ஒளவைக்குறள் - 10. பத்தி உடைமை

௧0 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	வீட்டுநெறிப்பால்
அதிகாரம்	10. பத்தியுடைமை
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - பத்தாவது பத்து (பத்தியுடைமை)

பத்தியால் உள்ளே பரிந்தரனைத் தான் நோக்கில்

முத்திக்கு மூலம் அது. 91

பத்தியோடு உள்ளத்தில் ஆர்வம் கொண்டு அரனை நோக்கினால் அது முத்திக்கு வேர்.

பாடியு ஆடியும் பல்காலும் நேசித்துத்

தேடும் சிவ சிந்தையால். 92

பலமுறை சிவன் மீது நேசம் வைத்துச் சிவ நினைவோடு பாடுதல், ஆடுதல் பத்தி.

அன்பால் அழுதும் அலறியும் ஆள்வானை

என்பு உருகி உள்ளே நினை. 93

சிவன் மீதுள்ள அன்பால் அழுதல், கூச்சலிடுதல், தன்னை ஆளும் பெருமானை தன் எரும்பெல்லாம் உருகும்படி நினைத்தல் ஆகியவை பத்தி.

பூசனை செய்து புகழ்ந்து மனம் கூர்ந்து

நேசத்தால் ஈசனைத் தேடு. 94

பூ போட்டுப் பூசனை செய்து, புகழ்ந்து பாடி, மனம் நிறைவோடு, நேசம் கொண்டு ஈசனைத் தேடு.

கண்ணால் உறப்பார்த்துக் காதலாற் தான் நோக்கில்

உண்ணுமே ஈசன் ஒளி. 95

மனக்கண்ணால் பார்த்து, உள்ளத்தில் ஊறும் காதலால் உற்று நோக்கினால், ஈசன் ஒளி நம்மை உண்டு ஆள்கொள்ளும்.

நல்லானப் பூசித்து நாதன் என உருகில்

நில்லதோ ஈசன் நிலை. 96

நல்லவனுக்குப் பூசை செய்து ‘நாதன்’ என எண்ணி உள்ளம் உருகினால், ஈசன் நம்மிடம் நிலைகொள்வான்.

அடியார்க்கு அடியராய் என்பு உருகித் தம்முள்

படி ஒன்றிப் பார்த்துக் கொளல். 97

அடியவர்களுக்கு அடியவராய் அவர்மீது அன்பு கொண்டு உருகி, உள்ளம் படிந்து, அவரோடு உள்ளம் ஒன்றியிருக்கும்படிப் பார்த்துக்கொள்.

ஈசன் எனக்கருதி எல்லா உயிர்களையும்

நேசத்தால் நீ நினைந்து கொள் 98

எல்லா உயிர்களையும் ஈசன் எனக் கருதி, நேசத்தோடு பழகவேண்டும்.

மெய்ம்மயிர் கூர விருப்புற்று வேர்த்து எழுந்து

பொய்ம்மையில் ஈசனைப் போற்று. 99

உடம்பில் உள்ள மயிர்க் கால்கள் வேர்க்கும்படி விதிர்விதிர்த்து பொய்ம்மைக் கோலம் ஆகும்படி ஈசனைப் போற்று.

செறிந்து அறிந்து நாடிச் செவ்விதாய் உள்ளே

அறிந்து அரனை ஆய்ந்து கொளல். 100

உள்ள உறுதியோடும் அடக்கத்தோடும் செவ்விய முறையில் அரனை அறிந்துகொள்ள வேண்டும்.