.அருளாலயம் : ஆத்திச்சூடி

29 மே, 2026

---

51. சேரிடம் அறிந்து சேர்

நல்ல குணங்கள் உடையவர்களிடம் நட்பு கொள்ள வேண்டும். அது தான் நம்மை நல்வழிப்படுத்தும்.

52. செயிர் எனத் திரியேல்

சான்றோர்கள் வெறுத்துச் சொல்லும்படி நமது ஒழுக்க நிலை இருக்கக் கூடாது. அறநூல் படி வாழ வேண்டும், ஒழுக்கம் பேண வேண்டும்.

53. சொல் சோர்வு படேல்

பேச்சில் கவனம் இருக்க வேண்டும். பேசும் சொல்லில் குற்றம் ஏற்படும் படியாகவோ, தவறாகப் புரிந்து கொள்ளும் விதமாகவோ இருக்கக் கூடாது.

54. சோம்பித் திரியேல்

முயற்சி செய்யாமல் சோம்பேறித்தனமாக இருக்கக் கூடாது. முயற்சி தான் ஒருவருக்கு வளர்ச்சி. அதை விடாது கைக்கொள்ள வேண்டும்.

55. தக்கோன் எனத் திரி

சான்றோர்கள் நமது ஒழுக்க நிலையைப் போற்றும் வகையில் நமது எண்ணமும் செயலும் இருக்க வேண்டும்.

56. தானம் அது விரும்பு

அறத்தை விரும்பிச் செய்வது போல, தானம் செய்வதையும் விரும்பிச் செய்ய வேண்டும்.

57. திருமாலுக்கு அடிமை செய்

எல்லா உயிர்களும் இறைவனுக்கு அடிமை என்பதை உணர்ந்து, இறைப்பற்று கொண்டு தொண்டு செய்ய வேண்டும்.

58. தீவினை அகற்று

ஆணவ மலம் கொண்டு செய்யும் வினைகள் தீவினைகள். அவைகளைச் செய்யாமல் நீக்கினால் அன்பு நிலை உயரும்.

59. துன்பத்திற்கு இடம் கொடேல்

முயற்சியின் போது தடைகள் வரலாம். விடாமுயற்சி கொண்டு, துன்பத்திற்கு இடம் தராமல் வெற்றியின் உச்சத்தை அடைய வேண்டும்.

60. தூக்கி வினை செய்

விருப்பத்தின் காரணமாக ஒரு வேலையைச் செய்துவிட்டுப் பாதியில் விடக் கூடாது. அதன் வழிமுறைகளை ஆராய்ந்து துணிந்து செய்ய வேண்டும்.

-----

குறிப்பு: இந்த வலைப்பதிவின் உறுப்பினர் மட்டுமே ஒரு கருத்துரையை வெளியிடக்கூடும்.

.அருளாலயம்