ஒளவைக்குறள் - 7 அமுத தரணை

௭ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	வீட்டுநெறிப்பால்
அதிகாரம்	07. அமுததாரணை
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - ஏழாவது பத்து (அமுததாரணை)

அண்ணாக்குத் தன்னை அடைத்து அங்கு அமிர்து உண்ணில்

விண்ணோர்க்கு வேந்தனும் ஆம். 61

தூய காற்றானது அண்ணாக்கை அடைந்து வெளிவருமாறு பயிற்சி செய்தால், தேவர்களுக்கே அரசன் ஆகலாம்.

ஈரெண் கலையினில் இறைந்த அமிர்து உண்ணில்

பூரணம் ஆகும் பொலிந்து. 62

16 கலைகளில் நிறைந்திருக்கும் அமிழ்தக் காற்றை உட்கொண்டால் உடம்பும் உயிரும் நிறைவுற்றதாகப் பொலிவு பெறும்.

ஓங்காரமான கலசத்து அமிர்து உண்ணில்

போங்காலம் இல்லை புரிந்து. 63

“ஓம்” என்னும் ஒலியுடன் அமிழ்தக் காற்றை உண்டால் சாகாமல் வாழலாம்.

ஆனகலசத்து அமிழ்தை அறிந்து உண்ணில்

போனகம் வேண்டாமற் போம். 64

துரியம் என்னும் கலசத்தில் நினைவை நிலைநிறுத்தினால் உணவு இல்லாமல் வாழமுடியும்.

ஊறும் அமிர்தத்தை உண்டி உறப் பார்க்கில்

கூறும் பிறப்பு அறுக்கலாம். 65

நினைவாக ஊறும் அமிழ்தத்தை உணவாக்கிக்கொண்டு பார்த்தால், பிறவியை அறுக்க முடியும்.

ஞான ஒளி விளக்கானல் அமிர்து உண்ணில்

ஆன சிவ யோகி யாம். 66

ஞானம் என்னும் விளக்கில் ஒளி ஏற்றி அமிழ்தம் உண்டால் “சிவயோகி” ஆகலாம்.

மேலை அமிர்தை விளங்காம் அற்றா உண்ணில்

காலனை வஞ்சிக்க லாம். 67

நாச்சுவையாகிய மேலை அமிழ்தத்தை விளங்காமல் அடக்கி காற்றமிழ்தத்தை உண்டால் எமனை ஏமாற்றலாம்.

காலனல் ஊக்கங் கலந்த அமிர்து உண்ணில்

ஞான மதுவா நயந்து. 68

மூச்சுக் காற்று என்னும் அனல்-சூடு கலந்த அமிழ்தத்தை உண்டால் அதுதான் “ஞானம்”.

எல்லையில் இன் அமிர்தம் உண்டாம் இனிது இருக்கில்

தொல்லை முதல் ஒளியே யாம். 69

எல்லை இல்லா இந்த இனிய அமிழ்தை உண்ட நிலையில் இருந்தால் அதுதான் ஆதியில் தோன்றிய முதல் மூச்சொளி ஆகும்.

நிலாமண்டபத்தினில் இறைந்த அமிர்து உண்ணில்

உலாவலாம் அந்தரத்தின் மேல். 70

பிறை நிலா மண்டபமாகிய ஆக்கினையில் அமிழ்தம் உண்டால் அந்தரத்தில் உலாவலாம்.