ஒளவைக்குறள் - 13. தெரிந்து தெளிதல்

------------

௧௩ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	திருவருட்பால்
அதிகாரம்	13. தெரிந்து தெளிதல்
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பதின்மூன்றாவது பத்து (தெரிந்து தெளிதல்)

தேறித் தெளிமின் சிவம் என்றே உள் உணர்வில்

கூறிய பல்குணமும் ஆம். 121

உடலின் உள்ளே தோன்றும் அறிவாகிய ஓங்காரத்தில் நிலைத்து நின்று, அதையே சிவ சொரூபமென தெளிந்தறிந்தால், ஆன்றோர்களால் சொல்லப்பட்ட ஞானிக்குறிய எல்லாக் குணங்களியும் அடையலாம்.

உண்டில்லை என்றும் உணர்வை அறிந்தக்கால்

கண்டு இல்லை ஆகும் சிவம். 122

அறிவு இருப்பதை அறிந்தவற்குச் சிவத்தை(இறைவனை) உணர்ந்து காணமுடியும். அறிவை அறியாதோருக்கு அது முடியாது.

ஒருவர்க்கு ஒருவனே ஆகும் உயிர்க்கு எல்லாம்

ஒருவனே பல்குணமும் ஆம். 123

ஒப்பற்ற ஞானிகட்குத் தனிச் சிவம் அறிவுமயமான ஒன்றே. ஞானமற்றவர்க்கெல்லாம் அச்சிவமே வேறுபட்ட குணமுடையவனாவான்.

எல்லார்க்கும் ஒன்றே சிவமாவது ஒன்று உணர்ந்த

பல்லோர்க்கும் உண்டோ பவம். 124

சீவர்களுக்கெல்லாம் ஒரே தெய்வம் என்று ஆய்ந்து உணர்ந்தோருக்கு மரணபயமில்லை.

ஆயும் இரவியும் ஒன்றே அனைத்து உயிர்க்கும்

ஆயும் கால் ஒன்றே சிவம். 125

பரந்த உலகுக்கு ஒரே சூரியன் இருப்பதைப் போல அதில் வாழும் அனைத்து சீவன்களுக்கும் சிவம் ஒன்றே.

ஓவாதது ஒன்றே பலவாம் உயிர்க்கு எல்லாம்

தேவானது என்றே தெளி. 126

பலவகையான சீவன்களுக்கெல்லாம் ஓங்காரமே தேவனாகும் (சிவமாகும்).

தம்மை அறியாதார் தாம் அறிவோம் என்பது என்

செம்மையால் ஈசன் திறம். 127

தம்மைத் தாம் அறியாதவர்கள் ஈசனாகிய சிவத்தின் திறத்தை அறிவோமென்று சொல்லுதல் எவ்வாறு?

எல்லா உலகத் தில் இருந்தாலும் ஏத்துவார்கள்

நல்லுலக நாதன் அடி. 128

ஞானத் தேட்டமுடைய எல்லா சீவர்களும் உலக வாழ்வில் அழுந்தியிருந்தாலும் உலகநாதனுடைய திருவடியினை ஏத்தி வணங்குவர்.

உலகத்திற் பட்ட உயிர்க்கு எல்லாம் ஈசன்

நிலவு போல் நிற்கும் நிறைந்து. 129

உலகத்தில் வாழும் எல்லா உயிரினங்களுக்கும், சிவம் நிலவைப்போல நிறைந்த குளுமையை அளிப்பான்.

உலகத்தில் மன்னும் உயிர்க்கு எல்லாம் ஈசன்

அலகிறந்த வாதியே யாம். 130

தன்னைக் காத்துக்கொள்ளும் சக்தியற்ற உயிரினங்களையெல்லாம், சிவன் சீவனாகி அவைகளுக்குள்ளே இருந்து காக்கிறான்.

----------