ஒளவையார் - 19. தூய ஒளி காண்டல்

------------

௧௯ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	திருவருட்பால்
அதிகாரம்	19. தூய ஒளி காண்டல்
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பத்தொன்பதாவது பத்து (தூய ஒளி காண்டல்)

தோன்றியது எல்லாம் தொடக்கு அறுத்துத் தூய்வெளியாய்த்

தோன்றியக் காற்றூய ஒளி. 181

அஞ்ஞான தத்துவங்களின் பற்றுகளை நீக்கி, மலங்களை அறுத்துவிட்டால், சிந்தனையில் தூய ஆன்ம ஒளி பிரகாசிக்கும்.

தெளிவாய தேசவிளக்கு ஒளியைக் காணில்

வெளியாய வீடு அதுவே ஆம். 182

வீடாகிய உடலில் சிவ ஒளியைக் காணப்பெற்றால், அண்டத்தில் உள்ள அனைத்தையும் தெளிவாகக் காணும் முத்தி நிலை கிட்டும்.

மின்போல் உருவ விளக்கு ஒளிபோல் மேற்காணில்

முன்போல மூலம் புகும். 183

மூலக்கினியைச் சிரத்தின் மேல் எழுத்திப் பார்த்துப் பின் உந்திக் கமலத்தில் ஒடுக்குவது யோக முறையாகும்.

பளிங்கு வலம்புரி பானிகர்த்த தாகில்

துளங்கு ஒளியாம் தூய நெறி. 184

பளிங்கு போன்ற தூய ஆன்ம ஒளி, உச்சியில் அசைவுடன் விளங்குவதே வீடுபேறு அடையும் தூய நெறியாகும்.

சங்கு நிறம்போற் றவளவொளி காணில்

அங்கையி னெல்லியே யாகும். 185

ஆன்ம ஒளியைச் சங்கின் வெண்மை நிறம்போல் தரிசித்தால், உலக உண்மைகள் யாவும் உள்ளங்கை நெல்லிக்கனி போல் விளங்கும்.

துளங்கிய தூண்டா விளக்கு ஒளி காணில்

விளங்கிய வீடாம் விரைந்து. 186

உச்சியில் சுடர்விடும் தூண்டா விளக்கின் ஒளியைக் கண்டால், ஆன்ம ஒளி உடலெங்கும் பிரகாசித்து விரைவாக வீடுபேறு தரும்.

மின்மினி போன்ற விளக்காகத் தான் தோன்றில்

அன்னப் பறவையே ஆம். 187

ஆன்ம ஒளி மின்மினி போல் தோன்றினால், சீவன் அன்னப்பறவை போலப் பாலையும் நீரையும் பிரிக்கும் ஞானப் பண்பினைப் பெறும்.

உள் ஒளி தோன்றில் உணரில் அருள் ஒளி

அவ் ஒளி ஆதி ஒளி. 188

உடலினுள் எழும் மூலாக்கினியை உணர்ந்தால், அதுவே இறைவனின் பேரருள் ஒளியாகவும் ஆதி ஒளியாகவும் விளங்கும்.

பரந்த விசும்பில் பரந்த ஒளிகாணில்

பரம்பரமே ஆய ஒளி. 189

யோகப் பயிற்சியால் அகண்ட ஆகாயத்தில் பரந்து விரிந்து கிடக்கும் ஒளியைத் தரிசித்தால், அதுவே பரம்பொருள் ஒளியாகும்.

ஆதி ஒளியாகி ஆள்வானும் தானாகி

ஆதி அவன் உருவும் ஆம். 190

மூலாக்கினியாய் இருந்து உடலை ஆள்பவனும் தானாகி, அந்த ஆதி இறைவனின் திருவுருவமும் தானாகவே விளங்கும் நிலை இது.

----------