ஒளவைக் குறள் - 4 - நாடி தாரனை

   

       

௨ 

       

ஒளவையார் அருளிச்செய்த

       

ஞானக்குறள்

   

                                                                                                                                                                       

தகவல் பலகை	விவரம்
பால்	வீட்டுநெறிப்பால்
அதிகாரம்	04. நாடி தாரணை
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

   

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - நான்காவது பத்து (நாடி தாரணை)

எழுபத்தி ஈராயிர நாடி அவற்றுள்    

முழுபத்து நாடி முதல். 31

உடலில் 72,000 நாடிகள் உள்ளன. அவற்றுள் முழுமையான பத்து நாடித்துடிப்புக்கள் முதன்மையானவை.

நரம்பு எனும் நாடி இவையினுக்கு எல்லாம்

உரம்பெறு நாடி ஒன்று உண்டு. 32

இந்த நாடித் துடிப்புகளுக்கு எல்லாம் உரமூட்டும் நாடித்துடிப்பு ஒன்று உண்டு. அது மூலாதாரம்.

உந்திமுதலா உறுமுடிகீழ் மேலாய்ப்

பந்தித்து நிற்கும் பரிந்து. 33

உந்து சக்தி இருக்கும் மூலாதாரத்தை மையமாகக் கொண்டு மேலும் கீழும் கட்டுக்கோப்பாக அவை பிரிந்து செல்லும்.

காலொடு கையின் நடுவிடத் தாமரை

நூல்போலு நாடி நுழைந்து. 34

தாமரைபூவின் தண்டில் நூல் இழைகள் நுழைந்து இருப்பது போல உடலின் கால், கை, நடுப்பகுதிகளில் நாடி-நரம்புகள் உடலில் நுழைந்து ஓடும். நீரின் உயரத்துக்கு ஏற்பத் தாமரையின் நூலிழை ஈடுகொடுப்பது போல உடல் வளைவுக்கு ஏற்ப அவை வளைந்து கொடுக்கும்.

ஆதித்தன் தன் கதிர்போல அந்நாடிகள்

பேதித்துத் தாம் பரந்தவாறு. 35

உடம்பை மாறுபடுத்திக்கொண்டு சூரிய வெளிச்சம் பாய்வது போல நாடித்துடிப்புகள் பரந்து செல்லும்.

மெய் எலாம் ஆகி நரம்போடு எலும்பு பிசைந்து

பொய் இல்லை நாடிப் புணர்வு. 36

நாடித் துடிப்பு உடம்பு எங்கிலும் எலும்போடு இசைவாக ஒட்டிக்கொண்டிருக்கும் நரம்பில் நிகழும். இது பொய்மை இல்லாத உண்மை.

உந்திமுதலாகி ஓங்காரத்துள் பொருளாய்

நின்றது நாடி நிலை. 37

ஓங்காரத்தின் உட்பொருள் சுழல்வது போல, உயிர் ஊற்று உந்தும் மூலாதார முதலில் சுழன்று நிற்பது நாடிநிலை ஆகும்.

நாடிகள் ஊடு போய்ப் புக்க நலம் சுடர்தான்

வீடு தருமாம் விரைந்து. 38

நமக்கு விரைவாக வீடு பேற்றினைத் தருவது, நாடிகளின் ஊடே புகுந்து போகும் நம் உணர்வு-ஒளி ஆகும்.

நாடி வழக்கம் அறிந்து செறிந்து அடங்கி

நீடு ஒளி காண்பது அறிவு. 39

நாடித் துடிப்பின் வழக்கம் இது என்பதை அறிந்துகொண்டு, அடக்கமாக வளரும் ஒளியைக் காண்பது அறிவுடைமை ஆகும்.

அறிந்து அடங்கி நிற்கும் அந் நாடிகள் தோறும்

செறிந்து அடங்கி நிற்குஞ் சிவம். 40

அறிந்து, அடங்கி நிற்கும் நாடித் துடிப்பு ஒவ்வொன்றிலும் செறிவாக அடக்கமாக நிற்பதுவே சிவம்.