ஒளவைக்குறள் - 8. அர்ச்சனை

௮ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	வீட்டுநெறிப்பால்
அதிகாரம்	08. அர்ச்சனை
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - எட்டாவது பத்து (அர்ச்சனை)

மண்டலங்கள் மூன்று மருவவுட நிறுத்தி

அண்ட அரனை அர்ச்சிக்கு மாறு. 71

காலை, மதியம், மாலை என்னும் மூன்று மண்டல காலங்களிலும் அரனை அரவணைத்து உடன் வைத்துக்கொள்ளுதல் என்பது சிவனுக்கு அருச்சனைப் பூசை செய்யும் முறையாகும்.

ஆசனத்தைக் கட்டி அரன் தன்னை அர்ச்சித்து

பூசனை செய்து உள்ளே புணர். 72

இருக்கையில் அமர்ந்துகொண்டு சிவனை அருச்சனை செய்து, சிவனுக்குப் பூ போட்டுப் பூசை செய்து அவனைப் புணரவேண்டும்.

உள்ளமே பீடம் உணர்வே சிவலிங்கத்

தெள்ளியர் அர்ச்சிக்கு மாறு. 73

உள்ளம் இருக்கையா, உணர்வு சிவலிங்கமா இருத்திக்கொண்டு அருச்சிக்கும் முறைமையைத் தெளிவுடையோர் பின்பற்றுவர்.

ஆதாரத்துள்ளே அறிந்து சிவன் உருவைப்

பேதமற அர்ச்சிக்கு மாறு. 74

மூலாதாரத்தில் சிவனுருவம் இருப்பினை உணர்ந்து மனம மாறுபாடு இல்லாமல் அருச்சிப்பதே நெறிமுறை ஆகும்.

பூரித்து இருந்து புணர்ந்து சிவன் உருவைப்

பாரித்து அங்கு அர்ச்சிக்கு மாறு. 75

புணர்ச்சியின்போது ஆணுறுப்பு பூரிப்பது போலவும், பெண்ணுறுப்பு பாரித்து விரிவது போலவும் சிவனுரு இலிங்கத்தை அருச்சிக்க வேண்டும்.

விளக்குறு சிந்தையான் மெய்ப்பொருளைக் கண்டு

துளக்கு அற அர்ச்சிக்கு மாறு. 76

விளக்கினைத் தூண்டுவது போல சிந்தையைத் தூண்டிக்கொண்டு பெய்ப்பொருளை மனம் அங்குமிங்கும் ஆடாமல் அருச்சிப்பதே நெறிமுறை ஆகும்.

பிண்டதின் உள்ளே பேராது இறைவனைக்

கண்டு தான் அர்ச்சிக்கு மாறு. 77

தன் உடலாகிய பிண்டத்துக்குள்ளே பெயராமல் இருக்கும் இறைவனைக் கண்டு அருச்சிக்க வேண்டும்.

மந்திரங்கள் எல்லாம் மயங்காமல் உள் நினைந்து

முன் அரனை அர்ச்சிக்கு மாறு. 78

மந்திரங்கள் எல்லாவற்றையும் மயக்கம் இல்லாமல் உள்ளத்தில் நினைத்துப் பார்த்து தன் அகக் கண் முன்னே நிற்கும் அரன் என்னும் சிவனை அருச்சிப்பதே முறைமை.

பேராக் கருத்தினாற் பிண்டத்தின் உள் நினைந்து

தாராதனை செய்யு மாறு. 79

பேராத கருத்தோடு பிண்டத்துக்கொள்ளே இறைவன் இருப்பை நினைத்துக்கொண்டே பூ போடும் ஆராதனை செய்ய வேண்டும்.

உள்ளத்தினுள்ளே உறப்பார்த் தங்கு ஒண் சுடரை

மெள்ளத்தான் அர்ச்சிக்கு மாறு. 80

மனத்துக்குள்ளே சுடர் விட்டு எரியும் சிவ-விளக்கை பொருத்திப் பார்த்துக்கொண்டே மென்மையோடு அருச்சிக்க வேண்டும்.