உண்மை விளக்கம் - 4 (31-40)

௨

மனவாசகம் கடந்தார் அருளிச்செய்த

உண்மை விளக்கம்

தகவல் பலகை	விவரம்
நூல் பெயர்	உண்மை விளக்கம்
நூல் ஆசிரியர்	மனவாசகம் கடந்தார்
காலம்	13ம் நூற்றாண்டு

---

நல் தவத்தோர் தாம் காண நாதாந்தத்து அஞ்சு எழுத்தால் உற்று உருவாய் நின்று ஆடல் உள்ளபடி - பெற்றிட நான் விண்ணார் பொழில் வெண்ணெய் மெய்கண்ட நாதனே தண்ணார் அருளா லே சாற்று (31)

36 தத்துவங்களுக்கு அப்பால் ஐந்தெழுத்து வடிவினனாக இருக்கும் சிவபெருமானை, அவனுடைய கூத்தை குருவருளால் சிந்திப்போம்.

எட்டும் இரண்டும் உருவான லிங்கத்தே நட்டம் புதல்வா, நவிலக்கேள் - சிட்டன் “சிவாய நம” என்னும் திரு ஐந்து எழுத்து அஞ்சாலே அவாயம் அர நின்று ஆடுவான் (32)

சிவாயநம என்னும் ஐந்து எழுத்தில் உயிரைக் குறிக்கும் எழுத்து “ய” ஆகும்; அதில் ஊன்றி இறைவன் திருநடனம் புரிகின்றான்.

ஆடும் படி, கேள் நல் அம்பலத்தான்; ஐயனேம் நாடும் திருவடியிலே, “ந”கரம் கூடும் “ம”கரம் உதரம் வளர் தோள் “சி”கரம் பகரு முகம் “வா” முடியப் பார் (33)

அம்பலவாணன் திருமேனியை, திருக்கூத்தைக் காணச் செய்யும் உபதேசம்: “ந”-திருவடி; “ம”-திருவயிறு; “சி”-திருத்தோள்; “வ”-வேதாகமங்கள் அருளிய திருமுகம்; “ய”-உயிர்கள். கீழிருந்து மேலாக வைத்து எண்ணப்படும் இதனைப் பஞ்சாக்கர திருமேனி என்பர்.

சேர்க்கும் துடி “சி”கரம்; சிற்கன “வா” வீசுகரம்; ஆர்க்கும் “ய”கரம் அபயகரம் - பார்க்கில் இறைக்கு அங்கி “ந”கரம்; அடிக்கீழ் முயலகனார் தங்கும் “ம”கரம் அது தான் (34)

மேலிருந்து கீழாக ஐந்தெழுத்தில் திருமேனி எண்ணப்படுகிறது:

திருக்கரம் / திருவடி	எழுத்து
உடுக்கை ஏந்திய திருக்கை	சி
அமைந்த திருக்கை (அபயகரம்)	ய
அனல் ஏந்திய திருக்கை	ந
ஊன்றிய திருவடி	ம
தூக்கிய திருவடியைச் சுட்டும் திருக்கை (வீசுகரம்)	வ

ஓங்காரமே நல் திருவாசி உற்று அதனில் நீங்கா எழுத்தே நிறை சுடராம் - ஆங்காரம் அற்றார் அறிவார் அணி அம்பலத்தான் ஆடல் இது பெற்றார் பிறப்பு அற்றார் பின் (35)

“ஓம்” என்ற பிரணவமே நடராச பெருமானின் திருவாசி ஆகும். பிரணவமும் “சிவாயநம” என்ற ஐந்தெழுத்தும் ஒன்றே. இதனை அறிந்து திருக்கூத்தை வழிபடப் பெற்றவர்கள் பிறப்பு இல்லாதவர் ஆவர்.

தோற்றம் துடி அதனில் தோயும் திதி அமைப்பில் சாற்றியிடும் அங்கியிலே சங்காரம் - ஊற்றமா ஊன்று மலர்ப் பதத்தில் உற்றதிரோ தம் முத்தி நான்ற மலர்ப் பதத்தே நாடு (36)

நடராசர் திருமேனியில் விளங்கும் ஐந்தொழில்கள் உலகியல் இன்பத்திற்காகப் புரியும் போது ஊண நடனம் என்றும், வீடு பெறத் துணை செய்யும் போது அது ஞான நடனம் (ஆனந்த நடனம்) என்றும் அழைக்கப்படும்.

அமைப்பு	ஐந்தொழில்
உடுக்கை ஏந்திய திருக்கரம்	படைத்தல்
அமைந்த திருக்கரம்	காத்தல்
அக்னி ஏந்திய திருக்கரம்	அழித்தல்
ஊன்றிய திருவடி	மறைத்தல்
தூக்கிய திருவடி	அருளல்

மாயை தனை உதறி, வல்வினையை சுட்டு, மலம் சாய அமுக்கி, அருள் தான் எடுத்து - நேயத்தால் ஆனந்த வாரிதியில் ஆன்மாவைத் தான் அழுத்தல் தான் எந்தையார் பாதம் தான் (37)

மாயையை நீக்கி, பழைய வினைகளைச் சுட்டு எரித்து, மும்மலங்களைச் செயலிழக்கச் செய்து, அருளை வழங்கி, அன்பு மிகுந்த ஆனந்தக் கடலில் ஆன்மாவை அழுந்தச் செய்வதே ஆனந்த (ஞான) நடனம் ஆகும்.

மோனந்த மா முனிவர் மும் மலத்தை மோசித்து தான், அந்தமான, இடத்தே தங்கிடும் - ஆனந்த மொண்டு அருந்த நின்று ஆடல் காணும் அருள் மூர்த்தியாக் கொண்ட திரு அம்பலத்தான் கூத்து (38)

“தான்” என்ற நினைப்பு இல்லாமல், மலங்கள் நீங்கிய மௌனத்தின் முடிவில், சிவானந்தத்தை மொண்டு அருந்தும் வகையில் அம்பலத்தான் அருள் மூர்த்தியாக ஆடல் புரிவான்.

அமைப்பு	மல நீக்கமும் பேரின்பமும்
உடுக்கை ஏந்திய திருக்கை	மாயா மலத்தை நீக்குதல்
அக்னி ஏந்திய திருக்கை	கன்ம மலத்தைச் சுடுதல்
ஊன்றிய திருவடி	ஆணவமலத்தை அடக்குதல்
தூக்கிய திருவடி	பேரின்பம் அருளுதல்
அமைந்த திருக்கை	பேரின்பத்தில் ஆன்மாவை அழுத்துவித்தல்

பரை இடமா நின்று மிகு பஞ்சாகக்கரத்தால் உரை உணர்வுக்கு எட்டா ஒருவன் - வரைமகள் தான் காணும் படியே கருணை உருக் கொண்டு, ஆடல் பேணும் அவர்க்கு உண்டோ பிறப்பு (39)

வாக்குக்கும் உணர்வுக்கும் எட்டாத பரம்பொருள், திருவருளையே உருவாகக் கொண்டு, திருவைந்தெழுத்தையே அருள் திருமேனியாகக் கொண்டு ஆடுகின்றான். அவனது ஆடலைப் பேணுபவர்க்குப் பிறப்பில்லை.

நாதாந்த நாடகத்தை நன்றாய் அருள் செய்தீர் ஒதீர் எழுத்து அஞ்சும் உள்ள படி - தீது அறவே அஞ்சு எழுத்து ஈது ஆகில் அழியும் எழுத்தாய் விடுமோ தஞ்ச அருட் குருவே சாற்று (40)

ஐந்தெழுத்தும் பிற எழுத்துக்கள் போல் அழிந்து விடுமோ என்ற ஐயத்தை நீக்கிக் கொள்ள, இனி ஐந்தெழுத்தைப் பற்றி அறிந்து கொள்வோம்.

-----