ஒளவைக்குறள் - 11. அருள் பெறுதல்

------------

௧௧ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	வீட்டுநெறிப்பால்
அதிகாரம்	11. அருள் பெறுதல்
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பதினொன்றாவது பத்து (அருள் பெறுதல்)

அருளினால் அன்றி அகத்து அறிவு இல்லை

அருளின் மலம் அறுக்கலாம். 101

இறையருள் இருந்தாலன்றி நெஞ்சில் இறைவனை உணரும் அறிவு கிட்டாது. அந்த அகத்தறிவால் ஆணவம், கன்மம், மாயை என்னும் மூன்று மல மாசுகளை அறுக்கலாம்.

இருளைக் கடிந்து இன்று இறைவன் அருளால்

தெருளும் சிவசிந்தை யால். 102

இறைவன் அருளால் மனத்திருள் நீக்கித் தெளிவான சிவசிந்தை கிட்டும்.

வாய்மையாற் பொய்யா மனத்தினால் மாசு அற்ற

தூய்மையாம் ஈசன் அருள். 103

வாய்மையோடு பொய்யா மனத்தோடு வாழ்ந்தால் ஈசன் அருள் மாசற்ற தாய் உள்ளத்தோடு கிட்டும்.

ஒவ்வகத்து நின்ற சிவன் அருள் பெற்றக்கால்

அவ்வகத்துள் ஆனந்தம் ஆம். 104

ஒப்பிய உள்ளத்தோடு நிற்கின்ற சிவன் அருளைப் பெற்றுவிட்டால் அந்த நெஞ்சு ஆனந்த மயமாகும்.

உன்னுங் கருமம் முடிக்கலாம் எள்ளிதாய்

மன்னும் அருள் பெற்றக் கால். 105

இறையருளே நிலைபெற்ற அருள். அதனைப் பெற்றுவிட்டால் நினைத்ததைப் புகழத்தக்க வகையில் செய்து முடிக்கலாம்.

எல்லாப் பொருளும் முடிக்கலாம் ஈசன் தன்

தொல்லை அருள் பெற்றக் கால். 106

ஈசனின் பழமையான அருளைப் பெற்றுவிட்டால் எல்லாப் பொருளையும் இனிதே நிறைவேற்றலாம்.

சிந்தையுள் நின்ற சிவன் அருள் பெற்றக்கால்

பந்தமாம் பாசம் அறும். 107

சிவனருள் சிந்தையில் நிற்கும். அதனைப் பெற்றுவிட்டால் கட்டுப்பாடுகளும், ஆசையும் அறுந்துவிடும்.

மாசற்ற கொள்கை மதிபோலத்தான் தோன்றும்

ஈசன் அருள் பெற்றக் கால். 108

ஈசன் அருளைப் பெற்றுவிட்டால் மாசற்ற கோட்பாடு வானத்து மதியம் போல குளுமையாக ஒளி வீசும்.

ஆ.. ஆ.. என்று ஓதி அருள் பெற்றார்க்கு அல்லாது

தாவாதோ ஞான ஒளி. 109

ஆ ஆ என்று ஓதி அருனினைப் பெற்றவரிடம் அல்லது ஞான வெளிச்சம் தங்கி நிற்காது.

ஓவாச் சிவனருள் பெற்றால் உரை இன்றித்

தாவாத இன்பம் தரும். 110

தடையின்றிச் சிவனருள் பெற்றுவிட்டால் பேச்சொன்றும் இல்லாமல் இன்பம் விளையும்.

----------