ஒளவைக்குறள் - 6 அங்கி தாரணை

௬ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	வீட்டுநெறிப்பால்
அதிகாரம்	06. அங்கிதாரணை
தொடர்புடைய சிந்தனை	திரு மந்திரம் திருக்குறள் அப்பர் தேவாரம்

சைவ சமயக் கருத்துக்களைக் கொண்ட இந்நூலை

திருமூலரின் திருமந்திரத்தின் சுருக்கம் எனக் கூறுவர்.

💡 ஞானக்குறள் - ஆறாவது பத்து (அங்கிதாரணை)

அந்தத்தில் அங்கி அழல்போலத் தான் நோக்கிற்

பந்தப் பிறப்பு அறுக்கலாம். 51

முடிவில் அங்கியை எரியும் தீயைப் போல நோக்கினால் நம்மோடு பின்னிக் கிடக்கும் பிறவியை அறுத்துவிடலாம்.

உள்ளும் புறம்பும் ஒருங்கக் கொழுவூரிற்

கள்ள மலம் அறுக்கலாம். 52

அங்கி உடம்புக்குள்ளும் உடம்புக்கு வெளியிலும் ஊறுமாறு நுரையீரலில் நிறுத்திப் பயிற்சி செய்தால், உடம்புக்கு உள்ளே சேரும் அழுக்குகளைப் போக்கிக் கொள்ளலாம்.

எரியுங் கழல்போல உள்ளுற நோக்கிற்

கரியும் கனல் உருவமாம். 53

நம் உடல் எரிவது போன்று பாவனைப் பயிற்சி செய்தால் நம் உடம்பு உயிருடன் இருந்துகொண்டே எரிந்த கரியாக மாறும்.

உள் அங்கி தன்னை ஒருங்கக் கொழுவூறில்

வெள் அங்கி தானாம் விரைந்து. 54

உள்ளத்தில் இருக்கும் அங்கி உடலோடு ஒன்றுபட்டு நுரையீரலில் ஊறினால் உடலில் இருக்கும் அங்கி வெண்ணிறச் சுடருடன் எரியும்.

உந்தியின் உள்ளே ஒருங்கச் சுடர்பாய்ச்சி

அந்தி அழல் உருவ மாம். 55

அங்கியைத் தொப்புகுக்கு உள்ளே பாயும்படிச் செய்தால் அந்தி நேரம் போல அங்கி செந்நிறம் கொள்ளும்.

ஐயைந்து மாய அகத்துல் எரி நோக்கிற்

பொய் ஐந்தும் போகும் புறம். 56

பொறி ஐந்தும், புலன் ஐந்துமாக இருக்கும் உடலுக்குள்ளே உணர்வுகளை நோக்கினால் பொய்மை உணர்வுகள் ஐந்தும் நீங்கிவிடும்.

ஐம்பது ஒன்று மழல் போலத் தான் நோக்கில்

உம்பர் ஒளியாய் விடும். 57

உடலிலுள்ள 51 கூறுகளை கொழுந்து விட்டு எரியும் அழல் போல நோக்கினால் வானுலக ஓளி வெளிப்படும்.

தூண்டும் சுடரைத் துளங்காமற் தான் நோக்கில்

வேண்டுங் குறை முடிக்கலாம். 58

மனவெழுச்சிச் சுடரை துளங்கி எரிய விடாமல் பார்த்துக்கொண்டால் நமக்கு வேண்டிய குறைகளை நிறைவாக்கிக் கொள்ளலாம்.

உள்ளத்தால் அங்கி ஒருங்கக் கொழுவூறில்

மெள்ளத்தான் வீடாம் விரைந்து. 59

மன எழுச்சி அங்கி மனக் கொழுவாகிய கரு மையத்தில் ஊறினால், மெல்ல மெல்ல வீடுபேறாக அது மாறும்.

ஒள்ளிதாய் உள்ள சுடரை உறநோக்கில்

வெள்ளியா மாலை விளக்கு. 60

ஒளியுடன் திகழும் சுடரை உணர்வினில் பொருத்திப் பார்த்தால் மன-மாலையாகிய செந்நிற விளக்கு வெள்ளியாக மாறி ஒளிரும்.