7. திரு உந்தியார்

௨ 

திருவியலூர் உய்ய வந்த தேவனாயானர் அருளிச்செய்த

திரு உந்தியார்

தகவல் பலகை	விவரம்
நூல் பெயர்	திருஉந்தியார்
நூல் ஆசிரியர்	திருவியலூர் உய்ய வந்த தேவநாயனார்
காலம்	12ம் நூற்றாண்டு

---

திருவாசகத்தில் வரும் தாழிசைப் பாடல்கள் போல 45 பாடல்களால் அமைந்தன.

உந்தீபற = உம்+தீ+பற என உம்முடைய தீவினைகள் பறந்து விடுவதாக அமைந்துள்ளது.

💡 உபதேசம் - பாடல்கள் 28-31

வித்தினைத் தேடி முளையைக்கை விட்டவர்

பித்துஏறினார்கள் என்று உந்தீபற

பெறுவது அங்கு என்? பெணேஉந்தீபற (28)

வயலில் விதையை விதைத்தவர்கள், விதையிலிருந்து முளை தோன்றிய நிலையில் பேணி வளர்ப்பார்கள். அது போல திருவருளில் தோய்ந்து ஞானம் வெளிப்படும் போது, அதில் அழுந்தி இருக்க வேண்டும். (வித்து-திருவருள்; முளை-ஞானம்)

சொல்லும்இடம் அன்று சொல்லப் புகும் இடம்

எல்லை சிவனுக்கு என்று உந்தீபற

என்றால் நாம் என் செய்கோம் உந்தீபற (29)

சிவம் முழு நிறைவுடைய பொருள். சிற்றறிவுள்ள பொருள் உயிர். சிவமே குருவடிவாக வந்து தம்மை காட்டினால் அன்றி உயிர்களினால் சிவத்தை அறிய முடியாது.

வீட்டில்இருக்கில் என்? நாட்டிலே போகில் என்?

கூட்டில் வாள் சாத்தி நின்று உந்தீபற

கூடப்படாதது என்று உந்தீபற (30)

திருவருள் துணையின்றி ஆன்மாவுக்கு சிவானுபவம் கூடாது. இல்லறமோ, துறவறமோ எந்நெறியில் நின்றாலும் இதுவே.

சாவிபோம் மற்றைச் சமயங்கள் புக்கு நின்று

ஆவி அறாதே என்று உந்தீபற

அவ் உரை கேளாதே உந்தீபற (31)

தெளிவில்லாத சமய கொள்கைகளில் வாழ் நாளை கழித்து, மீண்டும் பிறவி கடலில் விழாமல், வாய்த்தது நம் தமக்கு என எடுத்த பிறவியில் பயன் பெற விழைய வேண்டும்.