ஒளவைக்குறள் - 17. உருபாதீதம்

------------

௧௭ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	திருவருட்பால்
அதிகாரம்	17. உருபாதீதம்
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பதினேழாவது பத்து (உருபாதீதம்)

கருவு இன்றி வீடாம் கருத்துற வேண்டில்

உருவு இன்றி நிற்கும் உணர்வு. 161

உடலை இயக்கும் மனம், புத்தி முதலான கருவிகள் இல்லாது கருத்தை அசைவற்று நிறுத்தினால், அறிவு உருவற்ற நிலையில் நிலைக்கும்.

பிறத்தல் ஒன்று இன்றிப் பிறவாமை வேண்டில்

அறுத்துருவ மாற்றி இரு. 162

பிறப்பிற்கு காரணமான அந்தக்கரணங்களைச் சிவ சிந்தனையால் அறுத்து மாற்றினால், மீண்டும் பிறவா நிலை கிட்டும்.

உருவங்கள் எல்லாம் அறுத்தற மாற்றில்

கருவேதும் இல்லை தனக்கு. 163

புற உருவப் பற்றுகளை முழுமையாக நீக்கினால், மீண்டும் பிறப்பதற்கான வினைக் கரு ஏதும் மிஞ்சாது.

கறுப்பு வெளுப்பு சிவப்பு உறு பொன்பச்சை

அறுத்து உருவ மாற்றி யிரு. 164

ஐம்பூதங்களின் குணங்களாகிய நிறங்களை அவற்றின் இடத்திலிருந்து மாற்றி, பிரணவத்துள் ஒடுக்கி ஞான நிலையில் இரு.

அனைத்து உருவம் எல்லாம் அறக்கெடுத்து நின்றால்

பினைப் பிறப்பு இல்லையாம் வீடு. 165

எண்ணங்களுக்கு இடம் தராமல் மனதை அசைவற்று நிறுத்தினால், உதிக்காத எண்ணங்களால் மறுபிறப்பில்லா வீடுபேறு கிட்டும்.

நினைப்பு மறப்பு அற்று நிராகரித்து நின்றால்

தனக்கு ஒன்றும் இல்லை பிறப்பு. 166

நினைப்பதையும் மறப்பதையும் கடந்து ஒருநிலைப்பட்டு நின்றால், பிறவித் துயரம் அற்றுப்போகும்.

குறித்து உருவம் எல்லாம் குறைவு இன்றி மாற்றில்

மறித்துப் பிறப்பு இல்லை வீடு. 167

தியானத்தின் மூலம் எண்ண அலைகளை முழுமையாக உருமாற்றினால், மீண்டும் பிறவாத முத்தி நிலை கைவரப்பெறும்.

பிதற்றும் உணர்வை அறுத்துப் பிரபஞ்ச விகற்பம்

உணர்வதே வீடு. 168

உலக வேறுபாடுகளைப் பேசும் வீண் உணர்ச்சிகளை விலக்கி, மெய்யறிவோடு ஒன்றி நிற்பதே வீடுபேறாகும்.

பிறப்பு அறுக்க வீடாம் பேர் உவமை இன்றி

அறுத்து உருவ மாற்றி இரு. 169

அறியாமை எனும் அஞ்ஞான குணங்களை அறுத்தெறிந்து, உவமையற்ற சிவயோக நிலையில் நிலைத்திரு.

ஓசை உணர்வோடு உயிர்ப்பு இன்மை அற்றக்கால்

பேசவும் வேண்டா பிறப்பு. 170

நாத ஓசை, உணர்வு மற்றும் உயிர்ப்பு ஆகியவற்றை ஒருமுகப்படுத்தினால் எண்ணங்கள் அழியும், பிறவியும் அறும்.

----------