ஒளவைக்குறள் - 12. நினைப்புறுதல்

------------

௧௨ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	திருவருட்பால்
அதிகாரம்	12. நினைப்புறுதல்
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பன்னிரண்டாவது பத்து (நினைப்புறுதல்)

கருத்துறப் பார்த்துக் கலங்காமல் உள்ளத்து

இருத்திச் சிவனை நினை. 111

அசைவையொழித்துப் (கலங்காமல்) பார்வையால் உள்ளத்தில் எண்ணங்களை நிலைநிறுத்திக் கருத்தினில் சதா சதாசிவனை நினை.

குண்டலியின் உள்ளே குறித்த அரனைச் சிந்தித்து

மண்டலங்கள் மேலாகப் பார். 112

ஓங்காரமாம் பிரணவத்தின் நடுவில் முக்கலையொன்றி அதன் மேல் ஊன்றிப்பார்.

ஓர்மின்கள் சிந்தையில் ஒன்றச் சிவன் தன்னைப்

பார்மின் பழம் பொருளே யாம். 113

மூல வித்தாகிய விந்துகலையைக் கொண்டு நினைவில் முக்கலையொன்றித்தால் சிவத்தைக் காணலாம். இதுவே அகத்தவமாம்.

சிக்கெனத் தேர்ந்துகொள் சிந்தையில் ஈசனை

மிக்க மலத்தை விடு. 114

ஞானாசிரியனைக் கண்டுகொண்டு, தன் மலங்களை ஒழித்துப் பின் அவனிடமிருந்து அகத்தவம் செய்யும் முறையைக் கற்று அதன்படி செய்து தேர்ச்சியுற்றால் சிவத்தையடையலாம்.

அறமின்கள் சிந்தையில் ஆதாரத்தைச்சேர்ந்து

உறுமின்களும் உ(ள்)ளே ஓர்ந்து. 115

நினைவினில் கலைகளையொன்றித்து உள்ளே எழும் ஒளிவெள்ளத்தில் உள்ளே நடப்பதை அறி.

நித்தம் நினைத்து இரங்கி நின்மலனை ஒன்று விக்கில்

முற்றும் அவன் ஒளியே யாம். 116

இந்திரிய சத்திகளை பிரணவத்தில் ஒன்றுவிக்கில் சிவக்கலையாகிய சக்தி பலம்பெறும்.

ஓசை உணர்ந்து அங்கே உணர்வைப் பெறும் பரிசால்

ஈசன் கருத்தாய் இரு. 117

அறிவை அடையும் முயற்சியில், அநாகத சத்தத்தை யுணர்ந்து, சதா சிவசிந்தனையில் நில்.

இராப் பகல் அன்றி இருசுடர்ச் சிந்திக்கில்

பராபரத்தோடு ஒன்றலும் ஆம். 118

எல்லாக் காலத்தேயும் சூரிய சந்திர கலைகளைச் சந்தித்து சிந்திக்கில் சிவமாகிய பராபரத்தை அடையலாம்.

மிக்க மனத்தால் மிகநினைந்து சிந்திக்கில்

ஒக்க சிவன் உருவம் ஆம். 119

ஒருமித்த மனத்தால் திருவைந்தெழுத்தையே நினைந்து நினைந்து சிவசிந்தனையொடு வாழ சிவனுரு வெளிப்படும்.

வேண்டுவோர் வேண்டும் வகைதான் விரிந்து எங்கும்

காண்டற்கு அரிதாம் சிவம். 120

பார்ப்பதற்கு அரிதாகிய சிவம் ஞானசித்தியடைந்தவர்கள் நினைத்தபடி எத்திக்கும் பரவி நிற்கும்.

----------