ஒளவைக்குறள் - 16. முத்தி காண்டல்

------------

௧௬ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	திருவருட்பால்
அதிகாரம்	16. முத்தி காண்டல்
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பதினாறாவது பத்து (முத்தி காண்டல்)

மனத்தோடு உறு புத்தி ஆங்காரம் சித்தம்

அனைத்தினும் இல்லை அது. 151

மனம், புத்தி, அகங்காரம், சித்தம் ஆகிய அந்தக்கரணங்களுக்கு அப்பாற்பட்டதே முத்தி; இவற்றிற்குள் அது கிடையாது.

வாக்கும் கருத்து மயங்கும் சமயங்கள்

ஆக்கிய நூலினும் இல். 152

சொல்லாற்றல் மிக்கவர்களாலும், புகழுக்கு ஆசைப்படுபவர்களாலும் இயற்றப்பட்ட மயக்கமுறும் சமய நூல்களால் முத்தி கிட்டாது.

உருவம் ஒன்று இல்லை உணர்வு இல்லை ஓதும்

அருவமும் தான் அதுவே ஆம். 153

முத்தி என்பது உருவம், அருவம், புலன் உணர்வு ஆகியவற்றைக் கடந்த, கால எல்லை இல்லாத நித்திய நிலையாகும்.

தனக்கு ஒரு உரு இல்லை தான் எங்கும் ஆகி

மனத்து அகமாய் நிற்கும் அது. 154

உருவமற்ற முத்தியானது உடலில் எங்கும் நீக்கமறப் பரவி, எண்ணங்கள் உதிக்கும் இடத்திலே நிலைபெற்று நிற்கும்.

பெண் ஆண் அலி என்னும் பேர் ஒன்று இலதாகி

விண் ஆகி நிற்கும் வியப்பு. 155

முத்தி நிலையானது ஆண், பெண், அலி என்ற பாலின அடையாளங்கள் அற்றதாய், அறிவு வெளியாய் வியக்கத்தக்க வகையில் அமையும்.

அனைத்து உருவமாய அறிவை அகலில்

தினைத்துணையும் இல்லை சிவம். 156

எல்லா உருவங்களிலும் நிறைந்துள்ள பேரறிவாகிய பிரணவத்தை உணராதவரை, அணுவளவும் சிவத்தை அடைய முடியாது.

துணிமுகத்துக்கு ஆதி யாத்து உன் அறிவு இன்றி

அணிதார் இரண்டு விரல். 157

சின்முத்திரையில் இரு விரல்கள் இணைவது போல், உன் அறிவை ஆதியுடன் இணைத்தால் முத்தி சித்தியாகும்.

மயிர்முனையில் பாதி மனத்து அறிவு உண்டேல்

அயிர்ப்பு உண்டு அங்கு ஆதி நிலை. 158

மயிர் முனையில் பாதியளவு கூட அசைவற்ற நுட்பமான மன ஒருமைப்பாடு இருந்தால், அங்கு ஆதிநிலை தென்படும்.

தற்பரம் ஆன சதாசிவத்தோடு ஒன்றில்

உற்று அறிவு இல்லை உயிர்க்கு. 159

சீவன் சதாசிவத்தோடு ஒன்றிவிடும்போது, உலகியல் சார்ந்த சிற்றறிவும் புலன் உணர்ச்சிகளும் நீங்கிப் பேரின்பம் கிட்டும்.

உறக்கம் உணர்வு பசிகெடப் பட்டால்

பிறக்கவும் வேண்டா பிறப்பு. 160

உறக்கம், புலன் உணர்ச்சி, பசி ஆகியவற்றை வென்றுவிட்டால், மீண்டும் இப்பூவுலகில் பிறக்க வேண்டிய அவசியம் இல்லை.

----------