அணைந்து பேரின்பக் கடலில் அழுந்தி நிற்கும்.

சென்று இவன் தான் ஒன்றில் சிவ பூரணம் சிதையும்; அன்று அவன் தான் ஒன்றும் எனில் அந்நியமாம் - இன்று இரண்டும் அற்ற நிலை ஏது என்னில் ஆதித்தன் அந்தன் விழிக்கு குற்றம் அற நின்றது போல் கொள் (49)

ஆன்மா தனித்துச் சென்று ஒன்றின் சிவ பூரணம் சிதையும்; இறைவன் வந்து ஒன்றின் அந்நியமாகும். இவ்விரண்டும் அற்ற முத்தி நிலை எத்தன்மையது எனின், சூரியன் ஒளி குருடன் கண் குற்றம் நீங்கிய போது அவனோடு கலந்து நிற்பது போல் என்று கொள்க.

வாக்கு மனம் இறந்த வான் கருணையாளன் உருத் தாக்கறவே நிற்கும் தனி முதல்வா - நீக்காப் பதியினைப் போல் நித்தம் பசு பாசம் என்றாய் கதியிடத்து மூன்றினையும் காட்டு (50)

பதி, பசு, பாசம் என்ற முப்பொருளும் முத்தி நிலையில் அழியாமல் எவ்வாறு விளங்கும் என்ற முறைமையைத் தெரிந்து கொள்வோம்.

-----