ஒளவைக்குறள் - 18. பிறப்பு அறுதல்

------------

௧௮ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	திருவருட்பால்
அதிகாரம்	18. பிறப்பறுதல்
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பதினெட்டாவது பத்து (பிறப்பறுதல்)

தன்னை அறியும் அறிவுதனைப் பெறில்

பின்னைப் பிறப்பு இல்லை வீடு. 171

“தான் யார்?” என அறிவதற்குரிய கருவியான ஓங்காரத்தை உணர்ந்தால், மீண்டும் பிறப்பற்ற முத்தி நிலையை அடையலாம்.

அறம் பாவம் ஆயும் அறிவு தனைக் கண்டால்

பிறந்து உழல வேண்டா பெயர்ந்து. 172

பாவ புண்ணியங்களை ஆராய்ந்து அறியும் மெய்யறிவாகிய பிரணவத்தை உணர்ந்தால், பிறவி எடுத்து உலகில் உழல வேண்டிய அவசியம் இல்லை.

சிவன் உருவம் தானாய்ச் செறிந்து அடங்கி நிற்கில்

பவ நாசமாகும் பரிந்து. 173

ஞான வினையின் வலிமையால் சிவ உருவம் பிரணவத்தில் ஒன்றி அசைவற்று நின்றால், பிறவித் துயரம் (பவம்) முற்றிலுமாக அழியும்.

உறக்கம் உணர்வோடு உயிர்ப்பு இன்மை அற்றால்

பிறப்பு இன்றி வீடாம் பரம். 174

உறக்கம், உலகியல் உணர்வு, பிராண அசைவு ஆகியவை ஒழிந்து நின்றால், இவ்வுடல் இறை உறையும் பரம வீடாகும்.

நினைப்பு மறப்பு நெடும் பசியும் அற்றால்

அனைத்து உலகும் வீடாம் அது. 175

நினைவு, மறதி மற்றும் உடற்பசி ஆகியவை நீங்கிய இடமே ஆன்மா அடையும் உன்னதமான வீடுபேறாகும்.

உடம்பு இரண்டும் கெட்டால் உறு பயன் ஒன்று உண்டு

திடம்படும் ஈசன் திறம். 176

தூல மற்றும் சூக்கும உடல்கள் என்ற பாகுபாடு நீங்கி ஒன்றாய்க் கலந்தால், ஈசனின் பேரருள் உறுதியாகக் கிட்டும்.

தன்னை அறிந்து செறிந்து அடங்கித் தான் அற்றால்

பின்னைப் பிறப்பில்லை வீடு. 177

தன்னைத் தானாக அறியும் அறிவோடு அடங்கி, 'நான்' எனும் அகந்தை அற்றால், மீண்டும் இப்பிறவி கிடையாது.

மருள் அன்றி மாசு அறுக்கின் மாதூ வெளியாய்

இருள் இன்றி நிற்கும் இடம். 178

மயக்கம் நீக்கி மும்மல மாசுகளை ஒழித்தால், அகண்ட வெளியாய் இருளற்ற பேரொளி முத்திப் பேறாகத் தோன்றும்.

விகாரம் கெட மாற்றி மெய் உணர்வு கண்டால்

அகாரமாம் கண்டீர் அறிவு. 179

உடல் சார்ந்த விகாரங்களை ஒழித்து மெய்யுணர்வை அடைந்தால், அகாரமாகிய ஓங்கார அறிவு வெளிப்படும்.

சிந்தயாம் காரம் செறி புலன் அற்றக்கால்

முந்தியே ஆகுமாம் வீடு. 180

புறத்தே செல்லும் ஐம்புலன்களின் செயல்களை நீக்கிச் சிந்தையை ஒருநிலைப்படுத்தினால், முத்தி நிலை கைவசமாகும்.

----------