ஒளவைக்குறள் - 15. உரு ஒன்றி நிற்றல்

------------

௧௫ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	திருவருட்பால்
அதிகாரம்	15. உருவொன்றி நிற்றல்
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பதினைந்தாவது பத்து (உருவொன்றி நிற்றல்)

எள் அகத்து எண்ணெய் இருந்தது அதனை ஒக்குமே

உள் அகத்து ஈசன் ஒளி. 141

எள்ளுக்குள் எண்ணெய் நிறைந்திருப்பதைப் போல் உடலுக்குள் இருக்கும் பிரணவத்துள் இறைவனின் ஒளியும் நிறைந்து இருக்கிறது.

பாலின் கண் நெய் போல் பரந்து எங்கு நிற்குமே

நூலின் கண் ஈசன் நுழைந்து. 142

பாலில் நெய் மறைந்து உறைந்துள்ளது போல, சிவாகம சாத்திரங்களில் மறைபொருளாய் ஈசன் எங்கும் பரவி நிற்கிறான்.

கரும்பினில் கட்டியும் காய் பாலில் நெய்யும்

இரும்பு உண்ட நீரும் இயல்பு. 143

கரும்பில் கற்கண்டு போலவும், காய்ந்த பாலில் நெய் போலவும், தகிக்கும் இரும்பு உட்கொண்ட நீரைப் போலவும் இறைவன் உயிருடன் கலந்துள்ளான்.

பழத்தின் இரதம் போல் பரந்து எங்கு நிற்கும்

அழுத்தினால் ஈசன் நிலை. 144

பழத்தைப் பிழிந்தால் சாறு வெளிப்படுவது போல், ஞான வினையில் மனதை அழுத்தினால் சிவமாகிய இறைவன் வெளிப்படுவான்.

தனுவொடு தோன்றுமே தான் எல்லாம் ஆகி

அணுவதுவாய் நிற்கும் அது. 145

இறைவன் ஒவ்வொரு உடலிலும் உள்ளும் புறமும் நிறைந்து, அண்ட சராசரங்களிலும் அணுவாய் நீக்கமற நிற்கின்றான்.

வித்து முளைபோல் விரிந்து எங்கு நிற்குமே

ஒத்துளே நிற்கும் உணர்வு. 146

வித்திலிருந்து முளை எழுவது போல், உடலுக்குள் இருக்கும் உணர்வு சூரிய சந்திர கலைகளுடன் கூடி எங்கும் விரிந்து நிற்கும்.

அச்சம் ஆங்காரம் அகத்து அடக்கினால் பின்னை

நிச்சயமாம் ஈசன் நிலை. 147

அச்சத்தையும் அகங்காரத்தையும் மனதிற்குள் அடக்கி ஆட்கொண்டால், ஈசனின் திருநிலை அங்கு வெளிப்படுவது நிச்சயம்.

மோட்டின் நீர் நாற்றம், முளை, முட்டை போலுமே

வீட்டுளே நிற்கும் இயல்பு. 148

பக்குவம் பெற்ற ஆன்மாக்களுக்கு, மேலிடத்து நீர் கீழ்நோக்கிப் பாய்வது போலச் சிவம் விரைவாக வெளிப்பட்டு நிற்கும்.

நினைப்பவர்க்கு நெஞ்சத்துள் நின்மலனாய் நிற்கும்

அனைத்து உயிர்க்கும் தானாம் அவன். 149

தன்னை நினைப்பவர் நெஞ்சத்தில் மாசற்ற ஒளியாய் நிற்கும் ஈசன், அனைத்து உயிர்களுக்கும் தானேயாகி நிற்கிறான்.

ஓசையின் உள்ளே உதிக்கின்றது ஒன்று உண்டு

வாசமலர் நாற்றம்போல் வந்து. 150

மலரிலிருந்து மணம் கமழ்வது போல், நாத ஓசையின் உள்ளிருந்து சதாசிவம் பேரொளியாய் வெளிப்படும்.

----------