ஒளவைக்குறள் - 3. சூக்கும சரீரம் நிலைமை

   

       

௨ 

       

ஒளவையார் அருளிச்செய்த

       

ஞானக்குறள்

   

                                                                                                                                                                       

தகவல் பலகை	விவரம்
பால்	வீட்டுநெறிப்பால்
அதிகாரம்	03.சூக்கும உடம்பின் நிலை
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

   

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - மூன்றாவது பத்து

   

கற்கலாம் கேட்கலாம் கண்ணாரக் காணலாம்    

உற்று உடம்பால் ஆய உணர்வு. 21

சூக்கும உடலில் உண்டாகும் அறிவால் உருவாகும் உணர்வினால்:

• கற்கலாம்
• கேட்கலாம்
• பார்க்கலாம்

இத்தகுதியை அடைந்தவர்கள் மறைகளில் இருக்கும் சாத்திரப் பூட்டுக்களை உடைத்துப் பொருள் காணமுடியும்.

வெள்ளி பொன் மேனியது ஒக்கும் வினை உடைய

உள் உடம்பின் ஆய ஒளி. 22

சூக்கும வெள்ளி – பொன் போல இருக்கும் என்றதன் பொருள், மாசு இல்லாமல் இருக்கும் என்பதே ஆகும்.

சென்று உண்டு வந்து திரிதரும் உள் உடம்பு

என்றும் கெடாதது இது. 23

மனம் நினைக்கும் இடங்களுக்குச் சென்று, வெளி உலகிற்கு (தூலத்திற்குத்) திரும்பி வந்து திரிந்து கொண்டிருக்கும். இது உள் உடம்பு (சூக்கும உடல்) வெளி உடம்பு (தூல உடலைப்) போல் அழிவதில்லை.

வருபயன் உண்டு மகிழ்ந்து உடனாய் நிற்கும்

ஒருபயனைக் காட்டும் உடம்பு. 24

வேண்டிய பலனை அடைந்து, ஆனந்தித்து மகிழ்வதோடு, நிலைத்து நிற்கும் படியான பலனைக் வெளிப்படுத்தும்.

அல்லல் பிறப்பை அகற்றுவிக்கும் ஆய்ந்து ஆய

தொல்லை உடம்பின் தொடர்பு. 25

சூக்கும உடலானது, எப்போதும், தொல்லை கொடுத்துக் கொண்டிருக்கும் தூல உடலின் தொடர்புடையது; அது பிறவிப்பிணியை அகற்றாது.

நல்வினையும் தீவினையும் உண்டு திரிதரும்

செய்வினைக்கும் வித்தாம் உடம்பு. 26

கருவி கரணங்களோடு சேர்ந்து இரு வினை இயற்றுவது தூல உடல்; சூக்கும உடல் ஞான காரியங்கள் செய்ய வித்தாக (விதையாக) இருக்கும்.

உள் உடம்பின் வாழ்வன ஒன்பது மேழைக்

கள்ள உடம்பாகி விடும். 27

ஒன்பது வாயில்கள் உள்ள தூல உடம்பு போலவே சூக்கும உடலின் ஒன்பது வாயில்கள் செயல்படும். ஆயினும் இவை இரண்டும் வேறு.

ஒன்பது வாயில்களாவன:

• கண்கள்: 2
• காதுகள்: 2
• நாசித் துவாரங்கள்: 2
• வாய்: 1
• சிறுநீர்த் துவாரம்: 1
• மலத்துவாரம்: 1

பொய்க்கு எல்லாம் பாசனமாய் உள்ள தற்கோர் வித்தாகும்

மெய்க்கு உள்ள மாய உடம்பு. 28

எல்லாப் பொய்கட்கும் ஆதாரமாக தூல உடம்பு உள்ளது போல், மெய்க்கு வித்தாக உள்ளது சூக்கும உடல் உள்ளது.

வாயுவினால் ஆய உடம்பின் பயனே

ஆயுளினால் இல்லை அது. 29

உடல் இயக்கத்திற்கும் முடிவுக்கும் ஆதாரமாய் உள்ளது (சீவ) பிராண வாயு.

ஒன்பது வாசலும் ஒக்க அடைத்தக்கால்

என்பதில் ஒன்றாம் அரன். 30

குருபிரான் சுட்டிக்காட்டும் (சூக்கும) வாயில்கள் ஒன்பதையும் (நவத்துவாரம்) அடைத்தால், ஐம்பது பீசங்களோடு ஐம்பத்தி ஒன்றாகச் சிவன் இருப்பான்.