அட்ட வீரட்ட தலங்கள்

  ௨ 

அட்ட வீரட்ட தலங்கள் - செயல்கள்.

அட்ட வீரட்ட தலங்கள் என்பவை, சிவபெருமான் வீரச் செயல்கள் புரிந்த எட்டுத் தலங்களாகும். இதனை பத்தாம் திருமுறையில் திருமூலர் இரண்டாம் தந்திரத்தில் பதிவலியில் வீரட்டம் எட்டு என்ற அதிகாரத்தில் விளக்கி சொல்லி உள்ளார். இவற்றுள் ஒவ்வொரு தலமும் ஒரு குறிப்பிட்ட வீரச் செயலுடன் தொடர்புடையது. இந்தத் தலங்களில் சிவபெருமானின் பெயரும் வீரட்டானேசுவரர் என்றே அழைக்கப்படுகிறது. 

தலம்	வீரட்ட செயல்கள்
திருக்கண்டீயுர்	பிரமன் சிரம் (தலை) கொய்தது
திருக்கோவலூர்	அந்தகாசுரனை சம்ஹரித்தது
திருஅதிகை	திரிபுரத்தை எரித்தது
திருப்பறியலூர்	தக்கன் சிரம் கொய்தது
திருவிற்குடி	சலந்தாசுரனை சம்ஹரித்தது
திருவழுவூர்	யானையைத் தோலுரித்தது
திருக்குறுக்கை	காமனை எரித்தது
திருக்கடவூர்	யமனை உதைத்து விரட்டியது

திருக்கண்டியூர் வீரட்டம் : என்னும் தலத்தில் அயனும் மாலும் சிவபெருமானை முழு முதற் பொருள் என்பதை அறியாமல் செருக்குடன் இருந்தனர். இறைவன் நெருப்பு உருவமாய் நின்றான்.  (மால்) திருமால் அடியைக் காண முடியாது திரும்பினான். (அயன்) பிரம்மன் சிவ பெருமானின் முடியைக் கண்டதாகப் பொய் சொன்னான். சிவ பெருமான் வைரவக் கடவுளை அனுப்பி பிரமனது தலைகள் ஐந்தனுள் ஒன்றான நடுத்தலையைக் கிள்ளி வரப் பணித்தான். இந்தப் புராண வரலாறு செருக்கு உற்றவர்கள் தண்டிக்கப்படுவர் என்னும் தத்துவத்தை விளக்க்குகிறது. 

திருக்கோவலூர் வீரட்டம் : என்னும் தலத்தில் அந்தகசுரன் என்பவனைத் மூவிலைச் சூலத்தால் சிவபெருமான் அழித்ததாக வரலாறு உள்ளது. இது அந்தகாசுரனின் ஆணவ மலத்தை இச்சா ஞானக் கிரியா வடிவாய்த் தொழில்படும் தன் சக்தியைக் கொண்டு அழித்தணன் என்னும் உண்மையை விளக்குவதற்கு அமைந்ததாகும். 

திரு அதிகை வீரட்டம் : என்னும் தலத்தில்  முப்புரம் எரித்த புராண வரலாறு

கூறப்படுகிறது. தாரகாக்கன், கமலாக்கன், வித்தியுன்மாலி என்னும் மூன்று அசுரர்களும் பொன் வெள்ளி, இரும்பு என்னும் உலோகங்களினால் மூன்று கோட்டைகளை அமைத்து தேவர்களுக்கு இடர் விளைவித்து வந்தனர். தேவர்கள் சிவபெருமானிடம் முறையிட்டனர். அசுரர்கள் மூவரும் சிவ பக்தர்களாக இருந்தனர். எனவே சிவ பெருமான் திருமாலை, புத்தனாக உருப்பெற  செய்து பிடக நூலை செய்யும் படி பணித்தான். நாரதரின் அறிவுரையைக் கேட்டு அந்த மூன்று அசுரர்களும் பௌத்தர்களாகிச் சிவ பெருமானை நிந்தித்தனர். அன் நிலையில் சிவ பெருமான் அந்த அசுரர்களால் அமைக்கப் பெற்ற மூன்று கோட்டைகளையும்  கோபச் சிரிப்பால் நோக்க அவை வெந்து சாம்பலாயின. 

இந்த வரலாறு (ஆணவம், கன்மம், மாயை என்னும்) மும்மலத்தையும்  ஆன்மாக்களிடம் இருந்து நீக்கிய தத்துவத்தையும் விளக்குவதற்காக எழுந்தது. இது போன்ற புராண வரலாறுகள் தத்துவத்தை விளக்குவதற்காகவே கூறப்பட்டுள்ளது. கற்பனையாக எதையாவது புரிந்து கொள்ளாமல், தத்துவத்தை சரியாக புரிந்து கொண்டு பயன் பெற வேண்டும். 

இதனை திருமூலர்,  

அப்பணி செஞ்சடை ஆதி புராதனன் 
முப்புரம் செற்றான் என்பார்கள் மூடர்கள் 
முப்புரம் ஆவது மும்மல காரியம் 
அப்புறம் எய்தமை யார் அறிவோரே - 10:02:343 

என அருளிச்செய்துள்ளமையை சிந்திக்க வேண்டும்.  

திருப்பறியலூர் வீரட்டம் : என்னும் தலத்தில், தக்கன் என்பவன் சிவபெருமானை மதிக்காமல் வேள்வி செய்தான். சிவபெருமான் நெற்றிக் கண்ணில் இருந்து வீர பத்திரரைத் தோற்றுவித்து, தக்கனது வேள்வியை அழிக்கச் செய்தான். வீர பத்திரர் தக்கனது குறை உடலில் ஆட்டுத் தலையை பொருத்தினார். இந்த வரலாறு இறைவனது மறக் கருணையைக் குறிக்கிறது. 

திருவிற்குடி வீரட்டம் : என்னும் தலத்தில், வருணனால் வளர்க்கப்பட்ட சலந்திரன் தான் வன்மை காரணமாகச் செருக்குடன் தேவர்களைத் துன்புறுத்தினான். தேவர்கள் சிவபெருமானிடம் முறையிட்டனர். இறைவன் ஓர் அந்தணன் வடிவில் சென்று தான் கால் பெருவிரலால், நிலத்தில் ஒரு சக்கரத்தைக் கீறினான். சலந்திரனை நோக்கி அந்தணனாக வந்த இறைவன் உன் வெற்றியை உறுதிப்படுத்த "இந்த சக்கரத்தை பெயர்த்துச் சுமக்க "

என்றான். சலந்திரன் செருக்குற்று அந்த சக்கரத்தை பெயர்த்துத் தான் தலைமேலே வைத்தான் அந்த சக்கரம்  சலந்திரனின் உடலை இரு கூறாக்கியது இந்தப் புராண வரலாறு இறைவனின் மறக்கருணை பலவாறாக உள்ளது என்னும் தத்துவத்தை விளக்குகிறது. 

திருவழுவூர் வீரட்டம் : என்னும் தலத்தில், நடந்ததாக கூறப்படுவது, தாருகாவனத்து முனிவர்கள் சிவ  வேள்வியின் பயனாகக் கயாசுரன்

என்னும் யானை தோன்றியது. அது தேவர்களைத் துன்புறுத்தியது. சிவ பெருமானிடம் தேவர்கள் முறையிடச் சிவபெருமான் அந்த யானையைக் கொன்று அதன் தோலைத் தான் திருமேனியில் போர்த்துக் கொண்டான். யானைத் தோல் கொடிய வெப்பம் உடையது. சிவபெருமான் அதனைப் போர்த்திய வரலாறு எந்த பௌதிகப் பொருளும் இறைவனது அருள் திருமேனியைப் பாதிக்காது என்னும் தத்துவத்தை விளக்க வந்ததாகும். 

திருகுறுக்கை வீரட்டம் : என்னும் தலத்தில், நடந்ததாக கூறப்படுவது, நான்மறையின் உட்பொருள் நால்வர்க்கு உணர்த்தும் பொருட்டுச் சிவபெருமான் யோகநிலையில் இருந்தான் அது போழ்து சூரா பதுமானின், தொல்லைகளைத் தாங்க மாட்டாத தேவர்கள் சிவபெருமானை அணுகுவதற்கு ஓர் உபாயம் செய்தனர். உமையோடு கூடி இருந்து உலகை நோக்கிச் செய்யும் பொருட்டுத் தேவர்கள், யோக நிலையில் இருந்த சிவ பெருமானிடம் மன்மதனை அனுப்பிக் காமத்தில் விருப்பம் உண்டாகும் படி செய்தனர் சிவபெருமான் நெற்றிக் கண்ணைத் திறந்து காமனைச் சுட்டு எரித்த இந்த வரலாறு  கந்த புராணத்தில் உள்ள  இந்தப் புராண வரலாறு சிவபெருமான் தன் வயம் உடையவன் ஆதலின் பிறர் எவரும் அவனைத் தம் வயப்படுத்த முடியாது என்னும் தத்துவ விளகக்கத்தை  எடுத்துக் காட்டும் படி அமைந்ததாகும். 

திருக்கடவூர்  வீரட்டம் : என்னும் தலத்தில், மிருகண்டு முனிவரின் புத்திரரான மார்க்கண்டேயருக்கு பதினாறு ஆண்டுக் காலம் வாழும் வரத்தை இறைவன் வழங்கினான். சிவ பத்தியில் சிறந்த மார்க்கண்டேய முனிவரைக் கூற்றுவன்

வந்து அழைத்த போது சிவ பெருமானிடம் தஞ்சம் புகுந்தார். சிவ லிங்கத்தை தம் இரு கரங்களால் அனைத்துப் பற்றி நின்றார். அந்நிலையில் கூற்றுவன் பாசக்கயிற்றை வீசினான். அது சிவலிங்கத்தின் மேலும் விழுந்தது. உடனே சிவ லிங்கத்தில் இருந்து  வெளிப்பட்டுச் சிவ பெருமான் கூற்றுவனை உதைத்துத் தள்ளினான். மார்க்கண்டேயருக்கு ஆயுள் நீடித்தது. இந்த புராண வரலாறு தன்னைத் தஞ்சம் என்று அடைந்தவரைக் காத்து அருளும் சிவனது திருவருள் என்பதை காட்டுவதற்கு எழுந்ததாகும்.