ஒளவைக் குறள் - 26. சிவ யோக நிலை

௨௬ 

ஒளவையார் அருளிச்செய்த

ஞானக்குறள்

தகவல் பலகை	விவரம்
பால்	திருவருட்பால்
அதிகாரம்	26. சிவயோக நிலை
தொடர்புடைய சிந்தனை	திரு மந்திரம் திருவாசகம் வாசி யோகம்

பிராணாயாம இரகசியங்களை விளக்கும்

சிவயோகப் பயிற்சி நெறி.

💡 ஞானக்குறள் - இருபத்தி ஆறாவது பத்து (சிவயோக நிலை)

அடிமிசை வாயு வடுத்தடுத் தேகி

முடிமிசை யோடி முயல். 251

கீழ்நோக்கிச் செல்லும் அபான வாயுவைத் திருவடிகளிலிருந்து மேல்நோக்கித் திருப்பி, பிரணவ உச்சிக்குள் செலுத்த முயல்வதே சிவயோக நிலையாகும்.

உண்ணாடி வாயு அதனை உடன் நிறப்பி

விண்ணோடு மெள்ள விடு. 252

உடலின் உள்ளே இயங்கும் அபான வாயுவை உணர்ந்து, அதனைச் சிதாகாயத்தில் மெல்ல நிலைபெறச் செய்வதே யோகத்தின் இரேசக-பூரகத் தந்திரமாகும்.

மெள்ள விரேசித்து மெய்விம்மிப் பூரித்துக்

கொள்ளுமின் கும்பம் குறித்து. 253

மெதுவாகக் காற்றை வெளியேற்றி, உடல் சிலிர்க்கும்படி உள்ளே நிரப்பி, அந்த அசைவற்ற கும்பக நிலையை அறிந்து பேரின்பம் எய்துங்கள்.

---

திருவாசகச் சிந்தனை:

"மெய்தான் அரும்பி விதிர்விதிர்த்து உன் விரை ஆர் கழற்கு... பொய்தான் தவிர்ந்து உன்னைப் போற்றி சயசய போற்றி!"

இரேசகம் முப்பத்திரண்டது மாத்திரை

பூரகம் பத்தாறு புகும். 254

காற்றை வெளியேற்றும் இரேசகத்திற்கு முப்பத்திரண்டு மாத்திரை காலமும், உள்ளே இழுக்கும் பூரகத்திற்குப் பதினாறு மாத்திரை காலமும் கொள்ள வேண்டும்.

---

திருமந்திரச் சிந்தனை:

"ஏறுதல் பூரகம் ஈரெட்டு வாமத்தால்... ஊறுதல் முப்பத் திரண்டதி ரேசகம்."

கும்பக நாலோடு அறுபது மாத்திரை

தம்பித்து இடுவது தான். 255

பிராண அபான வாயுக்களை அசைவற்ற நிலையில் அறுபத்து நான்கு மாத்திரை காலம் நிறுத்தி வைப்பதே கும்பகமாகும்.

முன்னம் இரேசி முயலுபின் பூரகம்

பின்னது கும்பம் பிடி. 256

யோகப் பயிற்சியை இரேசகத்தில் தொடங்கி, பூரகத்தைச் செய்து, இறுதியில் கும்பகத்தில் நிலைபெறச் செய்ய வேண்டும்.

ஈரைந்து எழுபத்தி ஈராயிர நாடியும்

சேருமின் வாயுச் செயல். 257

வாயுக்களை முறைப்படுத்துவதால் ஐம்புலன்களும், உடலிலுள்ள எழுபத்திரண்டாயிரம் நாடிகளும் ஒருமைப்பட்டுத் தூய்மையடையும்.

வாசல் ஈர் ஐந்து மயங்கிய வாயுவை

ஈசன் தன் வாசலில் ஏற்று. 258

உடலின் புற வாசல்கள் வழிச் சிதறும் காற்றை ஒருமுகப்படுத்தி, ஈசனின் வாசலாகிய சுழுமுனை வழியே செலுத்திச் சிவனருள் பெறலாம்.

---

திருமந்திரச் சிந்தனை:

"மேல்கீழ் நடுப்பக்க மிக்குறப் பூரித்துப்... பாலாமி ரேசகத் தாலுட் பதிவித்து... யாலால முண்டா னருள்பெற லாமே."

தயாவினில் வாயு வலத்தில் இயங்கில்

தியான சமாதிகள் செய். 259

வாயுக்கள் வலப்புறப் பிங்கலையில் இயங்கும்போது தியானம் மற்றும் சமாதி நிலைகளில் ஈடுபடுவது பெரும் பலன் தரும்.

---

திருமந்திரச் சிந்தனை:

"மாறி வருமிரு பான்மதி வெய்யவ... ஊறு முயிர்நடு வேயுயி ருக்கிரந் தேறி யறிமின் தெரிந்து தெளிந்தே."

ஆதியா மூலம் அறிந்து அஞ்செழுத்தினைப்

பேதியாது ஓது பிணை. 260

யோகத்திற்கு அடிப்படையான வாயுவை அறிந்து, ஐம்புலன்களையும் அதனோடு பிணைத்து, ஐந்தெழுத்து மந்திரத்தை இடைவிடாது ஓதுக.