அடிப்படை புரிதல் 4-இறை இயல்பு

💚 பதில்களை பெற கேள்வியை click செய்யவும்; 💚

🤔. இறைவனின் இயல்பு யாது?

இறைவனின் இயல்புகளை பொது இயல்பு, சிறப்பு இயல்பு என பிரித்துச் சொல்லலாம். இறைவன் எண்குணம் உடையவன் என்று தெரிந்து கொள்வது அடிப்படையில் சிறப்பு.

🤔. இறைவனின் பொது இயல்பாவது யாது?

இறைவனின் பொது இயல்பாவது, 

• உயிர்களோடு ஒன்றாயும், வேறாயும் , உடனாயும் நிற்பது 
• உயிர்கள் பொருட்டு ஐந்தொழில் ஆற்றுவது 
•  உயிர்கள் வழிபட்டு உய்யும் பொருட்டு உருவம் கொள்வது முதலியனவும் பொது இயல்பு ஆகும். .

🤔. இறைவனின் சிறப்பு இயல்பு என்பது யாது?

எண் குணம் உடையவனாக இருப்பதே இறைவனின் சிறப்பு இயல்பு ஆகும்.

🤔. இறைவன் எண் குணம் உடையவன் என்பதற்கு சாத்திர பிரமாணம் யாது?

உமாபதி சிவாச்சாரியார் அருளிய நெஞ்சுவிடு தூது என்னும் சாத்திரத்தில் 

யார்க்கும் எழுதா இயற்குனங்கள் எட்டானை (நெஞ்.100) 

எட்டுக் கொண்டான் என திருவுந்தியாரில் (24) 

என்று சாத்திர பிரமாணம் இறைவன் எண் குணம் உடையவன் என்பதை தெளிவு படுத்துகின்றது. 

திருக்குறளிலும் "எண் குணத்தான் " (குறள்.9) 

மெய்த்து ஆறுசுவையும், ஏழ் இசையும், எண் குணங்களும் (1:131:1) 

எண்குணத்தார் எண்ணா யிரவர் போலும்- இடைமருது மேவிய ஈசனாரே! (6:16:4) 

இறையவனை மறையவனை எண்குணத்தி னானை (7:40:3) 

எண் குணம் செய்த ஈசனே ! (8:30:7) 

எண்குணம் ஆகும் சடையுடை யான்சிந்தை சார்ந்து நின்றானே.(10:46:4) 

இறைவனை எண்குணத்துஈசனை (11:7:53) 

என பல இடங்களில் திருமுறையில் காணலாம்.

🤔. எண் குணங்கள் யாவை.?

• தன்வயம் உடைமை 
• தூய உடைமை 
• இயற்கை உணர்வு உடைமை 
• முற்று உணர்வு உடமை 
• இயல்பாகவே பாசம் இன்மை 
• பேரருள் உடைமை 
•  முடிவில் ஆற்றல் உடைமை 
• வரம்பில் இன்பம் உடைமை  என்னும் இவையே இறைவனின் எண் குணங்களாகும்.

🤔. எண் குணங்களில் தன்வயம் உடைமையின் இன்றியமையாமை யாது?

தன்வயம் உடைமை என்பது, பிறர்வயப்பட்டு நடத்தாமல் தான் விரும்பியவற்றை தாம் விரும்பியவாறே செய்தல். அவரவர்க்கு உரிய வினைப்பயனை அவர் அவருக்கு சென்று அடையுமாறு செய்வதற்கு இந்த குணம் இறைவனுக்கு இன்றியமையாதது ஆகும்.

🤔. எண் குணங்களில் தூய உடம்பு உடைமையின் இன்றியமையாமை யாது?

தூய உடம்பு உடைமை என்பது, உயிர்களுக்கு அறிவிக்கும் பொருட்டு இறைவனுக்கு உருவமும் தேவைப்படுவதால், இந்த குணம் இன்றியமையாதது ஆயிற்று. உயிர்களின் உடம்பு போல இது மாசு உடையது அன்று.

🤔. எண் குணங்களில் இயற்கை உணர்வு உடைமையின் இன்றியமையாமை யாது?

இயற்கை உணர்வு உடைமை என்பது, பிறரால் அறிவிக்கப்படாமல், தானே எல்லாவற்றையும் அறியும் அறிவு இயற்கையாகவே உடையவன் இறைவன், பொறி புலன்களால் அறியும் அறிவுடையவன் அல்லன் என்பதை மெய்ப்படுத்துதற்கு இக் குணம் இன்றியமையாதது ஆயிற்று.

🤔. எண் குணங்களில் முற்றுணர்வு உடைமையின் இன்றியமையாமை யாது?

முற்று உணர்வு உடமை என்பது எல்லாவற்றையும், எப்போதும் ஒரே சமயத்தில் உணரும் தன்மை உடையவன் இறைவன் என்பதைக் காட்டுவதற்கு இக்குணம் இன்றியமையாதது ஆயிற்று.

🤔. எண் குணங்களில் பாசம் இன்மையின் இன்றியமையாமை யாது?

இயல்பாகவே பாசம் இன்மை என்பது, ஆணவமலத்தால் மறைக்கபட்டு, உயிர்களைப்போல் அல்லாமல் என்றும் ஆணவ மல சார்பு அற்றவன் இறைவன் என்பதை மெய்ப்படுத்துவதற்கு இக் குணம் இன்றியமையாதது ஆயிற்று. பேரருள் உடைமை என்பதுஎல்லா உயிர்களிடத்தும் என்றும் குறையாத கைம்மாறு கருதாத பெரும் கருணையை உடையவன் என்பதை காட்டுவதற்கு இக் குணம் இன்றியமையாதது ஆயிற்று.

🤔. எண் குணங்களில் முடிவில் ஆற்றல் உடைமையின் இன்றியமையாமை யாது?

முடிவில் ஆற்றல் உடைமை என்பது எந்த ஒரு தீய ஆற்றலையும் எந்த நேரத்திலும் தடுத்து நிறுத்தும் எல்லையற்ற ஆற்றலை உடையவன் இறைவன் என்பதை மெய்ப்படுத்தும் பொருட்டு இக் குணம் இன்றியமையாதது ஆயிற்று.

🤔. எண் குணங்களில் வரம்பில் இன்பம் உடைமையின் இன்றியமையாமை யாது?

வரம்பில் இன்பம் உடைமை என்பது, இறைவன் எந்த குறையும் இல்லாதவன்; விருப்பு வெறுப்பு அற்றவன் உயிகளின் இன்பத்திற்கு எல்லையாக இருப்பது துன்பம். எத்தகைய துன்பமும் இல்லாத எல்லை அற்ற இன்பம் உடையவன் இறைவன் என்பதை நிலை நாட்டுவதற்கு இக் குணம் இன்றியமையாதது ஆயிற்று..

🤔. இறைவனை “குணாதீதன்”, “நிற்குணன்” என்று உபநிடதங்களில் கூறப்படுவதற்கு என்ன காரணம்.?

உயிருக்கு உள்ள மாயா குணங்கள் மூன்று. இவை முக்குணங்கள் எனப்படும் அவை சத்துவம், இராசதம், தாமசம் என்பன. இம் முக்குணங்களுள் ஒன்று கூட இல்லாதவன் இறைவன். எனவே இறைவன், குணாதீதன், நிர்க்குணன் எனப்படு கின்றான். அதுவன்றி குணமே இல்லாதவன் எனக் கூறுவது பொருந்தாது. குணம் இல்லாமல் எந்த ஒரு பொருளும் இருப்பதில்லை என்பது தான் உணமை. குணமில்லையேல் குனியும் இல்லை, எனவே இறைவன் குணமே இல்லாதவன் என்று கூறினால் இறைவனே இல்லை என்பது போல ஆகி விடும். அதனால் பொருளை ஐயம் திரிபு அற தெரிந்து கொள்வது அவசியம்.

🤔. உபடநிடதங்களில் இறைவனின் குணத்தை சச்சிதானந்தம் என்கிறார்களே? இதற்கும் எண் குணத்திற்கும் தொடர்பு உண்டா?

உபநிடதங்களில் வரும் சச்சிதானந்தம் என்ற சொல் சிவாகமங்களை கூறும் எண் குணத்தையே மூன்றாக வைத்து பேசப்படுவதையே குறிக்கும். 

(சத்து+சித்து+ஆனந்தம்=சச்சிதானந்தம்) சத்து என்பது – என்றும் ஒரே தன்மையில் நிற்பது ஆகும். 

சித்து என்பது – என்றும் ஒரே தன்மையில் முன்னுணர்வுடன் நிற்பது ஆகும். ஆனந்தம் என்பது – குறைவிலா நிறைவுடைய பேரின்பம் உடமையாகும். எண் குணங்களுள் தன்வயம் உடைமை, தூய உடைமை, இயல்பாகவே பாசம் இன்மை, முடிவில் ஆற்றல் உடைமை இவை நான்கும் சத்து ஆகிய தன்மையையும் 

இயற்கை உணர்வு உடைமை, முற்று உணர்வு உடமை, பேரருள் உடைமை இவை மூன்றும் சித்து ஆகிய தன்மையைக் குறிக்கும். 

வரம்பில் இன்பம் உடைமை இந்த ஒரு குணம் ஆனந்தம் ஆகிய தன்மையைக் குறிக்கும். இவ்வாறு எண் குணமும் சச்சிதானந்தமும் ஒரே பொருளை உடையனவே ஆகும்.