ஒளவைக்குறள் - 14. கலைஞானம்

------------

௧௪ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	திருவருட்பால்
அதிகாரம்	14. கலை ஞானம்
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பதினான்காவது பத்து (கலை ஞானம்)

சத்தியாம் சந்திரனைச் செங்கதிரோன் ஊடுருவில்

முத்திக்கு மூலம் அது. 131

சத்தியாம் சந்திரனுடைய கலையைச் சூரிய கலையொடு ஊடுருவச் செய்தால் அதுவே முத்திக்கு மூலமாகும்.

அயனம் கொள் சந்திரனால் ஆதித்தன் ஒன்றில்

நயனமா முத்திக்கு வீடு. 132

சூரிய சந்திர கலைகளை ஒன்றித்தால் அதுவே முத்திக்கு வழிவகுக்கும் வீடாகும்.

அஞ்சாலும் மாயாது அறம், பொருள், இன்பமும்

துஞ்சாதவர் துறக்கு மாறு. 133

நித்திரையை வென்றவர்கள் ஐம்பூத இந்திரிய சலனங்களை வெறுப்பதே அறம், பொருள், இன்பம் அடையச் சிறந்த வழியாகும்.

ஈசனோடு ஒன்றி இசையாப் பொருள் இல்லை

தேச விளக்கு ஒளியே யாம். 134

சீவனாகிய சிவத்தொடு ஒன்றினால் எல்லாப் பொருளும் கூடிவரும்; உடலினுள்ளே ஞான ஒளி பிரகாசிக்கும்.

தாம் செய் வினை எல்லாம் தன்மையற உணரில்

காஞ்சனமே ஆகும் கருத்து. 135

அகத்தவத்தால் தன்னைத் தானே உணர்ந்து அறிந்தால், ஒருவன் நினைவில் உதிக்கும் கருத்துக்கள் பொன்போல மதிப்பிற்குரியதாகும்.

கூடகமான குறி எழுத்தைத் தான் அறியில்

வீடகம் ஆகும் விரைந்து. 136

ஆதியெழுத்தாம் மௌன எழுத்தை அறிந்து செயலாற்றினால், இவ்வுடல் விரைவாக மோட்ச வீடாகும்.

வீடக மாக விழைந்தொல்லை வேண்டுமேல்

கூடகத்தில் சோதியோடு ஒன்று. 137

உடல் விரைந்து முத்தியடைய வேண்டுமெனில், உடலினுள்ளே இருக்கும் ஓங்கார சோதியைக் கண்டு அதனுடன் கலக்க வேண்டும்.

பூரித்து நின்ற சிவனைப் புணரவே

பாரித்தது ஆகும் கருத்து. 138

அகத்தவத்தால் கருத்தைப் பொன்னாக்கினால், அருளொளியோடு கூடிய சிவத்தொடு இரண்டற ஒன்றலாம்.

இரேசக மாற்றி இடையறாதே நிற்கில்

பூரிப்பது உள்ளே சிவம். 139

அகத்தவத்தால் மன அசைவின்றி நிலைத்து நின்றால், உடலினுள்ளே சிவம் பூரித்து நிற்கும்.

சிந்தையில் நின்ற நிலைவிசும்பிற் சாக்கிரமாம்

சந்திரனில் தோன்றும் உணர்வு. 140

சத்தியாகிய சந்திரகலையை அறிவு உடலில் பாய்ச்சினால், சாக்கிர நிலையில் இருப்பது போன்ற உயர் உணர்வு கிட்டும்.

----------