உண்மை விளக்கம் - 2 (11-20)

௨

மனவாசகம் கடந்தார் அருளிச்செய்த

உண்மை விளக்கம்

தகவல் பலகை	விவரம்
நூல் பெயர்	உண்மை விளக்கம்
நூல் ஆசிரியர்	மனவாசகம் கடந்தார்
காலம்	13ம் நூற்றாண்டு

---

உள்ளபடி மா பூதம் ஓதினோம் உன் தனக்குக் கள்ளமிகும் ஐம்புலனும் கட்டுரைக்கில் - மெள்ளவே ஓசை பரிசம் உருவம் சுவை நாற்றம் ஆசை தரும் ஐம்புலனே யாம் (11)

தன்மாத்திரை என்பது புலன்கள் ஆகும். ஐம்பூதங்களைத் தொடர்ந்து ஐம்புலன்களைத் தெரிந்து கொள்வோம். இவை ஆசையைத் தூண்டும் என்பதால், கள்ளப் புலன்கள் என அழைக்கப்படுகின்றன.

பூதம்	புலன்கள்
நிலம்-மண்	மணம்
நீர்	சுவை
நெருப்பு	ஒளி
காற்று	தொடு உணர்வு
ஆகாயம்	ஓசை

ஞானேந்திரியங்கள் நன்றா உரைக்கக் கேள் ஊன மிகு பூதம் ஊற்றிடமா ஈனமாம் சத்தாதியை அறியும் தானம் செவி தோல் கண் அத்தாலும் மூக்கு என்று அறி (12)

அறிவுக் கருவிகள் புலன்களை உணரப் பொறிகளை இடமாகக் கொள்ளும்; அவை செவி, தோல், கண், வாய், மூக்கு என்பனவாம்.

வானிடமாய் நின்று செவி மன்னும் ஒளி அதனை ஈனமிகும் தோல் கால் இடமாக ஊனப் பரிசம் தனை அறியும் பார்வையில் கண் அங்கி விரவி உருவம் காணுமே (13)

பொறிகள்	பூதத்தைப் பொருந்தி	புலன்களை அறியும்
செவி	வானத்தை	ஒலி
தோல்	காற்றை	தொடு உணர்வு
கண்	நெருப்பை	உருவம் காணும்
வாய்	அடுத்த பாடலில் சொல்லப்பட்டுள்ளது	-
மூக்கு	-	-

நன்றாக நீரிடமா நா இரதம் தான் அறியும் போனரா மனம் மூக்குப் பூவிடமா நின்று அறியும் என்று ஓதும் ம்அன்றே இறை ஆகமம் இதனை வென்றார் சென்றார் இன்ப வீடு (14)

பொறிகள்	பூதத்தைப் பொருந்தி	புலன்களை அறியும்
செவி	வானத்தை	ஒலி
தோல்	காற்றை	தொடு உணர்வு
கண்	நெருப்பை	உருவம் காணும்
வாய்/நாக்கு	நீர்	சுவை
மூக்கு	மண்	மணம்

கண்ணுதல் நூல் ஓதியிடும் கன்மேந்திரியங்கள் என்னும் வசனாதிக்கு இடமாக நண்ணியிடும் வாக்குப்பா தம்பாணி மன்னு குதம் உபத்தமா கருது நாளும் அது (15)

தொழில் கருவிகளாவன:

தொழில் கருவி	உறுப்பு
வாக்கு	வாய்
பாதம்	கால்
பாணி	கை
குதம்	எருவாய்
உபத்தம்	கருவாய்

வாக்கு,ஆகாயம் இடமா வந்து வசனிக்கும் கால் போக்கு ஆரும் காற்று, இடமாப்; புலகி அனல் - ஏற்கும் இடும் கை; குதம், நீர் இடமா மலாதி விடும்; பார் இடம் உபத்தம் விந்து (16)

தொழில் கருவிகள் செயல்படும் விதம்:

இந்திரியம்	தன்மாத்திரை	உறுப்பு
வாக்கு	ஓசை	வாய்
பாதம்	ஊறு	கால்
பாணி	ஒளி	கை
குதம்/பாயுறு	சுவை	எருவாய்
உபத்தம்	நாற்றம்	கருவாய்

அந்தக் கரணம் அடைவே உரைக்கக் கேள் அந்தமனம் புத்தியுடன் ஆங்காரம் – சிந்தை; இவை பற்றி அது நிச்சயித்துப் பலகால் எழுந்திருந்து அங்கு உற்ற சிந்திக்கும் உணர் (17)

அந்தக்கரணம் என்று சொல்லும் அகக் கருவிகளைத் தெரிந்து கொள்வோம். மனம் ஒன்றைப்பற்றிக் கொள்ளும்; அதன் பின் புத்தி அது என்ன என்று ஆராயும்; பின்னர் ஒரு தீர்மானத்துக்கு வருவது அகங்காரம் ஆகும். அப்படித் தீர்மானித்ததைப் பலமுறை எண்ணி மகிழ்வதும் அதன் மீது ஆதிக்கம் கொள்வதும், அதன் நலனையும் பலனையும் நாடுவதும் சித்தம் செய்யும் பணிகள் ஆகும்.

ஓதியிடும் நால் ஆறும் உற்று ஆன்ம தத்துவம் என்று ஆதி அருள் நூல் அறையும்; காண் - தீது அறவே வித்தியா தத்துவங்கள் தம்மை விளம்பக் கேள் உத்தமனே நன்றா உனக்கு (18)

இந்த 24 தத்துவங்களும் ஆன்ம தத்துவம் எனப் பெறும்.

பஞ்ச பூதங்கள் 5; புலன்கள் 5; ஞானேந்திரியங்கள் 5; கன்மேந்திரியங்கள் 5; அந்தக்கரணம் 4 (மனம், புத்தி, அகங்காரம், சித்தம்) மொத்தம் 24 ஆகும்.

காலம் நியதி கருதும் கலை, வித்தை, ஏல அராகம், புருடன் (ஏ)மாயை - மால் அற ஏழ் சொன்னோம் அடைவாகச் சொன்ன இவை தம் உண்மை உன்னி உரைக்கும்; நாம் உற்று (19)

காலம், நியதி, கலை, வித்தை, அராகம், புருடன், மாயை என்பன ஏழும் வித்தியா தத்துவங்கள் ஆகும்.

எல்லை பலம், புதுமை எப்போதும் நிச்சயித்தல் அல்லல் தரும் கிரியை ஆனமாவுக்கு - ஒல்லை அறிவு, ஆசை ஐம்புலனும் ஆரவரும் காலம் குறியா மயக்கு என்று கொள் (20)

வித்தியா தத்துவங்களின் தொழில்களை அறிந்து கொள்வோம்:

தத்துவம்	தொழில்
காலம்	முக்காலத்தை உணர்த்தி எல்லைப்படுத்துவது.
நியதி	அவரவர் வினையை அவரவரே அனுபவிக்க வரிசையாக (நியமமாக) நிறுத்துவது.
கலை	ஆன்மாவின் கிரியா சக்தியைத் தூண்டிச் செயல்களில் ஈடுபடுத்துவது.
வித்தை	உயிரின் ஞான உணர்வை (அறிவுச் சக்தியை) விளக்குவது.
அராகம்	பொருள்களின் மீது விருப்பத்தை (இச்சா சக்தியை) விளைவிப்பது.
புருடன்	மேலே சொன்ன தத்துவங்களோடு கூடிப் போகங்களை நுகரும் பொது நிலை (போக காண்டம்).
மாயை	பொருள்களைச் சரியாகப் புரிந்து கொள்ளாமல் மயக்கத்தில் ஆழ்த்துவது.

-----