05. திருவருட்பயன்

   

       

௨ 

       

உமாபதி சிவாச்சாரியார் அருளிச்செய்த

       

திருவருட்பயன்

                                                                                              

தகவல் பலகை	விவரம்
நூல் பெயர்	திருவருட்பயன்
நூல் ஆசிரியர்	உமாபதி சிவாச்சாரியார்
அதிகாரம்	அருள் உரு நிலை

---    

💡 ஐந்தாவது அதிகாரம்: - பாடல்கள் 41-50

அறியாமை உள் நின்று அழித்ததே காணும்

குறியாக நீங்காத கோ (41)

அறியாமை கொண்ட ஆன்மாவை உள் நின்று ஊட்டி வளர்த்த திருவருளே குரு வடிவம் தாங்கி வந்து ஞானம் அருளும். அருள் உரு நிலை பெற்று உதவும்.

அகத்து உறு நோய்க்கு உள்ளினார் அன்றி அதனைச்

அகத்தவரும் காண்பரோ தான் (42)

ஆன்மாவை பற்றியுள்ள ஆணவமாகிய நோயை, ஆன்மாவோடு கலந்து நிற்கும் திருவருளே அறியும். அந்த அருள் குருவாக வந்து பிணி நீக்கம் செய்தாலன்றி நோய் நீங்காது.

அருளா வகையால் அருள் புரிய வந்த

பொருள் ஆர் அறிவார் புவி (43)

குரு வடிவில் வந்து அருள் புரியும் திருவருளை பக்குவம் வாய்ந்த ஆன்மாக்களை தவிர வேறு ஒருவரால் அறியமுடியுமோ. (முடியாது)

பொய் இருண்ட சிந்தைப் பொறியிலார் போதமாம்

மெய் இரண்டும் காணார் மிக. (44)

ஆணவ இருளில் அகப்பட்ட ஆன்மாக்கள், உலக இன்பத்திலேயே கருத்து உடையவராய் குரு வாகிய திருமேனியை உரியவாறு காணமாட்டார்.

பார்வை என மாக்களைப் பற்றிப் படித்தற்காம்

போர்வை எனக் காணார் புவி (45)

பக்குவம் பெற்ற ஆன்மாக்களுக்கு ஞான உபதேசம் செய்ய மானுட சட்டை தாங்கி வந்து அருள்பவன் இறைவன். பக்குவம் இல்லாதவர்கள் இதனை அறிய மாட்டார்கள்.

எமக்கு என் எவனுக்கு எவை தெரியும் அவ்வத்

தமக்கு அவனை வேண்டத் தவிர் (46)

குருவினால் எனக்கு என்ன பயன் என கேட்காமல், ஞான பொருள்களை உள்ளபடியே உணர்ந்து இருப்பவர்களை பக்குவம் உடைய ஆன்மாக்கள் குருவாக உணரும்.

விடயம் நகுலம் மேவினும் மெய்ப் பாவகனின் மீளும்

கடனில் இருள் போவது இவன் கண். (47)

தன்னை சிவமாக பாவித்து அருள் உபதேசம் செய்யும் பக்குவம் உடைய ஆன்மாக்கள் ஆணவமலத்தில் இருந்து விடுபடும்.

அகலத் தரும் அருளை ஆக்கும் வினை நீக்கும்

சகலர்க்கு வந்து அருளும் தான் (48)

மூவகை ஆன்மாக்களுக்கு வினை நீக்கும் வகையை சொல்கிறது. அறிவில் நின்று ஒரு மலம் உடைய விஞ்ஞானகலருக்கும், எதிரில் தோன்றி இருமலம் உடைய பிரலாயகலருக்கும் குருவாக வந்து மும்மலம் உடைய சகலருக்கும் வினை நீக்கம் செய்வான்.

ஆர் அறிவார் எல்லாம் அகன்ற நெறி அருளும்

பேரறிவாளன் வாராத பின் (49)

தத்துவங்களை கடந்த சிவ பெருமான் ஒருவனே உயிர்களுக்கு முத்தி அளிக்க முடியும்.

ஞானம் இவன் ஒழிய நண்ணியிடும் நற்கல் அனல்

பானு ஒழியப் படின் (50)

திருவருள் வடிவாகிய குருவினால் மட்டுமே ஞானம் தோன்றும்.