திருக்களிற்றுப்படியார் - 11 (81-90)

௨

திருக்கடவூர் உய்ய வந்த தேவநாயனார் அருளிச்செய்த

திருக்களிற்றுப்படியார்

தகவல் பலகை	விவரம்
நூல் பெயர்	திருக்களிற்றுப்படியார்
நூல் ஆசிரியர்	திருக்கடவூர் உய்ய வந்த தேவநாயனார்
காலம்	12ம் நூற்றாண்டு

---

ஒன்று உரைத்தது ஒன்று உரையா சாத்திரங்கள் ஒன்றாக நின்று உரைத்து நீக்கச்சியிக்க மாட்டாவால் - இன்று உரைக்க என்னால் இயன்றிடுமோ என்போல் வார ஏதேனும் சொன்னால் தான் ஏறுமோ சொல் (81)

இறைவனின் உண்மை இயல்பினை நூல்களின் வாயிலாக படித்து அறிந்து கொள்ள இயலாது.

திருவருள் நினைவாகவே இருக்க, அவர்களின் பக்குவ நிலைக்கு ஏற்ப அத்தகைய ஆன்மாக்களுக்கு இறைவன் உணர்த்துவான்.

யாதேனும் காரணத்தால் எவ்வுலகில் எத்திறமும் மாதேயும் பாகான் இலச்சினையே - ஆதலினால் பேதமே செய்வாய் அபேதமே செய்திடுவாய் பேதாபே தம் செய்வாய் பின் (82)

பதி பசு பாசம் எனும் முப்பொருள் உண்மையையும் இயல்பினையும் அறிந்த பின், மற்றவர்களின் கருத்துக்குச் செவி சாய்க்காமல் தமது செயலில் உறுதியாக இருந்தால் தானே எல்லாம் விளங்கும்.

நின்றபடி நின்றவர்கட்கு அன்றி நிறம் தெரியா மன்றினுள் நிண்ட்ரூ ஆடல் மகிழந்தயனும் - சென்று உடனே எண்ணூறும் ஐம் பூத முதல் எட்டுருவாய் நின்றானும் பெண்ணுற நின்று ஆடும் பிரான் (83)

இன்ன தன்மையன் என்று அறிவொண்ணா எம்மான் என்பது போல, இறைவனின் தன்மையை உயிர்களால் பெத்த நிலையில் அறிய முடியாது.

சிவமே சிவமாக யான் நினைந்தாற் போலச் சிவமாகியே இருப்பது அன்றி - சிவமே என்று உணர்வாரும் அங்கே உணர்வழியச் சென்று புணர்வாரும் உண்டோ புவி (84)

சிவபெருமானே பக்குவம் உள்ள ஆன்மாவைத் தன் அருளால் ஆட்கொண்டு, சிவ ஸ்வரூபமாக விளங்கித் தோன்றச் செய்கிறான்.

அது இது என்றும் அவன் நானோ என்றும் அது நீயே ஆகின்றாய் என்றும் - அத்துவானேன் என்றும் தமை உணர்ந்தார் எல்லாம் இரண்டாக ஒன்றாகச் சொல்லுவரோ உற்று (85)

சிவமும் ஆன்மாவும் இரு வேறு பொருள்கள் ஆகும்.

பிறப்பு நிலையிலும் முத்தி நிலையிலும் ஆன்மா சிவத்திற்கு என்றும் அடிமையே ஆகும்.

ஈராகி அங்கே முதல் ஒன்றாய் ஈங்கு இரண்டாய் மாறாத எண் வகையாய் மற்று இவற்றின் - வேறாய் உடனாய் இருக்கும் உருவுடைமை என்றும் கடனாய் இருக்கின்றான் காண் (86)

இறைவன் உயிர்களோடு ஒன்றாய், உடனாய், வேறாய் நிற்கிறான்.

உலகமும் உயிர்களும் நிலைத்திருக்கும் பொருட்டு ஒன்றாயும், உலகத்தை இயக்கும் பொருட்டும் உயிருக்கு அறிவித்தல் பொருட்டும் வேறாயும், உலகம் இயங்கும் பொருட்டும் உயிர் நுகரும் பொருட்டும் அவற்றோடு உடனாயும் நிற்கிறான்.

உன் உதரத்தே கிடந்த கீடம் உறுவதெல்லாம் உன்னுடையது என்னாய் நீ உற்றனையோ - மன்னுயிர்கள் அவ்வகையே காண் இங்கு அழிவதுவும் ஆவதுவும் செவ்வகையே நின்ற சிவன் பால் (87)

சிவபெருமான் ஒன்றாயும் உடனாயும் வேறாயும் இருப்பினும், உயிர்கள் படும் இன்ப துன்ப அனுபவம் இறைவனுக்குக் கிடையாது.

அவனே ஆவணி முதல் ஆயினானும் அவனே அறிவாய நின்றானும் - அவனே காண் ஆணாகிப் பெண்ணாய் அலியாகி நின்றானும் காணாமை நின்றானும் கண்டு (88)

உலகின் நிமித்த காரணனாக உள்ளவன் இறைவனே ஆகும்.

அறியாமை வயப்பட்டு இருக்கும் உயிர்களின் அறிவினை விளக்கி உயிருக்கு உயிராய் நிற்பவனும் இறைவனே; உயிர்களின் வினைக்கு ஈடாக, உயிர்களேயாய் நின்று பேருதவி செய்பவனும் இறைவனே ஆகும்.

இன்று தான் நீ என்னைக் காந்திருந்தும் கண்டாயோ அன்றித் தான் நான் உன்னைக் கண்டேனோ - என்றால் அருமாயை ஈன்றவள் தன் பங்கனையார் காண்பார் பெருமையைச் சூழல் பிழைத்து (89)

மாயையால் விளங்கும் சுட்டறிவைக்கொண்டு சிவபெருமானைக் காண முடியாது.

கடல் அழைத்தே ஆடுதற்குக் கை வந்து நின்றும் கடல் அளக்க வாராதாற் போலப் - படியில் அருத்தி செய்த அன்பராய் வந்து ஆண்டதுவும் எல்லாம் கருத்துக்குச் சேயனாய்க் காண் (90)

பேரன்பு உடைய அடியார்களை, இறைவன் மானுடத் திருமேனி கொண்டு எழுந்தருளி வந்து ஆட்கொண்டது எல்லாம், நம் சிற்றறிவுக்கு எட்டாத அவனது பெருங்கருணையே ஆகும்.

-----