6. திரு உந்தியார்

௨ 

திருவியலூர் உய்ய வந்த தேவனாயானர் அருளிச்செய்த

திரு உந்தியார்

தகவல் பலகை	விவரம்
நூல் பெயர்	திருஉந்தியார்
நூல் ஆசிரியர்	திருவியலூர் உய்ய வந்த தேவநாயனார்
காலம்	12ம் நூற்றாண்டு

---

திருவாசகத்தில் வரும் தாழிசைப் பாடல்கள் போல 45 பாடல்களால் அமைந்தன.

உந்தீபற = உம்+தீ+பற என உம்முடைய தீவினைகள் பறந்து விடுவதாக அமைந்துள்ளது.

💡 உபதேசம் - பாடல்கள் 23-27

கள்ளரோடு இல்லம் உடையார் கலந்திடில்

வெல்ல வெளியாம் என்று உந்தீபற

வீடும் எளிதாம் என்று உந்தீபற (23)

ஆன்மா வசம் பொறிபுலன்கள் இருக்க வேண்டும். ஆனால் பொறி புலன்கள் வசம் ஆன்மா அகப்பட்டு விட்டால், முத்தி கிடைக்காது.

எட்டுக்கொண்டார்தமைத் தொட்டுக் கொண்டே நின்றார்

விட்டார் உலகம் என்று உந்தீபற

வீடே வீடாகும் என்று உந்தீபற (24)

எண் குணத்தை உடைய இறைவனை எப்போதும் சிந்தித்து இருப்பவர்கள் உலகபற்றை விட்டவர்கள் சீவன் முத்தர்கள்.

சித்தமும் தீய கரணமும் சித்திலே

ஒத்ததே ஒத்தது என்று உந்தீபற

ஒவ்வாதது ஒவ்வாது என்று உந்தீபற (25)

பொறி புலன்களோடு சித்தம் ஒன்றியே இருக்கும். பொறி புலன்களில் அகப்படாமல் திருவடியையே சிந்தித்து இருக்க வேண்டும்.

உள்ளும் புறமும் நினைப்பு அறின் நின் உள்ளே

மொள்ளா அமுதாம் என்று உந்தீபற

முளையாது பந்தம் என்று உந்தீபற (26)

சரியை, கிரியை, யோகம், ஞானம் என நால்வகை வழிபாட்டில் புறத்தே தொடர்பு படுத்தும் நினைப்புகளை எண்ணாமல், சிவ சிந்தனையுடன் வழிபாடு இயற்றினால், குறையாத சிவானுபவம் உண்டாகும்.

அவிழ இருக்கும் அறிவுடன் நின்றவர்க்கு

அவிழும் இவ் அல்லல் என்று உந்தீபற

அன்றிக விழாது என்று உந்தீபற (27)

உயிர்கள் துன்பபட காரணம், பாசத்தொடர்பு தான். இறைவனுக்கு அத்தொடர்பு இல்லை என்பதால் அவனுக்கு துன்பம் இல்லை. துன்பம் இல்லாமல் வாழ விரும்புபவர்கள் திருவருளில் அடங்கி நிற்க வேண்டும்.