ஒளவைக்குறள் 9 - உள்ளுணர்வு

௯ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	வீட்டுநெறிப்பால்
அதிகாரம்	09. உள்ளுணர்வு
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - ஒன்பதாவது பத்து (உள்ளுணர்வு)

எண்ணிலி ஊழி தவம் செய்து இங்கு ஈசனை

உண்ணிலைமை பெற்றது உணர்வு. 81

எண்ணமுடியாத ஊழிக் காலம் தவம் செய்து ஈசன் தனக்குள் இருக்கிறான் என்பதை உணர்வு கண்டுகொண்டது.

பல் ஊழி காலம் பயின்றனை அர்ச்சித்து

நல் உணர்வு பெற்ற நலம். 82

பல ஊழிக் காலம் அந்த அரனோடு பழகி, அருச்சித்து, நல்ல உணர்வுகளை நலமாக இருப்புக் கொள்ளும் பேற்றினைப் பெற்றுள்ளேன்.

எண்ணற்கரிய வரும் தவத்தால் அன்றே

நண்ணப் படும் உணர்வு தான். 83

நினைத்துக்கூடப் பார்க்க முடியாத அரிய தவத்தால்தான் இந்த உணர்வு கைகூடும்.

முன்னைப் பிறப்பின் முயன்ற தவத்தினால்

பின்னைப் பெறும் உணர்வு தான். 84

முற்பிறவியில் முயன்று பெற்ற தவத்தால் இப்பிறவியில் இந்த உணர்வு கைவரப் பெற்றுள்ளேன்.

காயக்கிலேசம் உணர்ந்த பயன் அன்றே

ஓயா உணர்வு பெறல். 85

உடம்பாகிய உருப்பொருள் உணர்ந்ததன் பயன்தான் ஓயாத இந்த உணர்வு கைவரப் பெற்றுள்ளேன்.

பண்டைப் பிறவிப் பயனாம் தவத்தினால்

கண்டு அங்கு உணர்வு பெறல். 86

முந்தைய பிறவியின் பயனால் இந்தப் பிறவியில் தவம் செய்து இந்த உணர்வினைப் பெற்றுள்ளேன்.

பேராத் தவத்தின் பயனாம் பிறப்பு இன்மை

ஆராய்ந்து உணர்வு பெறின். 87

இடம் பெயராமல் செய்த தவத்தின் பயன்தான் மறுபிறப்பு இல்லாத பேறு. ஆராய்ந்து உணர்ந்தால் இது புலப்படும்.

ஞானத்தால் ஆய உடம்பின் பயன் அன்றே

மோனத்தால் ஆய உணர்வு. 88

ஞான உணர்வை உடல் பெற்றுள்ளது. மோன உணர்வே அதன் பயன்.

ஆதியோடு ஒன்றும் அறிவைப் பெறுவதுதான்

நீதியால் செய்த தவம். 89

ஆதியோடு கலந்து ஒன்றாகும் அறிவினைப் பெறுவதுதான் முறையாகச் செய்யும் தவத்தின் பேறு.

காடு மலையும் கருதித் தவம் செய்தால்

கூடும் உணர்வின் பயன். 90

நாம் போகும் சுடுகாடும் சிவன் இருக்கும் மலையும் கருத்தில் கொண்டு தவம் செய்தால் உணர்வின் பயனைப் பெறலாம்.