10.. திருவருட்பயன்

   

       

௨ 

       

உமாபதி சிவாச்சாரியார் அருளிச்செய்த

       

திருவருட்பயன்

                                                                                             

தகவல் பலகை	விவரம்
நூல் பெயர்	திருவருட்பயன்
நூல் ஆசிரியர்	உமாபதி சிவாச்சாரியார்
அதிகாரம்	அணைந்தோர் தன்மை

💡 பத்தாவது அதிகாரம்: - பாடல்கள் 91-100

ஓங்கு உணர்வில் உள்ளடங்கி உள்ளத்துள் இன்பு ஒடுங்கத்

தூங்குவர் மற்றேது உண்டு சொல் (91)

சீவன் முத்தர்கள், உலகிய வாழ்க்கையில் உழலாமல், திருவருளில் மூழ்கி ஞானத்துள் அமிழ்ந்து இருப்பர்.

ஐந்தொழில் காரர்களாம் தொழிலும் போக நுகர்

வெந்தொழிலும் மேவார் மிக. (92)

பதிக்குரிய ஐந்தொழில்களையோ, பசுக்களுக்கு உரிய ஆகாமிய கன்மங்களையோ செய்யார். சிவானந்தத்திலேயே இருப்பர் சீவன் முத்தார்கள்.

எல்லாம் அறியும் அறிவுறினும் ஈங்கு இவர் ஒன்று

அல்லாது அறியார் அற (93)

எல்லாவற்றையும் அறியும் ஞானம் கை வந்த பின்னும் சீவன் முத்தார்கள் ஞானம் ஒன்றைத் தவிர வேறு எதையுமே அறிய மாட்டார்கள்.

புலன் அடக்கித் தம் முதற் கண் புக்குவார் போதார்

தலன் நடக்கும் ஆமை தக (94)

பொறி புலன்களை ஒடுக்கி சிவத்தில் பொருந்தி நிற்பர். சீவன் முத்தர்கள் இவ்வுலக விடயங்களில் தலையிட மாட்டார்கள்.

அவனை அகன்று எங்கு இன்றாம் ஆங்கவனாம் எங்கும்

இவனை ஒழிந்து உண்டாதல் இல் (95)

சிவமாம் தன்மை பெற்ற சீவன் முத்தர்கள் ஆணவ மல சார்பாய் அறவே விட்டவர்கள். அவர்கள் முழு நிறைவு உடையவர்கள்.

உள்ளும் புறம்பும் ஒரு தன்மைக் காட்சியருக்கு

எள்ளும் திறம் ஏதும் இல் (96)

சீவன் முத்தார்களுக்கு எல்லா பொருள்களும் சிவமாய் தோன்றும். எந்த பொருள்களையும் இகழ்வதும் இல்லை புகழ்வதும் இல்லை.

உறுந்தொழிற்குத் தக்க பயன் உலகம் தத்தம்

வருந்தொழிற்கு வாய்மை பயன் (97)

செருக்குருமாறு செய்யும் தொழில் எதற்கும் துன்பம் உடைய உலக வாழ்வே பயனாகும். பற்று இன்றி செய்யும் செயலுக்கு பயன் முத்தியை ஆகும்.

ஏன்ற வினை உடலோடு ஏகும் இடையேறும் வினை

தோன்றில் அருளே சுடும். (98)

சீவன் முத்தர்களுக்கு ஊழ் உடலால் கழியும். அவர்கள் உடல் நீங்கும் போது, வினைகள் தாமே மறையும். மற்ற வினைகளை அருளே சுட்டு அழித்து விடும்.

மும்மை தரும் வினைகள் மூளாவாம் மூதறிவார்க்கு

அம்மையும் இம்மையே யாம் (99)

இம்மை மறுமை அம்மை என்னும் மூவகை வினைகள் இல்லை. சீவன் முத்தர்களுக்கு சரீரம் இருக்கையிலேயே முத்தி உண்டாகும்.

கள்ளத் தலைவர் துயர் கருதித் தங்கருணை

வெள்ளத்து அலைவர் மிக (100)

சிவபெருமான் உயிர்களிடத்து இரக்கம் காட்டுவது போல, சீவன் முத்தர்கள் தம் கருணை வெள்ளத்தால் ஆன்மாக்கள் படும் துன்பத்தை போக்க எங்கும் அருளை வெளிப் படுத்துவார்.

                   

🎉 திருவருட்பயன் - நிறைவு 🎉

உமாபதி சிவாச்சாரியார் அருளிச்செய்த திருவருட்பயன் 

 இனிதே நிறைவடைந்தன.