அடியார் பெருமை - உருத்திர பசுபதி நாயனார்

  உருத்திர பசுபதி நாயனார்

தகவல் பலகை	விவரம்
குலம்	அந்தணர்
நாடு	சோழநாடு
ஊர்	திருத்தலையூர்
மாதம்	புரட்டாசி
குரு பூஜை நட்சத்திரம்	அசுவினி
திருத்தொண்டு	பகல்-இரவு பாராமல் ருத்ரம் ஓதியவர்.
திருமுறை	12.23

வளம்செறிந்த சோழவள நாட்டில், பூம்பொழில்கள் நிறைந்த திருத்தலையூரில் எப்போதும் அந்தணர்களின் வேதபாராயண ஓசை வானளாவிக் கேட்டுக்கொண்டேயிருக்கும். அவர்கள் நடத்தும் வேள்வித்தீயின் புண்ணிய பலனால் மாதம் மும்மாரி பெய்து, அந்தப்பகுதி அருளும் பொருளும் அன்பும் அறனும் செழித்து விளங்கியது.

அத்தகைய சீரும் சிறப்பும் மிக்க திருத்தலையூரில் பசுபதியார் என்னும் ஓர் அந்தணர் வாழ்ந்துவந்தார். தமது மரபுகளுக்கு ஏற்ப வேதம், சாஸ்திரம், இதிகாசம், புராணம் ஆகிய அனைத்திலும் அவர் தேர்ச்சி பெற்றிருந்தார். பசுபதியார் எப்போதும் அருமறைப் பயனாகிய ஸ்ரீருத்ரத்தைப் பாராயணம் செய்வதைத் தன் வாழ்வின் தாதுவாகக் கொண்டிருந்தார்.

தினமும் தாமரைக்குளத்தில் நீராடி, கழுத்தளவு நீரில் நின்றபடி, தலைக்குமேல் கைகூப்பி, மனத்தாலும் வாக்காலும் மெய்யாலும் ஸ்ரீருத்ரம் ஓதுவதை அவர் வழக்கமாகக் கொண்டார். உருத்திரபசுபதியாரின் இப்பக்திச் சிறப்பை ஊர்வாசிகள் அனைவரும் பெருமையோடு பேசிக்கொண்டிருந்தனர்.

அவரின் உறுதியான பக்தி எம்பெருமானின் திருவுள்ளத்தை மகிழச்செய்தது. அன்பில் கலங்கிய இறைவன் அவர்மேல் பேரருள் பொழிந்து, உருத்திரபசுபதி நாயனார் தமது திருவடியருகே அரும்பேற்றைப் பெறும்படியாக அருள் புரிந்தார்.

திருச்சிற்றம்பலம்.