உண்மை விளக்கம் - 3 (21-30)

௨

மனவாசகம் கடந்தார் அருளிச்செய்த

உண்மை விளக்கம்

தகவல் பலகை	விவரம்
நூல் பெயர்	உண்மை விளக்கம்
நூல் ஆசிரியர்	மனவாசகம் கடந்தார்
காலம்	13ம் நூற்றாண்டு

---

வித்தியா தத்துவங்கள் ஏழும் விளம்பினோம் சுத்தமாம் தத்துவங்கள் சொல்லக் கேள் நித்தமாம் சுத்த வித்தை ஈசுரம்பின் சொல்லும் சதாசிவம் நற் சத்தி சிவம் காண், அவைகள் தாம் (21)

காலத்தத்துவத்திற்கு உட்படாத சுத்த தத்துவம்/சிவ தத்துவம் பற்றித் தெரிந்து கொள்வோம். சுத்த வித்தை, ஈசுரம், அவற்றின் மேலாக சதாசிவம் (சாதாக்கியம்), சத்தி, சிவம் என்னும் பெயர்களை உடையன சுத்த தத்துவங்கள் ஆகும்.

சுத்த வித்தை ஞானம் மிகும்; தொன்மையாம் ஈசுரந்தான் அத்தன் தொழில் அதிகம் ஆக்கியிடும் - ஒத்தல் இவை சாதாக்கியம்; என்றும் சத்தி சிவம், கிரியை ஆதார ஞான உரு ஆம் (22)

இறைவன் சுத்த மாயையில் தங்கி ஐந்தொழில் ஆற்றுகிறான். அவ்வாறு ஐந்தொழில் ஆற்றும் போது, இறைவனின் திருவருள் இச்சை, கிரியை, ஞானம் என மூவகைப்பட்டு நிற்கிறது. அவை நிகழும் நிலையை காண்போம்:

சிவ தத்துவம்	சக்தி தொழிற்படும் நிலை
சுத்த வித்தை	ஞான சக்தி அதிகம், கிரியா சக்தி குறைவு
ஈசுரம்/மகேஸ்வரம்	கிரியா சக்தி அதிகம், ஞான சக்தி குறைவு
சாதாக்கியம்/சதாசிவம்	ஞான சக்தியும் கிரியா சக்தியும் ஒத்த நிலை
சத்தி	கிரியா சக்தி மட்டும் தொழிற்படும் நிலை
சிவம்	ஞான சக்தி மட்டும் தொழிற்படும் நிலை

ஆறாறு தத்துவமும் சொன்னோம் அடைவாக மாறா மலம் இரண்டும் வா சொல்லக் - கூறில் அறியாமை ஆணவம் நீ யான சுக தூக்கம் குறியா வினை என்று கொள் (23)

ஆன்ம தத்துவங்கள் 24, வித்தியா தத்துவங்கள் 7, சிவ தத்துவங்கள் 5 என 36 தத்துவங்களைத் தெரிந்து கொண்டோம். இனி இரு மலங்கள் பற்றித் தெரிந்து கொள்வோம். தானாக இருப்பது கன்ம மலம்; அறியாமையில் இருப்பது ஆணவம்; இவை இரண்டும் சேர்ந்து வினை செய்யும் போது, உயிர்களுக்குச் சுக துக்கம் வரும்.

ஆறாறு தத்துவமும் ஆணவமும் வல்வினையும் மாறா அருளால் வகுத்து உரைத்தீர் - வேறாகா என்னை எனக்கு அறியக் காட்டீர் இவை கண்டேன் உன்னரிய தேசிகரே உற்று (24)

36 தத்துவங்களையும் அவற்றின் நிலை செயல்பாடுகளையும் தெரிந்து கொண்டோம். இவற்றில் இருந்து வேறுபடாத ஆன்மாவை இனி நாம் தெரிந்து கொள்ள வேண்டாமா?

நன்றா உரைக்கக் கேள் நல்ல சித்தின் முன், அசித்து இங்கு ஒன்றாது; சித்து அசித்தை ஓராது - நின்று இவற்றை அன்றே “பகுத்து அறிவது ஆன்மாவே” என்று மறை குன்றாமல் ஓதும் குறித்து (25)

அறிவுடைய பொருளான இறைவன் முன், அறிவற்ற சடப் பொருளான மலங்கள் தோன்றாது. சித்து (அறிவுடைய பொருள்), அசித்து (சடப் பொருள்) எனப் பகுத்து அறிவதே ஆன்மா ஆகும்.

தத்துவங்கள் ஆறாறும் தம்மைத் தாம் என்று அறியா எத்தன்மை என்னில் இயம்பக்கேள் - சுத்தமாம் ஆறு சுவையும் அறியாவே தம்மைத் தாம் கூறில் அவை இவை போல் கொள் (26)

36 தத்துவங்களும் சடம். அதனால் அவை தம்மைத் தாம் அறியாது.

ஆறு சுவையும் அருந்தி அவை தம்மை வேறு ஒருவன் கூறி இடும் மேன்மை போல் - ஆறாறும் ஒன்று ஒன்றாய் நாடிஉணர்ந்து ஓதில், அதில் உற்று அறிவாய்; நின்ற பொருள் தானே காண் நீ (27)

36 தத்துவங்களும் சடம். அதை ஒவ்வொன்றாக அறிந்து கொள்ளும் அறிவு தான் ஆன்மா.

குன்றா அருளாலே கூறினீர் என் வடிவு பொன்றாத நும் உருவம் போதியீர் - நின்று அருக்கன் கண்ணுக்குக் காட்டுமாப் போல் உனது அறிவில் நண்ணி, அறிவித்திடுவோம் நாம் (28)

அறிய வேண்டுவனவற்றை உயிர்களின் அறிவில் பொருந்தி, சூரியன் கண்ணுக்குக் காட்டுவதைப் போல இறைவன் வேறாய் நின்று அறிவிப்பான்.

அன்றியும் கேள்; ஆனமாவால் ஆய்ந்து அறியும் ஐம் பொறிகள் இன்றி அறியா இவை என்ன - நின்றது போல் ஒவாமல் உன்னை உணர்த்துவோம் உன் அறிவில் மேவாமல் மேவி, நாமே (29)

உயிரின் அறிவில் இறைவன் ஒன்றாய்ப் பொருந்தி அறிவிப்பான். அங்ஙனம் அறிவிக்கும் போது உயிர் தானே அறிவது போலத் தோன்றும்; இறைவன் தான் உணர்த்துகிறான் என்பதை உயிர் உணராது. அது உணரும் போது, அறிவு விளக்கம் ஏற்படும்.

அக்கரங்கட்கு எல்லாம் அகர உயிர் நின்றாற் போல் மிக்க உயிர்க்கு உயிராய் மேவினோம் - எக்கண்ணும் நில்லா இடத்து, உயிர்க்கு நில்லாது அறிவு, என்று நல் ஆகமம், ஓதும் நாடு (30)

உயிர்களைத் தொழிற்படுத்த இறைவன் உயிருக்கு உடனாய் நின்று அருள வேண்டும். அப்படி இல்லையென்றால், உயிர்களின் அறிவு தொழிற்படாது என்ற ஆகம உண்மையை அறிந்து கொள்வோம்.

-----